އިންޑިއާ އައުޓު މުޒާހިރާތަކަކީ ފަހަކަށް އައިސް ކޮންމެ ހަފްތާ ބަންދެއްގައި ކަހަލަ ގޮތަކަށް އިދިކޮޅު ޕީޕިއެމް ޕިއެންސީ ކޯލިޝަނުން މާލޭގެ މަގުތަކުގައި ބާއްވަމުންދާ ސިޔާސީ އެންމެ މުހިންމު ހަރަކާތެވެ. މިހަރަކާތުގައި ގޮވާލަމުންދަނީ ދިވެހިރާއްޖެއިން އިންޑިއާ ސަރުކާރާއެކު ހަދާފައިވާ "ގޮތް ނޭގެ" އެއްބަސްވުންތައް ހާމަ ކުރުމަށާއި، އަދި ބޭރުގެ އަސްކަރިއްޔާއަކުން ދާއިމީ ގޮތެއްގައި ރާއްޖޭގައި ނުތިބުމަށެވެ.

އަދި މީގެ އިތުރުންވެސް، މިސަރުކާރުން ގައުމުގެ މިނިވަންކަން ގެއްލުވާލާފައިވާ ކަމަށާއި، އިންޑިއާއާއެކީ ސިއްރު އެއްބަސްވުންތައް ގާއިމް ކޮށްގެން ގައުމުގެ ސަލާމަތާއި ރައްކާތެރިކަންވެސް ގުރުބާން ކޮށްފައިވާކަމަށް އިދިކޮޅުގެ މުޒާހިރާތަކުގައި ގެންދަނީ ވަރަށް އަޑު އުފުލަމުންނެވެ. އަދި ޕާޓީގެ ކުލައިގެ ބަދަލުގައި، ބޮޑަށް ގައުމީކުލަ ބޭނުން ކޮށްގެން އިދިކޮޅު ޕާޓީން މާލޭގެ މަގުތަކުގައި މިގޮތުން ކުރިޔަށް ގެންދަމުންދާ މުޒާހިރާތަކުގައި ފަހަކަށް އައިސް ގިނަބަޔަކު ބައިވެރިވަމުން ދާކަންވެސް ފާހަގަ ކޮށްލެވެއެވެ.

ފާއިތުވެދިޔަ ތަނުގައި މާލޭގައި ބޭއްވެމުންއައި އިންޑިއާ އައުޓް ހަރަކާތްތައް ޕީޕިއެމްއިންވަނީ ރާއްޖެތެރެއަށް ފުޅާކޮށް، ރާއްޖޭގައި އޮތް އެންމެ ބޮޑު އެއް އަތޮޅުކަމުގައިވާ ފުވައްމުލަކުގައިވެސް އިންޑިއާ އަައުޓް ފުރަތަަމަ މުޒާހިރާ ފާއިތިވެދިޔަ ހަފްތާ ބަންދުގައި ވަނީ ބައްވާފައެވެ.

އިދިކޮޅު އެންމެ ބޮޑު ޕާޓީ ޕީޕީއެމްއިން ރާއްޖެގެ މިނިވަންކަމުގެ ދިފާޢުގައި ބާއްވަމުން ގެންދާ ސިޔާސީ ހަރަކާތުގެ އެންމެ މުހިންމު އެއްބަޔަކީ، މި ސަރުކާރުން އިންޑިއާ ސަރުކާރާއެކީ ކޮށްފައިވާ އުތުރު ތިލަފަޅު އެއްބަސް ވުމެވެ. މިއެއްބަސްވުން އާންމު ކުރުމަށް ސަރުކާރުން ދެކޮޅު ހެދުމުގެ ނަތީޖާއަކަށް ވެގެންދިޔައީ، އެއްބަސްވުން އާންމު ކުރުމަށް ގޮވާލާ ސިޔާސީ ހަރަކާތް ވަރުގަދަކޮށް، ސަރުކާރާއި ދެކޮޅަށް ހިންގާ ސިޔާސީ ހަރަކާތްތައް މުޅިން އާ އުސްމިނަކަށް ގެންދިއުމަށް އިދިކޮޅި ޕީޕީއެމްއަށް ފުރުސަތު ފަހިވެގެން ދިއުމެވެ.

