މިދިޔަ ސީޒަނުގައި މާޒިޔާއިން އޭއެފްސީ ކަޕުގައި ޓީމުގެ ފަހަތުގައި މޮޅު ކުޅުމެއް ދެއްކި ސާބިއާގެ ޑިފެންޑަރު ޕީޓަ ޕްލެނިޗްގެ އެއްބަސްވުން އާކޮށްފިއެވެ.
މާޒިޔާއާ ގުޅުމުގެ ކުރިން ޕީޓަ ވަނީ ބަންގްލަދޭޝްގެ ޗިޓަގޮން އަބަހާނީ އަށް ކުޅެފަ އެވެ. އަބަހާނީ އަށް ކުޅުމުގެ ކުރިން އޭނާ ވަނީ ބޮސްނިއާ ދެ ވަނަ ޑިވިޝަނުގައި ކުޅެފައެވެ. މާޒިޔާއިންް ސާބިޔާގެ ޑިފެންޑަރުގެ އެއްބަސްވުން އާކުރި އިރު އެޓީމުން ވަނީ ސާބިޔާގެ ތަޖުރިބާކާރު ކީޕަރު ނިކޯލަގެ ސޮއިވެސް ހޯދާފައެވެ.
ނިކޯލ އާއި ޕްލެނިޗް އަކީ މާޒިޔާ އިން އޭއެފްސީ ކަޕަށް ޓީމު ވަރުގަދަ ކުރިއިރު ވެސް ގެންނަން ނިންމާފައިވާ ކުޅުންތެރިންނެވެ. އޭއެފްސީ ކަޕް މި އަހަރުގެ މުބާރާތް ވަނީ ކެންސަލްކޮށްފަ އެވެ. އަންނަ އަހަރުގެ އޭއެފްސީ ކަޕްގެ ގްރޫޕް ސްޓޭޖުގެ ޖާގައެއް މާޒިޔާ އަށް ޔަގީންވެފައިވާތީ އެ ޓީމުން ކުރިއަށް އޮތް ސީޒަނަށް ތައްޔާރުވާނީ އޭއެފްސީ ކަޕަށް ވެސް ބަލައިގެންނެވެ.
ސާބިއާގެ ފުރަތަމަ ޑިވިޝަނުގައި ކުޅުމަށް ފަހު ޕްލެނިޗް އެންމެ ފުރަތަމަ ބަދަލުވި އޭޝިއާގެ ކްލަބަކީ ލެބަނަންގެ ކުލަބެކެވެ. އެ ޓީމާ އެކު 2017 ވަަނަ އަހަރުގެ އޭއެފްސީ ކަޕްގައި ޕްލެނިޗް ވަނީ ކުޅެފައެވެ.
