އިދިކޮޅު ކޯލިޝަންގެ ލީޑަރޝިޕުން މަސައްކަތް ކުރަމުންދަނީ ކުރީގެ ރައީސް އަދި ޕީޕީއެމްގެ ރައީސް އަބްދުﷲ ޔާމީން އަބުރައި ޖަލަށް ގެންދިއުމަށް ކަމަށް ފޭދޫ ދާއިރާގެ މެމްބަރު މުހައްމަދު ނިހާދު ވިދާޅުވެއްޖެއެވެ.
އިދިކޮޅު ކޯލިޝަނުން ގެންދަނީ މާލެއާއި ރާއްޖޭގެ އެކި ކަންކޮޅުތަކުގައި ސަރުކާރާއި ދެކޮޅަށް ގިނަ ހަރަކާތްތައް ހިންގަމުންނެވެ. އެގޮތުން ބޮޑެތި ހިނގާލުންތަކާއި، އެއްވުންތަކާއި، ޖަލްސާތައްވެސް ދަނީ ބާއްވަމުންނެވެ. އިދިކޮޅުގެ ހަރަކާތްތަކާއި ގުޅިގެން ނިހާދު ވިދާޅުވީ އިދިކޮޅުގެ ލީޑަރޝިޕްގައި ތިއްބެވި ބޭފުޅުން ގެންދަނީ ވަރަށް ރޭވުންތެރިކަމާއިއެކު ރައީސް ޔާމީން ޖަލަށް ބަދަލު ކުރުމަށް މަސައްކަތް ކުރަމުންކަމަށެވެ.
މިމަސައްކަތުގައި އިސްކޮށް ހަރަކާތްތެރިވަނީ، އިދިކޮޅު ކޯލިޝަންގެ ހިންގުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުﷲއާއި، މާލެ ސިޓީ ކައުންސިލްގެ މޭޔަރ ޑރ.މުއިއްޒުގެ އިތުރުން ރައީސް ޔާމީންގެ ޤާނޫނީ ވަކީލް ޑރ.ޖަމީލްކަމަށް ނިހާދު ވިދާޅުވިއެވެ. މިބޭފުޅުން އިސްކޮށްތިބެ ރައީސް ޔާމީން ގެއަށް ބަދަލުކުރުމުން ހަރަކާތްތަށް އިތުރުކޮށް، މީގެ ކުރިން ނުޖައްސާވަރަށް ހަރަކާތްތައް އިތުރު ކޮށްފައިވަނީ އަލުން އަނބުރައި ރައީސް ޔާމީން ޖަލަށް ގެންދިއުމަށް ކަމަށް ނިހާދު ވިދާޅުވިއެވެ.
ރައީސް ޔާމީން ޖަލަށް ފޮނުވާލުމުގެ މާސްޓަރ ޕްލޭނެއްގެ ދަށުން މުއިއްޒުއާއި ޖަމީލް އަދި އަދުރޭ ގުޅިގެން މަސައްކަތްތަކެއް ފަށައިފި! ރައީސް ޔާމީން ޖަލުގައި އޮތްއިރު ހަރަކާތްތައް ނުޖައްސާ ފިލާތިބީ! ގޭގަ މާގިނަ ދުވަސް ވާއިރަށް ހަރަކާތްތައް ފުޅާކޮށް ވަރުގަދަ ކުރަންފެށީ ޖަލަށް ފޮނުވާލަން.
– ނިހާދު ވިދާޅުވިއެވެ.
އިދިކޮޅު ކޯލިޝަނުން ވަނީ މިއަދުވެސް މާލޭގައި ބޮޑު ހިނގާލުމެއް ބާއްވާފައެވެ. މިހިނގާލުން ނިންމާލިއިރު، ރައީސް ޔާމީންވަނީ އެއްވުމުގެ ބައިވެރިންނަށް ފެނިލާފައެވެ. އިދިކޮޅު ކޯލިޝަނުން ގެންދަނީ ސަރުކާރު ޖަވާބު ދާރީކޮށް ޒިންމާދާރުކުރުމަށް އިތުރު ކުރުމަށް ގިނަ ހަރަކާތްތަކެއް ހިންގަމުންނެވެ.