ނަތިޖާއެއްގެ ގޮތުން، ޕީޕީއެމްއިން ކުރަމުންދިޔަ މުޒާހިރާތަކާއި، އަދި މި އެއްބަސްވުންތަކާއި ގުޅޭގޮތުން އާންމު ރައްޔިތުންގެ ހިތްތަކުގައި އުފެދިފައިވާ ޝައްކުތަކާއި ވަހުމްތަކުގެ ނަތީޖާއެއްގެ ގޮތުން އެންމެފަހު، ސަރުކާރަށް މަޖުބޫރުވެގެން ދިޔައީ އެއްބަސްވުމުގެ ބައެއް ބައިތައް ރައްޔިތުންގެ މަޖިލިހާއި ހިއްސާކުރުމަށެވެ. މިގޮތުން 241 ކޮމިޓީއާއި މި އެއްބަސްވުންތަކުގެ ބައެއް ބައިތައް ހިއްސާކޮށް، އެކޮމިޓީން ނިންމާފައިވަނީ މި އެއްބަސްވުންތަކަކީ ގައުމީ ސަލާމަތަށް ނުރައްކަލެއް ނެތް އެއްބަސްވުންތަކެއް ކަމުގައެވެ.

އެއްބަސްވުންތަކާމެދު ގޮތް ނިންމި ކޮމިޓީ ބައްދަލުވުމުގައި އިދިކޮޅުން ބައިވެރި ނުވޭ!

މި ސަރުކާރުން އިންޑިއާއެކީ ހަދާފައިވާ އެއްބަސްވުންތަކުގައި ގައުމީ ސަލާމަތަށް ނުރައްކާވާ އެއްވެސް ކަމެއް ހިމެނިފައި ނުވާކަމަށް ނިންމާ، އިއްޔެ ބޭއްވިގެންދިޔަ 241 ކޮމިޓީގެ ބައްދަލުވުމުގައި އެއްބަސްވުންތަކަށް ކޮމިޓީން ރުހުން ދީފައިވަނީ، މި އެއްބަސްވުންތަކާ ދެކޮޅަށް އެންމެ ބޮޑަށް އަޑު އުފުލަމުންދާ ޕީޕީއެމް ޕީއެންސީގެ މެމްބަރުން ހާޒިރުވެވަޑައި ނުގަންނަވާ، ކޮމިޓީގެ ބައްދަލުވުމެއްގައި، ކޮމިޓީގައި ހިމެނިވަޑައިގަންނަވާ އެމްޑީޕިގެ މެމްބަރުންގެ މެޖޯރިޓީ ތާއީދާ އެކީއެވެ. ކޮމިޓީން ނިންމާފައިވަނީ، މި އެއްބަސްވުން ތަކަކީ ގައުމީ ސަލާމަތަށް އެއްވެސް ނުރައްކަލެއް ނެތް އެއްބަސްވުންތަކެއް ކަމުގައެވެ.

ރައްޔިތުންގެ މަޖިލިހުގެ 241 ކޮމިޓީގައި ޕީޕީއެމްގެ ފަރާތުން ތިއްބަވަނީ މަޑުއްވަރި ދާއިރާގެ މެމްބަރު އާދަމް ޝަރީފްއާއި ގުރައިދޫ ދާއިރާގެ މެމްބަރު އައްސާން މައުމޫނެވެ. މި ދެމެމްބަރުންގެ އިތުރުން ކޮމިޓީގައި ތިއްބަވަނީ އެމްޑީޕީގެ މެމްބަރުންނާއި އޭގެ އިތުރުން ޖޭޕީގެ އެންމެ މެމްބަރަކާއި އެމްއެންޕީގެ މެމްބަރެއްގެ އިތުރުން މިނިވަން މެމްބަރެކެވެ.

ރާއްޖެއާ އިންޑިއާއާ ދެމެދު ހަދާފައިވާ ތިން އެއްބަސްވުމެއްގައި ގައުމީ ސަލާމަތަށް ނުރައްކާވާ އެއްވެސް ކަމެއް ނެތް ކަމަށާއި އެއްބަސްވުންތައް ރަނގަޅު ކަމަށް 241 ކޮމިޓީން ދިރާސާކޮށް އިއްޔެ ނިންމާފަވާ 3 އެއްބަސްވުމަކީ:

