އަސްކަރިއްޔާއިން ގެނައި ބަޢާވާތެއްގައި މަގާމުން ދުރު ކޮށްފައިވާ ސޫދާންގެ ބޮޑުވަޒީރު އަބުދުއްﷲ ހަމްދޮކު އެގައުމު އަސްކަރިއްޔާއާއެކު ވެވުނު އެއްބަސް ވުމެއްގެ ދަށުން އަބުރާ ބޮޑުވަޒީރުކަމަށް އައްޔަން ކުރުމަށް ނިންމާފައިވާ ކަމުގައި، އޭނާގެ އަރިސް ފަރާތްކާ ހަވާލާދީ ރޮއިޓާސްއިން ހާމަ ކޮށްފިއެވެ.
ހަމްދޮކްގެ ގާތް ފަރާތްތަކާ ހަވާލާދީ ރޮއިޓާސްއިން ރިޕޯޓު ކޮށްފައިވާ ގޮތުގައި އަސްކަރިއްޔާއާ އެކީ އެއްބަސްވުމަކަށް އޭނާ އައިސްފައިވަނީ، ބަޢާވާތާ ދެކޮޅަށް ސޫދާންގައި ކުރިޔަށްދާ މުޒާހިރާތަކުގައި އިތުރަށް ލޭއޮހޮރުވިގެން ދިއުން ހުއްޓުމަކަށް ގެނައުމުގެ މަގުސަދުގައެވެ. އަދި މިފަހަރު ވެވުނު މިއެއްބަސްވުމުގެ ބިންގަލަކަށް ވެގެން ދާނީ، 2019ވަނަ އަހަރު އެގައުމުގެ އަސްކަރިއްޔާއާއި މަދަނީ ފަރާތްތަކާ ދެމެދު ވެވިފައިވާ އެއްބަސްވުން ކަމުގައިވެސް މި މަސްދަރުތަކުން ބުނެފައިވާ ކަމަށްވެސް ރޮއިޓާސްއިން ހާމަ ކޮށްފައި ވެއެވެ.
ސޫދާންގެ މައިގަޑު އެއް ސިޔާސީ ޕާޓީގެ ވެރިޔަކު ރޮއިޓާސްއަށް މައުލޫމާތު ދީފައިވާ ގޮތުގައި، އެގައުމުގައި އުފެދިގެން ގޮސްފައިވާ ހަމަނުޖެހުންތަކަށް ނިމުން ގެނައުމަށްޓަކާ ބޮޑުވަޒީރު އަބުދުﷲ ހަމްދޮކް މަގާމަށް އަލުން އައްޔަން ކުރުމަށާއި އަދި ހައްޔަރު ކޮށްފައިވާ ހުރިހާ ސިޔާސީ ފަރާތްތައްވެސް ދޫކޮށްލާނެކަން އާދީއްތަ ދުވަހު އަސްކަރިއްޔާއިން ވަނީ އިއުލާން ކޮށްފައެވެ.
ހަމްދޮކް ގޭގައި ބަންދު ކޮށްފައިވަނީ ފާއިތުވެދިޔަ އޮކްޓޯބަރ މަހުގެ 25ވަނަ ދުވަހު ސޫދާންގެ އަސްކަރިއްޔާއިން ގެނައި ބަޢާވާތެއްގައެވެ. އަދި މި ބަޢާވާތާއެކު، 2019ވަނަ އަހަރު އެގައުމުގައި ދިގު މުއްދަތެއް ވަންދެން ވެރިކަން ކުރަމުންއައި އުމަރު އަލްބަޝީރުގެ ވެރިކަމަށް ނިމުން ގެނެސް، ޑިމޮކްރަސީގެ މަގަށް އެގައުމު ރުޖޫޢަ ކުރުމަށްޓަކާ ވެވުނު އިންތިގާލީ އެއްބަވުން ވަޅު ޖެހިގެން ހިގައިދާނެ ކަމުގެ ބިރުވަނީ ހީވެފައެވެ.
ބަޝީރުގެ ވެރިކަމަށް ނިމުން ގެނައުމަށްފަހު، ބާރުތައް ހިއްސާ ކުރުމަށް ވެވުނު އެއްބަސްވުމުގެ ދަށުން އެކުލަވާލެވުނު ހަމްދޮކްގެ ކެބިނެޓް އުވާލާ، އިސް މަގާމްތަކުގައި ތިބި މަދަނީ އެތައް އޮފިޝަލުންނެއް އަސްކަރިއްޔާއިން ވަނީ ހައްޔަރު ކޮށްފައެވެ.
މިހާރު ވެވިފައިވާ އެއްބަސްވުމުގެ މަޝްވަރާތަކަށް ހާޒިރުވި އުއްމާ ޕާޓީގެ ވެރިޔާ ފަދަﷲ ބުރުމާ ނާސިރު ވިދާޅުވެފައިވާ ގޮތުގައި، އަސްކަރިއްޔާއާއި މަދަނީ ޕާޓީތަކާ ދެމެދު މިފަހަރު ވެވުނު އެއްބަސްވުމުގެ ދަށުން، ހަމްދޮކް އެކުލަވާލަން ޖެހެނީ، ހަމައެކަނި ފަންނީ މީހުންގެ މައްޗަށް އެކުލެވޭ މިނިވަން ކެބިނެޓެކެވެ.
