ކަރަންޓު ބިލު ހެދުމަށް ގޭބިސީތަކުން ރީޑިންގ ނެގުމާއެކު ބިލަށް ފައިސާ ދައްކަންޖެހޭ މިންވަރު އަންގައިދޭ ޚިދުމަތެއް ފެނަކަ ކޯޕަރޭޝަނުން ތަޢާރަފްކޮށްފިއެވެ.

މިކަމަށްޓަކައި ގދ. ފަރެސްމާތޮޑާގައި ބޭއްވި ރަސްމިއްޔާތެއްގައި "ފެނަކަ ބިލް ޕޭ"ގެ ނަމުގައި ފައިސާ ދައްކާ އެޕްލިކޭޝަން އިފްތިތާޙްކޮށްދެއްވީ މިނިސްޓަރ އޮފް ހެލްތު އަޙްމަދު ނަސީމާއި މިނިސްޓަރ އޮފް ނޭޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރ މުޙައްމަދު އަސްލަމްއެވެ.

ފެނަކައިން ވިދާޅުވީ ފެނަކަ ބިލް ޕޭ މެދުވެރިކޮށް ރީޑިންގ ނެގުމާއެކު ބިލަށް އަރާވަރު ވަގުތުން އެނގޭނެ ކަމަށާއި އެއާއެކު އެޕްލިކޭޝަން މެދުވެރިކޮށް ވަގުތުން ފައިސާދެއްކޭނެކަމަށެވެ. މީގެ ސަބަބުން ބިލުގައި ދިމާވާ މައްސަލަތައް ފަސޭހަ ކަމާއެކު ދެނެގަނެވި މައްސަލަ ޙައްލުކުރުމަށް އަވަސް ފިޔަވަޅުތަކެއް އެޅޭނެކަމަށެވެ. އަދި ބިލަށް އަރާވަރުގެ ތަފްސީލު އެނގިގެންދާނެކަމަށްވެސް ފެނަކައިން ވިދާޅުވެއެވެ.

ރައްޔިތުމީހާގެ އަތަށް ވަގުތުން ބިލް ހަވާލުކުރެވޭ ޚިދުމަތް ދޭން ފެށުން ރަސްމީކޮށް އިފްތިތާޙް ކޮށްދެއްވައިފި. pic.twitter.com/uJ499ZR7Fe

— Fenaka Corporation Ltd (@TeamFenaka) November 13, 2021

ފެނަކައިން ވިދާޅުވީ އެ އެޕްލިކޭޝަން ތައާރަފް ކުރެވުމާއެކު، ބިލު ޕްރިންޓު ކުރުމަށް ފެނަކައިން ކުރާ ހަރަދު އެތައް ގުނައެއް ދަށް ކުރެވޭނެ ކަމަށެވެ. އެގޮތުން، ރީޑިންގ ޑިވައިސް މެދުވެރިކޮށް ނެގޭ ބިލުތަކަކީ ތާމަލް ޕްރިންޓް ކުރެވޭ ބިލުތަކެއް ކަމަށާއި، އޭގެ ސަބަބުން ޕްރިންޓު ކުރަން ހޭދަވާ ހަރަދު ކުޑަ ކުރެވޭނެ ކަމަށެވެ.

އަދި އެ ކުންފުނީގެ އަމާޒަކީ ފަންނީ ގާބިލު މުވައްޒަފުންނާއެކު ހިދުމަތުގެ ފަހަތުން ރައްޔިތުމީހާ ދުވާ ދުވުން ހުއްޓުމުން ކަމަށް ފެނަކައިން ބުންޏެވެ. އަދި ފެނަކައިން ހޯދަމުންދާ ކާމިޔާބީ ގުޅިފައި ވަނީ ތަހުޒީބު މުޖުތަކައަލަށް ފެތޭ ގޮތަށް، ޓެކްނޮލިޖީއާއި ޒަމާނީ ވަސީލަތްތަލަތްތައް ބޭނުންކޮށް، މުވައްޒަފުންގެ މަސައްކަތްކަތައް އިތުރަށް ލުއި ފަސޭހަކަން ލިބި، ހިދުމަތް ފޯރުކޮށްދިނުމުގައި ހޭދަވާ ވަގުތު ސަލާމަތް ކުރުމަށް ކަމަށެވެ.

ފެނަކައިން ފޯރުކޮށްދޭ ޚިދުމަތަކީ ޒަމާނީ ޓެކްނޮލޮޖީގެ އެހީގައި ދެވޭ ޚިދުމަތަކަށް ހަދާ، ފެނަކަ މުވައްޒަފުންނަކީ މިކަމަށް ހޭނިފައިވާ ބަޔަކަށް ހެދުމަށް އެކުންފުނިން އަންނަނީ މަސައްކަތްކުރަމުންނެވެ. މީގެ އެންމެ ބޮޑު ބޭނުމަކީ ރައްޔިތުންނަށް ފޯރުކޮށްދޭ ޚިދުމަތަކީ ލުއިފަސޭހަ އަދި ޚިދުމަތް ފޯރުކޮށްދިނުމަށް ހޭދަވާ ވަގުތު ސަލާމަތްކުރުމަށް ކަމަށް ފެނަކައިން ވިދާޅުވެއެވެ.