މި ތިން އެއްބަވުމާ ގުޅޭގޮތުން ރައްޔިތުންގެ މަޖިލިހުގެ 241 ކޮމިޓިން ދިރާސާކޮށް، ކޮމިޓީން ގޮތް ނިންމި ބައްއްދަލުވުން ކުރިޔަށް ދިޔައިރު، ކޮމިޓީގައި ހިމެނިވަޑައިގަންނަވާ ޕީޕީއެމް ޕިއެންސީގެ ދެމެމްބަރުން ކަމުގައިވާ މަޑުއްވަރި ދާއިރަގެ މެމްބަރު އާދަމް ޝަރީފްއާއި ގުރައިދޫ ދާއިރާގެ މެމްބަރު އައްސާން މައުމޫން ހުންނެވީ، ޕާޓީގެ ހަރަކާތްތަކުގައި ބައިވެރިވެޑައިގަތުމަށް ފުވައްމުލަކަށް ވަޑައިގެންނެވެ.

އިންޑިއާއެކު މިސަރުކާރުން ހަދާފައިވާ އެއްބަސްވުންތަކުގެ ސަބަބުން ގައުމުގެ ސަލާމަތަށާއި އަދި މިނިވަންކަމަށް ބުރޫ އަރާމުންދާކަމަށް އެންމެ ބޮޑަށް ވަކާލާތު ކުރަމުންދާ ޕީޕީއެމް/ޕީއެންސީ ކޯލިޝަންގެ މެމްބަރުން 241 ކޮމިޓީގެ ނިންމުން ނިންމި ބައްދަލުވުމަށް ހާޒިރުވެފައި ނުވާތީ ކޮމިޓީގައި ހިމެނިވަަޑައިގަންނަވާ އެމްއެންޕީގެ މެމްބަރު، ވިލިމާލެ ދާއިރާގެ މެމްބަރު އަހުމަދު އުޝާމް ވިދާޅުވެފައި ވަނީ އެއީ "ޒިންމާދާރުކަން ކުޑަ ކަމެއް" ކަމުގައެވެ. އުޝާމް ވިދާޅުވި ގޮތުގައި ބަހާ އަމަލާ ދިމާނުވުމަކީ ކަންބޮޑުވާން ޖެހޭ މައްސަލައެކެވެ.

އުޝާމް ވިދާޅުވީ ކޮމިޓީ ބައްދަލުވުން އޮންނަކަން 3 ދުވަސް ކުރިން މެމްބަރުންނަށް އަންގާފައިވާ ކަމަށާއި، އަދި އޮންލައިކޮށް ބައިވެރިވުމުގެ ފުރުސަތުވެސް ކޮމިޓީން މެމްބަރުންނަށް ދީފައިވާ ކަމުގައެވެ.

މި ބައްދަލުވުމުގައި އެމްޑީޕީގެ ފިޔަވާ އެހެނިހެން ޕާޓީތަކުގެ މެމްބަރުން ވޯޓު ދެއްވާފައިވަނީ މި ކޮމިޓީގެ ނިންމުމާ ދެކޮޅަށްކަން މި ފުރުސަތުގައި ފާހަގަ ކޮށްލަން ޖެހެއެވެ.

އިންޑިއާ އައުޓު މުޒާހިރާތަކުގެ ނިޔަތާ މެދު ސުވާލު އުފެދޭ!

އިންޑިއާ ސަރުކާރާއެކީ މިސަރުކާރުން ވެފައިވާ އެއްބަސްވުން ތަކާމެދު ރައްޔިތުންގެ މަޖިލީހުގެ ސުޕަރ މެޖޯރިޓީ އޮތް އެމްޑީޕީން ރުހުން ދިނުމަކީ އެއީ ކަންހިގާނޭ ގޮތްކަން މިއީ މާކުރިންވެސް ކަށަވަރުވެ ޔަގީންވާ ކަމެކެވެ. އަދި ހަމަ އެފައިއިން، 241 ކޮމިޓީގެވެސް އައުލަބިއްޔަތު އޮތީ އެމްޑީޕީގައި ކަމަށް ވުމާއެކު، އެކޮމިޓީގެ ނިންމުމަކީވެސް މާކުރިއްސުރެ އަންދާޒާ ކޮށްލުން ދަތިކަމަކަށް ވެގެން ގޮސްފައެއް ނުވެއެވެ.

