އިގިރޭސިވިލާތުގެ ގްލަސްގޯވްގައި، ކޯޕް26 ސަމިޓްގެ ހުޅުވުމުގެ ރަސްމިއްޔާތުގައި ތަގްރީރު ކުރެއްވުމަށްފަހު، ސަމިޓްގައި އެހެން ލީޑަރުން ތަގްރީރު ކުރައްވަމުން ގެންދަވަނިކޮށް، އެމެރިގެ ރައީސް ޖޯ ބައިޑްން ސަމިޓްގެ ހޯލުގައި ނިދި ޖެހިފައި އިންނަ ވީޑިއޯއެއް އާންމުވެ، ބައިޑްންއަށް ގިނަ ބައެއްގެ ފާޑުކިއުން އަމާޒު ވެއްޖެއެވެ.
އެމެރިކާގެ ވޮޝިންގޓަން ޕޯސްޓުގެ ރިޕޯޓަރެއް ކަމުގައިވާ ޒަޗް ޕާރސަރ ބްރޮއުން އެންމެ ފުރަތަމަ ޓުވީޓު ކުރި މި ވީޑިއޯއިން ފެންނަ ގޮތުގައި، ގްލަސްގޯވްގައި ކުރިޔަށްދިޔަ، ސަމިޓް ހުޅުވުމުގެ ގޮތުން ދުނިޔޭގެ ގައުމުތަކުގެ ލީޑަރުންގެ ތަގުރީރުތައް ކުރިޔަށް ދަނިކޮށް، 20 ވަރަކަށް ސިކުންތު ވަންދެން ބައިޑްގެ ދެލޯމެރި ނިދި ޖެހިފައި އިންނެވިއެވެ.
އަދި މިގޮތުން ނިދި ޖެހިފައި އިނަންވަނިކޮށް، ބައިޑްން ލޯ ހުޅުވާފައިވަނީ، އޭނާގެ އަރިސް އެހީތެރިއަކު ކައިރިއަށް ވަޑައިގަތުމުންނެވެ. އަދި، ލޯހުޅުވި ތަނާ ކަހަލަ ގޮތަކަށް، އޭރު ކުރިޔަށް ދިޔަ ތަގުރީރު ނިމުމާއެކު ވަނީ އަތްޖައްސަވަން ފައްޓަވާފައެވެ.
މިވީޑިއޯވަނީ، އެވަގުތުން ފެށިގެން ސޯޝަލް މީޑިއާގައި ވައިރަލް ވާން ފަށާފައެވެ. އަދި ވީޑިއޯ އާންމުވި ދުވަހު އެކަނިވެސް 4.6 މިލިއަން މީހުން ވީޑިއޯ ޓުވިޓާގައި ބަލާފައި ވެއެވެ. އަދި މިހާތަނަށް 5.6 މިލިއަން މީހުން މިވީޑިއޯ ބަލާފައި ވެއެވެ.
Biden appears to fall asleep during COP26 opening speeches pic.twitter.com/az8NZTWanI
— Zach Purser Brown (@zachjourno) November 1, 2021
ސަމިޓްގައި ބައިޑްން ނިދިޖެހިފައި އިންނަ ވީޑީއޯ އާންމު ވެގެން ދިއުމާ ގުޅިގެން އެމެރިކާގެ ކުރީގެ ރައީސް ޓަރަމްޕްވަނީ ބައިޑްންއަށް ވަރަށް ބޮޑަށް ފާޑު ވިދާޅުވެފައެވެ. ޓްރަމްޕް ވިދާޅުވެފައިވަނީ، ބައިޑްއަކީ، "ދުނިޔޭ ހޫނުވުމާއި ގުޅޭގޮތުން ހަދަހަދައިގެން ދައްކާ ވާހަކައަށް" އެއްވެސް ސަމާލުކަމެއް ދޭ މީހެއް ނޫންކަމުގައެވެ.
ބައިޑްންގެ ވީޑިއޯ އާންމުވެގެން ދިއުމާއެކު ޓްރަމްޕް އާންމު ކުރި ސްޓޭޓްމަންޓެއްގައި ވިދާޅުވެފައިވަނީ، ސަމިޓުގައި ބައިޑްންއަަށް ނިދި ޖެހުނީ، ދުނިޔެ ހޫނުވުމާއި ގުޅޭގޮތުން ސަމިޓުގައި ދައްކަމުންދިޔަ ވާހަކަތަކުގެ އަޑު އަހަން އޭނާއަށް ކެތް ނުކުރެވިގެން ކަމުގައެވެ.
"ދުނިޔެ ހޫނުވުމޭ ކިޔައިގެން މި ދައްކާ ވާހަކަ އަޑު އަހާކަށް ބައިޑްއަކަށްވެސް ކެތެއް ނުކުރެވުނު، މިއީ އެމެރިކާގެ 2020ގެ ރިޔާސީ އިންތިޚާބާއި ޖެހިގެން، އެމެރިކާގައި ހަދާ 7 ވަނައަށް އެންމެ ބޮޑު ދޮގު، ރަޝިއާ، ރަޝިއާ، ރަޝިއާ، ޔޫކްރެއިން، ޔޫކްރެއިން، ޔޫކްރެއިން، އިމްޕީޗްމަނޓް ދޮގު #1، އިމްޕީޗްމަންޓް ދޮގު #2، އަދި މުލަރ ރިޕޯޓާއި ގުޅިގެން ފެތުރި ހަގީގަތާ ޚިލާފް ވާހަކަތައް،" ޓްރަމްޕް ވިދާޅުވެފައި ވެއެވެ.
އާންމު ވެގެން ގޮސްފައިވާ ވީޑިއޯގައި، ފަހުން ލޯ ހުޅުވުމަށްފަހު، ބައިޑްންވަނީ، ލޮލުގައި އަތުން އުގުޅާވެސް ހައްދަވާފައެވެ. އެެމެރިކާގެ ފާއިތުވި ރިޔާސީ އިންތިޚާބުގައި ޓްރަމްޕް އާންމުކޮށް ބައިޑްންއާއި މުޚާތަބް ކުރަމުން ގޮސްފައިވަނީ، "ނިދި ޖެހިފައި އިންނަ ބައިޑްން،" މި ގޮތަށެވެ.
