ސިވިލް ސަރވަންޓުންގެ ހައްގުތަކަށް އަރައިގަރުމުގެ ސަގާފަތާ ދުރުވުން ބުއްދިވެރިކަމަށް ކުރީގެ ޕްރޮސެކިއުޓަރ ޖެނެރަލް މުހުތާޒް މުހުސިން ވިދާޅުވެއްޖެއެވެ. މުހުތާޒް މިހެން ވިދާޅުވީ، ސިވިލް ސާރވިސް މުވައްޒަފުންނަށް ސިޔާސި ހަރަކާތުގައި ބައިވެރިނުވެވޭގޮތަށް ސިވިލް ސާރވިސް ޤަވާއިދު އިޞްލާހުކުރުމާއި ގުޅިގެންނެވެ.
މުހުތާޒް ވިދާޅުވީ، ޚިޔާލު ފާޅުކުރުމުގެ މިނިވަންކަން އެއްވެސް ގަވާއިދަކުން ހަނިކުރެވިގެންނުވާނެކަމަށެވެ. އެއީ ޑިމޮކްރަޓިކް މުޖުތަމައުތައް ބަލައިގަންނަ ކަމެއްނޫންކަމަށާއި، ސިވިލް ސަރވަންޓުންގެ ހައްގުތަކަށް އަރައިގަރުމުގެ ސަގާފަތާ ދުރުވުން ބުއްދިވެރިކަމަށްވެސް އޭނާ ވިދާޅުވިއެވެ.
ޚިޔާލު ފާޅުކުރުމުގެ މިނިވަންކަން އެއްވެސް ގަވާއިދަކުން ހަނިކުރެވިގެންނުވާނެ. އެއީ ޑިމޮކްރަޓިކް މުޖުތަމައުތައް ބަލައިގަންނަ ކަމެއްނޫން. ސިވިލް ސަރވަންޓުންގެ ހައްގުތަކަށް އަރައިގަރުމުގެ ސަގާފަތާ ދުރުވުން ބުއްދިވެރި.
— Muhuthaz Muhusin???????????????? (@Muhuthaz) November 5, 2021
ސިވިލް ސާރވިސްގެ ޤަވާއިދަށް އަލަށް ގެނައި އިޞްލާހުގައިވާގޮތުން އޮފީހުގެ ރަސްމީ ގަޑީގައި ސިޔާސީ ވާހަކަދެއްކުން ވަނީ ފުރަތަމަ ދަރަޖައިގެ ކުށެއްގެ ގޮތުގައިކަމަށް ކަނޑައަޅާފައެވެ. އަދި ރަސްމީ ގަޑީގައި ސިޔާސީ ވާހަކަ ދެއްކުމާއި، ސިޔާސީ ބަހުސްކުރުން ވަނީ ދެވަނަ ދަރަޖައިގެ ކުށެއްގެ ގޮތުގައިވެސް ކަނޑައަޅާފައިވެއެވެ.
އައު އިޞްލާހުގައި ބުނެފައިވާގޮތުގައި މަސައްކަތުގެ ރަސްމީ ނުވަތަ ނުރަސްމީ ގަޑީގައިވެސްމަސައްކަތުގައި އުޅޭ އެއްވެސް ވަގުތެއްގައި، އެއްވެސް ސިޔާސީ ހަރަކާތެއްގައި ބައިވެރިވުން ވަނީ ކުށެއްގެ ގޮތުގައިކަމަށް ކަނޑައަޅައި، އެއީ ވަޒީފާއިން ވަކިކުރެވޭފަދަ ކުށެއްގެ ގޮތުގައި ބަޔާންކޮށްފައެވެ.
އަދި ސިވިލް ސާރވިސް މުވައްޒަފެއް އޭނާގެ މަގާމުގެ މަސްއޫލިއްޔަތު އަދާކުރާއިރު ވަކި ފަރާތަކަށް ޖެހި ހުންނަކަން ދޭހަވާ ފަދަ ގޮތަކަށް ނުވަތަ އެ މުވައްޒަފެއްގެ ވާޖިބުތަކާއި މަސްއޫލިއްޔަތުތަކަށް ހުރަސްއެޅޭ ފަދަ ގޮތަކަށް އެއްވެސް ސިޔާސީ ހަރަކާތެއްގައި ބައިވެރިވުން ވެސް ވަނީ ވަޒީފާއިން ވަކިކުރެވޭ ކުށެއްގެ ގޮތުގައިވެސް އައު އިޞްލާހުގައި ކަނޑައަޅައިވެއެވެ. މީގެ އިތުރުން މަގާމު އަދާކުރުމުގައި ނުވަތަ މަގާމުގެ ގޮތުން އެހެން މީހުންނަށް ހިދުމަތް ދިނުމުގައި ސިޔާސީ ފިކުރާ ގުޅުވައި ތަފާތުކުުރުން ގެންގުޅުމަކީ ވެސް ވަޒީފާއިން ވަކިކުރެވޭ ކުށެއްްގެ ގޮތުގައިވަނީ ކަނޑައަޅައިފައިވާއިރު، މި ގަވާއިދާއެކު ސިވިލް ސާވިސް މުވައްޒަފުންނަށް މަސައްކަތުގައި އުޅޭ ވަގުތު ސިޔާސީ ހަރަކާތްތަކުގައި ބައިވެރިވުމަކީވެސް މަނާކަމެއްކަމަށް ބަޔާންކޮށްފައިވެއެވެ. ނަމަވެސް މަސައްކަތު ވަގުތު ނޫން ވަގުތުތަކުގައި ސިޔާސީ ހަރަކާތްތަކުގައި ބައިވެރިވުމަށް މި ޤަވާއިދު ހުރަހެއް ނާޅައެވެ.
ސިވިލް ސާރވިސް މުވައްޒަފުން ސިޔާސީ ކަންކަމުގައި އުޅޭނަމަ ވަޒީފާ ގެއްލޭގޮތަށް ޤަވާއިދު އިޞްލާހު ކުރުމުން ބައެއް ފަރާތްތަކުން އަންނަނީ އެކަމުގެ ކަންބޮޑުވުން ފާޅުކުރަމުންނެވެ. އެއީ މިސަރުކާރު އައީ ސިޔާސީ ފިކުރުގެ ސަބަބުން ވަޒީފާގެ ބިރުދައްކައި ވަޒީފާއިން ވަކިނުކުރާނެކަމުގެ ވަޢުދާއެކުކަމަށްވާތީކަމަށް އެފަރާތްތަކުން ވަނީ ބުނެފައެވެ.