އެހެންނަމަވެސް، ރައްޔިތުންގެ މަޖިލިހުގެ ނިންމުން ކޮންމެ ގޮތަކަށް އައި ކަމުގައިވި ނަމަވެސް، އެމަޖިލީހުގައި ޕާޓީތަކުން ތަމްސީލުކުރާ ގޮތުގެ މައްޗަށް ބިނާކޮށް، އާންމު ރައްޔިތުންނަށް ފޯރުކޮށްދޭ މެސެޖަކީ ވަރަސްވެސް މުހިންމު މެސެޖެކެވެ. މެމްބަރުން އަޑު އުފުލާ ގޮތާއި، ދައްކަވާ ވާހަކަފުޅުތަކަކީ އަބަދުވެސް އާންމު ރައްޔިތުން އެކި މޭރުމުން ބަލައިގަންނަ ކަންކަމެވެ.

މި ސަބަބަށްޓަކާ، ވަކީން ޚާއްސަ ގޮތެއްގައި، މަގުމަތީގައި އިންޑިއާ އައުޓު ހަރަކާތް ވަރަށް ވަރުގަދައަށް ކުރިޔަށް ގެންދިއުމަށްފަހު، ހަމަ އެ ހަރަކާތް އެހާމެ ވަރުގަދަކޮށް ރައްޔިތުންގެ މަޖިލިހުގެ އެތެރޭގައި ކުރިޔަށް ގެންދިއުމަކީވެސް އެހާމެ މުހިންމު ކަމެއްކަމަކަށް އަބަދުވެސް އޮންނަނީ ވެފައެވެ. ސަބަބަކީ، ރައްޔިތުންގެ މަޖިލީހުގެ ނިންމުން ކޮންމެ ގޮތަކަށް އައިކަމުގައިވި ނަމަވެސް، އެ މަޖިލީހުގެ ތެރޭގައި ހައްގު ބަސް އިއްވުން އަބަދުވެސް ވެފައި އޮންނަނީ މަޖިލިހުގެ ނިންމުމަށްވުރެ ބޮޑަށް ރައްޔިތުން ބަލައިގަންނަ ކަމެއްގެ ގޮތުގައެވެ.

އެހެންކަމުން، 241 ކޮމިޓިގައި ހިމެނިވަޑައިގަންނަވާ އިދިކޮޅު ދެމެމްބަރުން ކޮމިޓީގެ ނިންމުމާ ދެކޮޅަށް ވޯޓުދެއްވަން ކޮމިޓީގައި ނުތިއްބެވުމަކީ މިހާރު ކުރިޔަށްދާ އިންޑިއާ އައުޓް ހަރަކާތުގެ ނިޔަތާގުޅޭ ގޮތުން ގިނަ ބައެއްގެ ހިތުގައި ސުވާލު އުފެދިގެންދާނޭ ކަމެއްކަމީ ކަށަވަރުވެ ޔަގީންވާ ކަމެކެވެ.

އަދި މި ބައްދަވުންތަކަކީ ކުރިން ނޯޓިސް ދެވިގެން ބޭއްވޭ ބައްދަލުވުން ތަކަކަށް ވެގެން ދިއުމުގެ އިތުރުން، އޮންލައިންކޮށްވެސް ކޮމިޓީ ބައްދަލުވުންތަކުގައި ބައިވެރިވުމުގެ ފުރުސަތު ފަހިވެފައި އޮންނައިރު، އިންޑިއާއާއެކު މިސަރުކާރުން ވެފައިވާ އެއްބަސްވުންތަކުގެ މައުލޫމާތު ކޮމިޓީއަށް ފޯރުކޮށް ދިން ގޮތާއި، ކޮމިޓީން ނިންމާ ނިންމުންތައް ސައްޙަ ނޫންކަން ނުވަތަ އެނިންމުންތަކާ ދެކޮޅަށް އިހުތިޖާޖު ކުރުމުގެ ގޮތުން، އޮންލައިންކޮށް ނަމަވެސް، އިދިކޮޅު ޕާޓީގެ ތަމްސީލުވުން ކޮމިޓީގެ ނިންމުމުގައި ހިމެނިގެން ގޮސްފައި ނުވާ ނުވުމަކީ، މިހާރު އިދިކޮޅުން ކުރިޔަށް ގެންދާ އިންޑިއާއުޓް ހަރަކާތްތަކަށް ކުރިޔަށް އޮތް ތަނުގައި އެކި ގޮތްގޮތުން ކުރިމަތި ވެގެން ހިގައިދާނޭ ގޮންޖެހުމަކަށް ވެގެން ދިއުމަކީ ވަރަށްވެސް އެކަށީގެންވާ ކަމެއް ކަމުގައި ދަންނަވަން ޖެހެއެވެ.