ދިރިއުޅޭ ރަށުން ބޭރުގައި ހާފިޒުކަން ކިޔަވަން ބޭނުންވާ ދަރިވަރުންނަށް، ކޯސް ފުރިހަމަ ކުރުމަށް ބޭނުންވާ ދިރިއުޅުމުގެ ހަރަދުތައް އަންނަ އަހަރު ސަރުކާރުން ހަމަޖައްސައިދޭން ނިންމި ނިންމުމަކީ ރަނގަޅު ނިންމުމެއް ކަމުގައި ކުރީގެ އިސްލާމިކް މިނިސްޓަރ ޑރ.މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
މިމަސައްކަތް ސަރުކާރުން ފަށަން ނިންމިއިރު، ޑރ.ޝަހީމް ވަނީ ޤުރުއާން ހިތުދަސް ހާފިޒުން އުފެއްދުމުގެ ވަރުގަދަ ޕްރޮގުރާމެއް ފެށުމަށް ތައްޔާރުވެފައެވެ. އެޕްރޮގުރާމަށް ބޮޑު ތަރުހީބެއް ލިބިފައިވާއިރު، މިހާތަނަށް 500 އަށްވުގެ މީހުން ވަނީ ޕްރޮގުރާމުގައި ބައިވެރިވެފައެވެ. މިއީ މިފަދަ ބޮޑު ޕްރޮގުރާމެއް ރާއްޖޭގައި ހިންގާ ފުރަތަމަ ފަހަރަށެވެ.
ޑރ.ޝަހީމްގެ މި ޕްރޮރޮގުރާމުގެ މަސައްކަތް ފެށިތާ މަދު ދުވަސްކޮޅެއްގެ ތެރޭގައި ސަރުކާރުންވަނީ ޤުރުއާން ހިތުދަސްކުރާ ދަރިވަރުންނަށް ކޯސްފުރިހަމަ ކުރުމަށް ބޭނުންވާ ޚަރަދު ހަމަޖައްސާނެކަމަށް އިއުލާން ކުރައްވާފައެވެ. މިނިންމުމަށް މަރުހަބާ ވިދާޅުވެ ޑރ.ޝަހީމް ވިދާޅުވީ މިއާއިއެކު ސަރުކާރުން ޤުރުއާނަށް ދޭންޖެހޭ އަހައްމިއްޔަތުކަން އިތުރުކޮށް، މީގެކުރިން ކުރިއަށް ގެންދިޔަ އިންޓަރޭޝަނަލް މުބާރާތްތައް އަލުން ފަށަން ޖެހޭކަމަށެވެ. އަދި ޤުރުއާން މުުބާރާތްތަކަށް ބަޖެޓް އިތުރުކޮށް، ޤުރުއާނާއިބެހޭ މަރުކަޒުގެ ގޮފިތައްވެސް އިތުރު ކުރަންޖެހޭކަމަށެވެ.
ތިޔަ ނިންމެވުމަކީ ރަނގަޅު ނިންމެވުމެއް، އެޔާއިއެކު: ރާއްޖޭގެ އިންޓަރބޭޝަނަލް ޤުރުއާން މުބާރާތް، ޕީއެސްއެމް އަލި ގަދަ ތަރި ޤުރުއާން މުބާރާތް އަލުން ފަށައި، ޤައުމީ ޤުރުއާން މުބާރާތުގެ ބަޖެޓް އިތުރުކޮށް ޤުރުއާނާއި ބެހޭ މަރުކަޒުގެ ގޮފިތައް އަތޮޅުތަކުގައި އެކްޓިވް ކުރަންޖެހޭ. މިކަންކަމަކީ މިސަރުކާރު އައިފަހުން މަޑު ޖެހިފައިހުރި ކަންކަން.
– ޑރ.ޝަހީމް ވިދާޅުވިއެވެ.
ކީރިތި ގުރުއާނާ ބެހޭ މަރުކަޒުގެ ދަސްވެނިވުމުގެ ރަސްމިއްޔާތުގައި ވާހަކަފުޅުދައްކަވުން ރައީސް ވިދާޅުވީ ގުރުއާނާއި ދީނީ އިލްމު މިހާރަށް ވުރެ ބޮޑަށް ރާއްޖޭގައި ފެތުރުމަށްޓަކައި މި ސަރުކާރުން ހާއްސަ އިސްކަމެއްދޭނެ ކަމަށެވެ. އަދި ހާޒިފުކަން ކިޔަވަން ބޭނުންވާ ދަރިވަރުންގެ ހަރަދުތައް ސަރުކާރުން ހަމަޖައްސައިދިނުމަކީ އޭގެ ތެރެއިން ކުރައްވާނެ މަސައްކަތެއް ކަމަށް ވެސް ވިދާޅުވިއެވެ.
މި ރަސްމިއްޔާތުގައި ރައީސް ވިދާޅުވީ ކީރިތި ގުރުއާނުގެ އިލްމަކީ ވަރަށް ތަނަސްވަން ދާއިރާއަކަށް ފެތުރިފައިވާ އެއްޗެއް ނަމަވެސް، ރާއްޖޭގައި އެ އިލްމުތަކުގެ ބޭނުން އެންމެ ރަނގަޅަށް ހިފޭތަން އަދިވެސް ފެނިވަޑައިނުގަންނަވާ ކަމަށެވެ. ހަމައެކަނި ގުރުއާން ޓީޗަރުންނާއި ހާފިޒުންނާއި އަދި އިމާމުން އުފެއްދުމަށް ވުރެ، ކީރިތި ގުރުއާނާ ބެހޭ މަރުކަޒުގެ ދައުރު ވެސް މިހާރު މާ ބޮޑަށް ފުޅާކުރަން ވެއްޖެ ކަމަށް ވެސް ރައީސް ވިދާޅުވިއެވެ.
ގުރުއާނާ ބެހޭ މަރުކަޒެއް ހުރުމުގެ ހަގީގީ ފައިދާ ލިބޭނީ މި އިލްމުގެ ދާއިރާ ފުޅާ ކުރެވިގެން ކަމަށާއި މި ސަރުކާރުން ގުރުއާނާ ބެހޭ މަރުކަޒު މިހާރު ވުރެ ކުރިއަރުވައި، ދީނީ އިލްމު ރާއްޖޭގައި ފެތުރުމަށް ކުރަން ޖެހޭ ހުރިހާ ކަމެއްގައި އެހީތެރިވެދޭނެ ކަމުގެ ޔަގީން ވެސް ރައީސް ދެއްވިއެވެ.
