އަފްއާނިސްތާނުގައި އެމެރިކާގެ މަސްލަހަތުތައް ތަމްސީލު ކޮށްދޭނީ ގަތަރުކަމަށް އެމެރިކާ އަދި ގަތަރުން އެއްބަސް ވެފައިވާކަމަށް، އެމެރިކާގެ އިސް އޮފިޝަލަކު ރޮއިޓާސްއަށް މައުލުމާތު ދީފިއެވެ. އޮފިޝަލު ރޮއިޓާސްއަށް މައުލޫމާތު ދެމުން ބުނެފައިވަނީ، މިއީ 20 އަހަރުވީ ހަގުރާމައަށްފަހު، ކާބުލްއާއެކީ ސީދާ މުއާމަލާތުތައް ފެށުމަށް އެމެރިކާ ބޭނުންވާ ކަމުގެ ސިގްނަލެއް ކަމުގައެވެ.
މިގޮތުން، ވޮޝިންގޓަންއާއި ތާލިބާން ސަރުކާރާ ދެމެދު ރަސްމީ މުޢާމަލާތުތައް ފެށުމަށް މަގުފަހި ކުރުވުމުގެ ގޮތުން، "ބާރުތައް ހިމާޔަތްކުރާ ފަރާތު"ގެ ހައިސިއްޔަތުން އަފްއާނިސްތާނުގައި އެމެރިކާ ތަމްސީލުކުރުމުގެ މަސްއޫލިއްޔަތު އަދާކުރަން ފެށުމުގެ ގޮތުން، މިހަފްތާގެ ހުކުރު ދުވަހު، އެމެރިކާއާއި ގަތަރާ ދެމެދު އެއްބަސްވުމެއްގައި ސޮއި ކުރުމަށް ވަނީ ހަމަޖެހިފައެވެ.
އަފްއާނިސްތާނުގައި މިހާރު އޮތް ތާލިބާން ސަރުކާރު އެމެރިކާއިން ގަބޫލު ކޮށްފައެއް ނުވެއެވެ.
އަފްއާނިސްތާނުގައި އެމެރިކާ ތަމްސީލު ކުރުމަށްޓަކާ ގަތަރާއެކީ އެމެރިކާއިން އެއްބަސްވުމެއްގައި ސޮއި ކޮށްފައި މިވަނީ، 20 އަހަރު ދުވަހުގެ އަހުލީ ހަގުރާމައަށްފަހު އަފްއާނިސްތާނުގައި މިހާރު ވެރިކަން ކުރަމުންދާ ތާލިބާން ސަރުކާރާއެކީ ގުޅުން ދެމެހެއްޓުމަށް ހުޅަނގުގެ ގިނަ ގައުމުތަކަށް ސިޔާސަތުތަކެއް އެކުލަވާލެވިފައި ނުވަނިކޮށެވެ.
އެމެރިިކާގެ އިތުރުން ޔޫރަޕްގެ ގިނަ ގައުމުތަކުންވެސް އަފްއާނިސްތާނުގައި އޮތް ތާލިބާން ސަރުކާރު ބަލައިގެންފައެއް ނުވެއެވެ. ގިނަ ގައުމުތަކުން ބުނަމުންދަނީ، ހުރިހާ ދަރިކޮޅެއްގެ މީހުން ބައިވެރިކޮށްގެން ވެރިކަން ކުރުމަށާއި އަދި އަންހެނުން ބާކީ ނުކުރާނެކަމަށް ތާލިބާނުން ވެފައުވާ ވައުދުތައް އެ ޖަމާއަތުން ފުއްދަމުން ނުދާކަމުގައެވެ.
ބައެއް މީޑިއާތަކުން ރިޕޯޓު ކޮށްފައިވާ ގޮތުގައި ހުކުރު ދުވަހު، ގަތަރުގެ ފޮރިންގ މިނިސްޓަރު މުހައްމަދު ބިން އަބުދުއްރަހުމާން އަލް ތާނީއާއެކު ބޭއްވުމަށް ހަމަޖެހިފައިވާ ނޫސްވެރިންގެ ބައްދަލުވުމުގައި އެމެރިކާގެ ސެކެޓްރީ އޮފް ސްޓޭޓް އެންތަނީ ބްލިންކަން މިއެއްބަސްވުން އިއުލާން ކުރައްވާނެއެވެ.
31 ޑެސެމްބަރުގައި އަމަލްކުރަން ފެށުމަށް ހަމަޖެހިފައިވާ މި އެއްބަސްވުމުގައި ވާގޮތުން، އަފްއާނިސްތާނުގައި ހުންނަ ގަތަރު އެމްބަސީގެ ބައެއް މުވައްޒަފުން، އެމެރިކާގެ މަސްލަހަތުތައް ހިމެނޭ ކަންކަމުގައި އަފްއާނިސްތާނުގައި މަސައްކަތް ކުރާނެއެވެ. އަދި މި މުވައްޒަފުން، އެމެރިކާގެ ސްޓޭޓް ޑިޕާޓްމަންޓާ އަދި ދޯހާގައި ހުންނަ އެމެރިކާގެ މިޝަންއާއި މުޢާމަލާތު ކުރަމުން ދާނެއެވެ.
އެމެރިކާގެ އޮފިޝަލުން އިތުރަށް ބުނެފައިވަނީ، އެމެރިކާއިން، ގަތަރުގެ ކެޕިޓަން ދޯހާ މެދުވެރިކޮށް ތާލިބާން ޖަމާއަތާ ގުޅުން ދަމަހައްޓަމުން ދާނެއެވެ. ދޯހާއަކީ، މިހާތަނަށް އެތައް އަހަރެއް ވަންދެން ތާލިބާން ޖަމާއަތުން އެ ޖަމާއަތުގެ ސިޔާސީ އޮފީސް ދަމަހައްޓަމުން އައި ތަނެވެ.
