ޔުއެފާ ޗެމްޕިއަންސް ލީގު ފުޓްބޯޅަ މުބާރާތުގެ ގްރޫޕް އޭ ގައި މެންޗެސްޓަރ ސިޓީ މޮޅުވެ ގްރޫޕްގެ އެއްވަނައަށް ޖެހިލިއިރު، އާރްބީ ލައިޕްޒިގް އަތުން ޕީއެސްޖީ އެއްވަރުވެއްޖެއެވެ.
މުބާރާތުގައި ރޭ ކްލަބް ބްރޫޖްގެ މައްޗަށް ސިޓީ ކުރިހޯދީ 1-4 ގެ ނަތީޖާއަކުންނެވެ. އަދި ޕީއެސްޖީ އާއި ލައިޕްޒިގް ބައްދަލުކުރި މެޗު އެއްވަރުވީ 2-2 ގެ ނަތީޖާއަކުންނެވެ.
ސިޓީ އާއި ކްލަބް ބްރޫޖް ބައްދަލުކުރި މެޗުގެ 15 ވަނަ މިނެޓުގައި ސިޓީން ވަނީ ލަނޑު ޖަހާ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ، ފިލް ފޮޑެންއެވެ. މި ލަނޑު ޖެހިތާ ދެ މިނެޓު ފަހުން ސިޓީގެ ޑިފެންޑަރު ޖޯން ސްޓޯންސް އަތުން ބައިކޮޅަށް ވަން ލަނޑާއެކު މެޗުގެ ނަތީޖާ ހަމަހަމަވިއެވެ.
މެޗުގެ ދެވަނަ ހާފް ފަށައިގެން 54 ވަނަ މިނެޓުގައި ސިޓީން ވަނީ އެޓީމުގެ ދެވަނަ ލަނޑު ޖަހާ އަނެއްކާވެސް ލީޑު ނަގާފައެވެ. މި ލަނޑު ކާމިޔާބުކޮށްދިނީ، ރިޔާދް މަހްރޭޒްއެވެ. އަދި ތިންވަނަ ލަނޑު 72 ވަނަ މިނެޓުގައި ރަހީމް ސްޓާލިން ކާމިޔާބުކޮށްދިންއިރު، ސިޓީގެ ހަތަރު ވަނަ ލަނޑު މެޗުގެ އިތުރު ވަގުތުގެ ތެރޭގައި އެޓީމަށް ކާމިޔާބުކޮށްދިނީ، ގެބްރިއަލް ޖެސޫސްއެވެ.
މި މޮޅާއެކު ގްރޫޕް އޭގެ އެއްވަަނައިގައި ސިޓީ އޮތީ ކުޅުނު ހަތަރު މެޗުން ނުވަ ޕޮއިންޓު ހޯދައިގެންނެވެ. ދެވަނައިގައި ޕީއެސްޖީ އޮތީ ހަތަރު މެޗުން އަށް ޕޮއިންޓާއެކުއެެވެ. އަދި ތިންވަނައިގައި ބްރޫޖަށް ހަތަރު މެޗުން ހަތަރު ޕޮއިންޓް ވަނީ ލިބިފައެވެ.
ޗެމްޕިއަންސް ލީގުގައި ގްރޫޕް އޭ ގައި ޕީއެސްޖީ އާއި އާރްބީ ލައިޕްޒިގް ބައްދަލުކުރި މެޗުގައި ޕީއެސްޖީން ކާމިޔާބުކުރި ދެ ލަނޑުވެސް އެޓީމަށް ކާމިޔާބުކޮށްދިނީ ޖިއޮޖީނިއޯ ވައިނަލްޑަމްއެވެ. ލައިޕްޒިގްގެ ލަނޑުތައް ކާމިޔާބުކޮށްދިނީ، ކްރިސްޓޮފް އެންކުންކޫ އަދި ޑޮމިނިކް ސޮބޯސްލާއެވެ.
