ކެޔޮޅުންގެ އެވޯޑަށް ކުރިމަތިލުމުގެ ފުރުސަތު އިތުރުކޮށްފިއެވެ.
އެންމެ ޚިދުމަތްތެރި ޒުވާން ކެޔޮޅަށް ޝަރުތު ފުރިހަމަވާ ފަރާތްތަކުން މިމަހުގެ 25 ވާ ބުރާސްފަތި ދުވަހުގެ 12:00 ގެ ނިޔަލަށް އެވޯޑަށް ކުރިމަތިލުމަށް ފޯމް ހުށައެޅުމުގެ ފުރުސަތުވަނީ ހުޅުވާލާފައެވެ. ކެޔޮޅުންގެ އެވޯޑު ދިނުމަށް ހަމަޖެހިފައިވަނީ މަސްވެރިންގެ ދުވަހުގެ ޚާއްޞަ ރަސްމިއްޔާތުގައެވެ. މިއަހަރު ފާހަގަކުރާ 41 ވަނަ މަސްވެރިންގެ ދުވަސް ފާހަގަ ކުރުމަށް ބާއްވާ ހަފްލާގައި، އާމްދަނީ ހޯދުމަށް އިތުރު މަސައްކަތެއް ނުކުރާ މާލެ އަތޮޅުން ހޮވާލެވޭ، އެންމެ ޚިދުމަތްތެރި ކެޔޮޅު ހޮވާ، އެފަރާތަށް ޚާއްސަ އެވޯޑެއް ދޭނެކަމަށް ފިޝަރީޒް މިނިސްޓްރީން ބުންޏެވެ.
ފިޝަރީޒް މިނިސްޓްރީން ބުނީ މިދިޔަ މަހުގެ17 ވަނަ ދުވަހު ކުރި އިއުލާނުގެ މުއްދަތުގައި އެކަށީގެންވާ ޢަދަދަށް ކެޔޮޅުން ކުރިމަތިލާފައި ނުވުމުން، މި އެވޯޑަށް އެދި ހުށައެޅުމުގެ ފުރުސަތު މިމަހުގެ 25 ވަނަ ދުވަހާއި ހަމައަށް އިތުރުކޮށްފައިވާ ކަމަށެވެ. އަމިއްލަ ފަރާތަކުން ނުވަތަ އެހެން ފަރާތަކުންވެސް ނަން ހުށަހެޅުމުގެ ފުރުސަތު ހުޅުވާލާފައިވާ ކަމަށް މިނިސްޓްރީން ހާމަކުރެއެވެ. މި އެވޯޑަށް ހުށަހެޅުމަށް ބޭނުންވާ ފޯމާއި ކުރައިޓީރިޔާ ފިޝަރީޒް މިނިސްޓްރީގެ ވެބަސައިޓުން ލިބޭނެ ކަމަށްވެސް ފިޝަރީޒް މިނިސްޓްރީ ބުންޏެވެ.
މަސްވެރިންގެ ދުވަހަކީ ކޮންމެ އަހަރެއްގެ ވެސް ޑިސެމްބަރު މަހުގެ 10ވަނަ ދުވަހެވެ. މިއަހަރުގެ މަސްވެރިންގެ ދުވަސް ރަސްމީކޮށް ފާހަގަކުރުމަށް ހަމަޖެހިފައިވަނީ ކ.ގާފަރުގައެވެ.
