ކޮޕް26 ގައި ބައިވެރިވާ ހުވަދޫ އެއިޑުގެ ޓީމުން ކްލައިމެޓް ވަލްނަރަބަލް ފޯރަމްގެ އެމްބެސެޑާރ ކުރީގެ ރައީސް, މުހައްމަދު ނަޝީދާއި އަދި އެންވަޔަރމެންޓް މިނިސްޓާރ އާމިނަތު ޝައުނާއާއި ބައްދަލު ކޮށްފިއެވެ. ވަކިވަކިން ބޭއްވި މިބައްދަލުވުންތަކުގައި ހުވަދޫ އެއިޑުން ކޮޕް26 ގައި ކުރާ މަސައްކަތްތަކާއި, ހުވަދޫ އެއިޑްގެ ޕްރޮގްރާމްތަކާއި އަދި ކްލައިމެޓް ފައިނޭންސްގެ ތެރެއިން ކޮމިޔުނިޓީ ބޭސްޑް ޕްރޮގްރާންތަކަށް އެހީތެރިކަން ހޯދޭނެ ގޮތްތަކާއި ގުޅޭގޮތުން މަޝްވަރާ ކުރެވުނެވެ.

ނަޝީދާއި އެކުބޭއްވުނު ބައްދަލުވުމުގައި މަޝްވަރާކުރެވުނު ކަންތައްތަކުގެ ތެރޭގައި ކްލައިމެޓް ޗޭންޗުގެ ސަބަބުން އަންހެނުންނަށް ކުރާ އަސަރަރު ކުޑަކުރުމަށް ކުރެވިދާނެ މަސައްކަތްތަކާއި ގުޅޭގޮތުންނާއި ކްލައިމެޓް އެޑަޕްޓޭޝަންގެ ދާއިރާއިން ރާއްޖެއަށް ހުރި ފުރުސަތުތަކާއި ގުޅޭގޮތުން މަޝްވަރާކުރެވުނެވެ. މިދާއިއިން ހުވަދޫ އެއިޑާއި މަދަނީ ޖަމްއިއްޔާތަކުން ކުރާ މަސައްކަތްތަކަށް އެހީތެރިވުމަށް ކޮޕް26 ގައި ކުރެވެންހުރި މަސައްކަތްތައް ކުރައްވާނެ ކަމަށް ވިދާޅުވެ ހުވަދޫ އެއިޑްގެ ޓީމަށް  ރައީސް ނަޝީދު ހިއްވަރު ދެއްވިއެވެ. ހުވަދޫ އެއިޑްގެ ޑެލިގޭޝަންގައި މޯލްޑިވްސް ފެމިލީ ފައުންޑޭޝަނާއި ސައުތުހުވަދޫ ޕާޓްނާސްގެ މެންބަރުން ހިމެނެއެވެ,

މީގެ އިތުރުން ކޮޕް 26 ގައި ބައިވެރިވާ ހުވަދޫ އެއިޑްގެ  ޓީމުންވަނީ އެމެރިކާގެ ގެރެޓްނާ ސިޓީގެ މޭޔަރ ބެލިންޑަރ ސީ ކޮންސްޓެންޓް އަދި ގްރީންވިލް ސިޓީގެ މޭޔަރު އެރިކު ޑީ ސިމޮންސްގެ އިތުރުން ބައެއް ބައިނަލް އަގުވާމީ ޖަމްއިއްޔާތަކުގެ ޑެލިގޭޓުންނާއިވެސް ބައްދަލުކޮށް މަޝްވަރާތައް ބާއްވާފައެވެ.

ސްކޮޓްލެންޑްގައި މިމަހު 1 އިން 12 އަށް ކުރިއަށްދާ އދ. ގެ ކުލައިމެޓް ޗޭންޗްޖް ކޮންފަރެންސް، ކޮޕް 26 ގައި ހުވަދޫ އެއިޑްގެ ޓީމަކުން ދަނީ ބައިވެރި ވަމުންނެވެ.  މިދަތުގެ ތެރެއިން ވޯލްޑް ބަޔޯޑައިވާސިޓީ ސަމިޓް 2021، ޕީޕަލްސް ސަމިޓް ފޮރ ކްލައިމެޓް ޖަސްޓިސް، ވޯލްޑް ކްލައިމެޓް ސަމިޓް 2021- ދި އިންވެސްޓްމެންޓް ކޮޕް ގެ އިތުރުން ކެޕޭސިޓީ ބިލްޑިންގ ހަބްގެ ޕްރޮގްރާމްތަކާއި ކްލައިމެޓް އެކްނަން ނެޓްވޯކުން ބާއްވާ ބައެއް ސައިޑް އިވެންޓްތަކުގައި ހުވަދޫ އެއިޑްގެ ޓީމުން ބައިވެރިވުމަށް ވަނީ ހަމަޖެހިފައެވެ.

އަދި ކްލައިމެޓް ޗޭންޖުގެ ސަބަބުން ކުދި ޖަޒީރާ ގައުމުތަކަށް ދިމާވޭފައިވާ މައްސަލަތަކަށް ސަމާލުކަން ހޯދައި މިފަދަ މައްސަލަތަކުން އަރައިގަތުމަށް ކުރެވޭ މަސައްކަތްތަކުގައި ބޮޑެތި ގައުމުތަކާއި، އެހީދޭފަރާތްތަކާއި، ބައިނަލް އަގުވާމީ ޖަމާއަތްތަކުގެ އެހީތެރިކަން ހޯދުމަށް އެކިފަރާތްތަކާއި އެކު ގުޅިގެން މަސައްތްކުރާނެއެވެ. ހުވަދޫ އެއިޑްގެ ޕްރޮގްރާމްތަކަށް ބޭންވާ މާލީ، އަދި ފަންނީ އެހީތެރިކަން ހޯދާ. އެކިފަރާތްތަކާއި ގުޅުން ބަދަހިކުރުމަށް މިސަމިޓްގެ ތެރޭގައި މަސައްކަތްކުރާނެ ކަމަށް ހުވަދޫ އެއިޑްއިން މައުލުމާތު ދިފައި ވެއެވެ.

މީގެ ތެރޭގައިމިގޮތުން ހޯޑެއްދޫގައި ނޭޗަރ ޕާކެއް ތަރައްގީކުރުމަށް ހޯޑެއްދޫ ކައުންސިލާއި އެކު ސޮއިކޮސްފައިވާ އެގްރީމެންޓްގެ ދަށުން ކުރަންޖެހޭ މަސައްކަތްތަކަށް އެހީތެރިކަން ހޯދުން ހިމެނޭކަމަށްވެސް ހުވަދޫ އެއިޑްއިން މައުލޫމާތު ދީފައި ވެއެވެ. މިސަމިޓްގައި ހުވަދޫ އެއިޑްގެ ފަރާތުން ބައިވެރިވާ 4 އޮފިޝަލުންގެ ޚަރަދު ހަމަޖައްސާފައިވަނީ ޔޫ.އެން.ޑީ.ޕީ އާއި، އެސް.ޓީ.އޯ އަދި ހެޔޮއެދޭ ފަރާތްތަކުގެ އެހީތެރިކަމާއި އެކުއެވެ.