މިއަހަރަށް މަޖިލީހުން ފާސްކޮށްފައިވާ ބަޖެޓުން އިތުރަށް ކޮށްފައިވާ ޚަރަދުތަކަކީ ޤާނޫނު އަސާސީއާއި ޚިލާފަށް ކޮށްފައިވާ ޚަރަދުތަކެއް ކަމުގައި ނެޝަނަލް ޓެންޑާ ބޯޑުގެ ޗެއާމަން އިސްމާއިލް ޒަރިޔަންދު ވިދާޅުވެއްޖެއެވެ.

ޒަރިޔަންދު މިފަދައިން ވިދާޅުވީ 2022 ވަނަ އަހަރަށް ލަފާކޮށް ދައުލަތުން ހުށަހަޅާފައިވާ ބަޖެޓާއި ގުޅިގެން މެމްބަރުން ދައްކަވަމުންދާ ވާހަތަކަށް އިޝާރާތް ކުރައްވައެވެ. ޒަރިޔަންދު ވިދާޅުވީ މެމްބަރުން މަޖިލީހުގައި ވާހަކަ ދައްކަވަނީ ބަޖެޓަށް ނުބަލައި ކަމަށެވެ. ބަޖެޓުގައި ޤާނޫނު އަސާސީއާއި ޤާނޫނު ތަކާއި ޚިލާފަށް ކަންކަން ހުރިއިރު އެކަންކަމަށް ރިޢާޔަތް ނުކުރާކަމަށެވެ.

މިހިނގާ 2021 ވަނަ އަހަރަށް ފާސްކޮށްފައިވަނީ 34,922.7 ބިލިޔަން ރުފިޔާގެ ބަޖެޓެކެވެ. ނަމަވެސް މިއަހަރު ނިމުމާއި ހަމައަށް 37,167.7 ބިލިޔަންގެ ޚަރަދު ހިނގާނެކަމަށް ފިނޭންސް މިނިސްޓްރީން އަންނަ އަހަރަށް ލަފާކޮށް ފޮނުވި ބަޖެޓް ފޮތުގައި ވަނީ ބުނެފައެވެ. މިފައިސާ 2021 ވަނަ އަހަރުގެ ބަޖެޓު ސަޕްލިމަންޓްކުރުމަށް މި ބަޖެޓާއިއެކު ވަނީ ހުށަޅާފައެވެ.

ނަމަވެސް ޤާނޫނު އަސާސީގެ 96 ވަނަ މާއްދާގެ (ނ) ގައި ބުނެފައިވަނީ ރައްޔިތުންގެ މަޖިލީހުން ހުއްދަ ލިބިގެން މެނުވީ ރައްޔިތުންގެ މަޖިލީހުން ފާސްކޮށްފައިވާ ބަޖެޓުގައިވާ މިންވަރަށް ވުރެއް ޚަރަދު އިތުރުކޮށްގެން ނުވާނެކަމަށެވެ. އަދި ބަޖެޓުގައި ވަކި ކަމަކަށް ޚަރަދެއް ކުރުމަށް ކަނޑައަޅައިފައިވާ ނަމަ އެޚަރަދެއް ކުރަންވާނީ އެކަމަކަށް އެކަނި ކަމަށެވެ.

މަޖްލިސް މެމްބަރުން ބަޖެޓަށް ނުބަލާ އަނގަތެޅުން. ބަޖެޓް 2022 ފޮތުގެ ސަފްޙާ 72 ން އިޢުތިރާފްވަނީ، މި އަހަރަށް ފާސްކުރި ބަޖެޓްގައި ނެތްޚަރަދެއް ކުރުމުން، ފާސްކުރިބަޖެޓަށްވުރެ އިތުރަށް 2 ބިލިޔަނެއްހާ ރުފިޔާ ޙަރަދުވާނެ ކަމެވެ. މިއީ ޤާނޫނު އަސާސީ ގެ މާއްދާ 96(ނ) އާއި ޚިލާފުވުމެވެ.

– ޒަރިޔަންދު ވިދާޅުވިއެވެ.

ބަޖެޓަށް އިތުރުކުރި ބައި މަޖިލީހަށް ހުށަހަޅަންޖެހޭ މުއްދަތުގައި ހުށަނާޅައި މިއަހަރުގެ ބަޖެޓާއިއެކު ހުށަހެޅުމަކީ ކަނޑައެޅިގެން ޤާނޫނު އަސަސީއާއި ޚިލާފަށް ކޮށްފައިވާކަމެއްކަމަށް ޒަރިޔަންދު ވަނީ ވިދާޅުވެފައެވެ. ބަޖެޓްގެ މަހުސް މަރުހަލާ މަޖިލީހުގައި ކުރިއަށްދާއިރު މިކަމަށް ރިޢާޔަތްކޮށް މެމްބަރުން މާބޮޑަށް ވާހަކަ ދައްކަވާފައި ނުވެއެވެ. މެމްބަރުންގެ ޝައުގުވެރިކަން ހުރީ އެމެމްބަރެއް ނިސްބަތްވާ ދާއިރާއަކަށް ބޭނުންވާ ކަންކަން ނުވެ ލަސްވުމާއި ބަޖެޓުގައި އެކަންކަން ނެތުމެވެ.

އަންނަ އަހަރަށް ލަފާކޮށް ސަރުކާރުން ހުށަހަޅާފައިވަނީ 37 ބިލިޔަން ރުފިޔާގެ ޕްރޮގްރާމް ބަޖެޓެކެވެ. އަންނަ އަހަރަށް ހުށަހެޅި ބަޖެޓަކީ ސަރުކާރުގެ ވައުދުތައް ފުއްދުމަށާއި، ތަރައްޤީގެ ގިނަ ކަންތައްތަކެއް އެކުލެވޭގޮތަށް ހުށަހަޅުއްވާފައިވާ ބަޖެޓެކެވެ.