ސިވިލް ސާރވިސް މުވައްޒަފުން ސިޔާސީ ހަރަކާތްތަކުގައި ބައިވެރިވާނަމަ ވަޒީފާ ގެއްލޭގޮތަށް ގެނައި އިޞްލާހު މިސަރުކާރުގެ ބޮލުގައި އަޅުވަން އުޅުނަސް ރައްޔިތުންނަށް ވާނުވާ ވަރަށް ސާފުކަމަށް ރައްޔިތުންގެ މަޖިލީހުގެ ފޭދޫ ދާއިރާގެ މެންބަރު މުޙައްމަދު ނިހާދު ވިދާޅުވެއްޖެއެވެ.

ސިވިލް ސާރވިސް ގަވާއިދަށް ގެނައި އިޞްލާހާއި ގުޅޭގޮތުން ގިނަ ބައެއްގެ ފާޑުކިޔުން އަމާޒުވެފައިވަނިކޮށް ނިހާދު ވިދާޅުވީ، ސިވިލް ސާރވިސް ޤާނޫނަށް އިޞްލާހު ގެނެސް ފާސްކުރީ 2015 ވަނަ އަހަރުކަމަށެވެ. އަދި އެކަން ކުރީ ކުއްލިއަކަށް އަވަސް އަރުވާލައިގެންކަމަށާއި، މިއަދު މުޅި އިލްޒާމް އަދުގެ ސަރުކާރު ނުވަތަ ސިވިލް ސާރވިސް ކޮމިޝަންގެ ބޮލަށް ކަނޑާލަން އުޅުނަސް ދިވެހި ރައްޔިތުންނަށް ވާނުވާ ވަރަށް ސާފުކަމަށްވެސް ނިހާދު ވިދާޅުވިއެވެ.

Civil Service Gaanoon ah Islaahu genes faas kuree 2015 Vana Aharu adhi ekan kuree kulli akah avas aruvaalaigen! Miadhu mulhi ilzaam adhuge sarukaaru nuvatha CSC bolah kandaalan ulhunas dhivehi Rayyithunnah vaanuvaa Varah Saafu!

— Feydhoo Meehaa (Mohamed Nihad) (@nihad_m) November 6, 2021

ސިވިލް ސާރވިސްގެ ޤަވާއިދަށް ގެނައި އައު އިޞްލާހުގައި ބުނެފައިވާގޮތުގައި މަސައްކަތުގެ ރަސްމީ ނުވަތަ ނުރަސްމީ ގަޑީގައިވެސްމަސައްކަތުގައި އުޅޭ އެއްވެސް ވަގުތެއްގައި، އެއްވެސް ސިޔާސީ ހަރަކާތެއްގައި ބައިވެރިވުން ވަނީ ކުށެއްގެ ގޮތުގައިކަމަށް ކަނޑައަޅައި، އެއީ ވަޒީފާއިން ވަކިކުރެވޭފަދަ ކުށެއްގެ ގޮތުގައި ބަޔާންކޮށްފައެވެ.

އަދި ސިވިލް ސާރވިސް މުވައްޒަފެއް އޭނާގެ މަގާމުގެ މަސްއޫލިއްޔަތު އަދާކުރާއިރު ވަކި ފަރާތަކަށް ޖެހި ހުންނަކަން ދޭހަވާ ފަދަ ގޮތަކަށް ނުވަތަ އެ މުވައްޒަފެއްގެ ވާޖިބުތަކާއި މަސްއޫލިއްޔަތުތަކަށް ހުރަސްއެޅޭ ފަދަ ގޮތަކަށް އެއްވެސް ސިޔާސީ ހަރަކާތެއްގައި ބައިވެރިވުން ވެސް ވަނީ ވަޒީފާއިން ވަކިކުރެވޭ ކުށެއްގެ ގޮތުގައިވެސް އައު އިޞްލާހުގައި ކަނޑައަޅައިވެއެވެ. މީގެ އިތުރުން މަގާމު އަދާކުރުމުގައި ނުވަތަ މަގާމުގެ ގޮތުން އެހެން މީހުންނަށް ހިދުމަތް ދިނުމުގައި ސިޔާސީ ފިކުރާ ގުޅުވައި ތަފާތުކުުރުން ގެންގުޅުމަކީ ވެސް ވަޒީފާއިން ވަކިކުރެވޭ ކުށެއްްގެ ގޮތުގައިވަނީ ކަނޑައަޅައިފައިވާއިރު، މި ގަވާއިދާއެކު ސިވިލް ސާވިސް މުވައްޒަފުންނަށް މަސައްކަތުގައި އުޅޭ ވަގުތު ސިޔާސީ ހަރަކާތްތަކުގައި ބައިވެރިވުމަކީވެސް މަނާކަމެއްކަމަށް ބަޔާންކޮށްފައިވެއެވެ. ނަމަވެސް މަސައްކަތު ވަގުތު ނޫން ވަގުތުތަކުގައި ސިޔާސީ ހަރަކާތްތަކުގައި ބައިވެރިވުމަށް މި ޤަވާއިދު ހުރަހެއް ނާޅައެވެ.

ސިވިލް ސާރވިސްގެ އައު އިޞްލާހާއި ގުޅިގެން ގިނަބައެއްގެ ފާޑުކިޔުން ވަނީ އަމާޒުވެފައެވެ.