ދިވެހި ސަރުކާރާއި އިންޑިއާ ސަރުކާރާއި ދެމެދު ހަދާފައިވާ އެއްބަސްވުންތަސް ހާމަކޮށް އެކަންކަމުގެ މައުލޫމާތު ދިވެހި ރައްޔިތުންނާއި ހިއްސާ ކުރުމަށް އެމްޑީޕީގެ ޗެއާޕާސަން ހަސަން ލަތީފް ގޮވާލެއްވި ގޮވާލުމަކީ ރައްޔިތުންގެ އިތުބާރު ސަރުކާރަށް ހޯދުމަށް ދެއްކެވި ވާހަތަކެއް ކަމުގައި ކުރީގެ ބަންޑާރަ ނައިބް ދިޔާނާ ސައީދު ވިދާޅުވެއްޖެއެވެ.
އިދިކޮޅު ކޯލިޝަނުން ރާއްޖޭގެ އެކި ކަންކޮޅުތަކުގައި ކުރަމުންދާ މުޒާހަރާތަކާއި އެއްވުންތަކުގެ މައުލޫމާތު ބައިނަލް އަގުވާމީ ފަރާތްތަކުގެ ސަމާލުކަމަށް އައިސް އެވާހަތައް ދައްކަމުންދާއިރު ސަރުކާރުން އޮތީ ހަމަހިމޭނުންނެވެ. މިމައްސަލަގައި ހަސަން ވަނީ ރައްޔިތުންގެ ކަންބޮޑުވުން ހުރި ކަންކަން ހާމަކޮށް އެކަމުގެ ތެދުގޮދު ރައްޔިތުންނާއި ހިއްސާ ކުރެއްވުމަށް ސަރުކާރަށް ގޮވާލާފައެވެ.
ހަސަންގެ ވަހަތަކަށް ތާއީދު ކުރައްވާ އުޘްތާޒު ދިޔަނާ ކުރެއްވި ޓްވީޓުގައި ވިދާޅުވީ ޤާނޫނީ ފަންނުގެ ބޭފުޅުން އާންމުކޮށް ޓްރާސްޕޭރެންސީއަށް ބާރުއަޅުއްވާނެކަމަށެވެ. އެއީ އެއްގޮތަކަށްވެސް ސަރުކާރަށް ފާޑުވިދާޅުވެ ސަރުކާރަށް ޖެއްސުން ކުރުން ނޫންކަމަށާއި، ހަސަންގެ ވާހަކަތަކަކީވެސް ސަރުކާރަށް ރައްޔިތުންގެ އިތުބާރު ހޯދައި، އެމަގަށް ބާރު އެޅުއްވުންކަމަށެވެ.
ޤާނޫނީ ފަންނުގެ ބޭފުޅުން އާންމުކޮށް ޓްރާސްޕޭރެންސީއަށް ބާރުއަޅުއްވާނެ. އެއީ ފަންނުގެ ޑިސިޕްލިން، އެއްގޮތަކަށްވެސް ސަރުކާރަށް ފާޑު ވިދާޅުވުމެއް ނޫން. އުސްތާޒު ހަސަން ލަތީފްގެ ޓްވީޓުން ފެންނަނީ ރައްޔިތުންގެ އިތުބާރު ސަރުކާރަށް ހޯދާ ފުޅާކުރުމުގެ މަގަށް ބާރު އަޅުއްވާތަން. ވަރަށް ރަނގަޅު.
– ދިޔާނާ ވިދާޅުވިއެވެ.
އިންޑިއާއާއިއެކު ދިވެހި ސަރުކާރުން ވެފައިވާ އެއްބަސްވުންތައް ހާމަކުރުމަށް ގޮވާލައި ހަސަން ލަތީފް ވިދާޅުވީ ރައްޔިތުންގެ ހިތުގައި ޝައްކު އުފެދޭ ހުރިހާ އެއްބަސްވުނަތަކެއް ހާމަކޮށް، އެއްބަސްވުންތަކުގައި ހުރި ކަންކަން ދިވެހި ރައްޔިތުންނަށް ހާމަކޮށް ދިނުމަކީ ސަރުކާރުގެ ޒިންމާއެއްކަމަށެވެ.
އެއްވެސް އެއްބަސްވުމެއް ފޮރުވައިގެން ސިއްރުކުރަން ނޫޅޭކަމާއި، އަދި އިންޑިއާއާއިން ހޯދަމުންދަނީ ކޮން ބާވަތްތަކުގެ އެހީތަކެއްކަމެއް ދިވެހި ރައްޔިތުންނަށް ހާމަކޮށްދޭންޖެހޭ ކަމަށްވެސް ހަސަން ވިދާޅުވިއެވެ. މިއީ ވެރިކަން ކުރާ ކޯލިޝަން އަދި އެމްޑީޕީގެ އިސްބޭފުޅަކު މިހާ ފާޅުކަން ބޮޑުކޮށް އެއްބަސްވުންތައް ހާމަކުރުމަށް ސަރުކާރަށް ގޮވާލި ފުރަތަމަ ފަހަރެވެ.
އިންޑިއާއާއިއެކު ދިވެހި ސަރުކާރުން ހަދާފައިވާ އެއްބަސްވުންތަކުގައި ރާއްޖޭގެ ސަލާމަތަށް ނުރައްވާ އެތައްކަމެއް ހުރިކަމަށް ބުނެ އިދިކޮޅު ފަރާޓްތަކުން ދަނީ އެއްބަސްވުނަތައް ހާމަ ކުރުމަށް ގޮވާލަމުންނެވެ. އަދި ރާއްޖޭގެ އެކި ސަރަހައްދު ތަކުގައި ތިބި އިންޑިއާގެ އަސްކަރީ ސިފައިން ވަގުތުން ބޭލުމަށްވެސް އިދިކޮޅު ފަރާތްތަކުން ދަނީ ގޮވާލަމުންނެވެ.
