28 ވަނަ ކޮންފަރެންސް އޮފް ޕާޓީސް (COP28) ޔުނައިޓެޑް އަރަބި އެމިރޭޓްސްގައި ބޭއްވުމަށް އެގައުމުން ކުރަމުންދާ މަސައްކަތުގައި އިތުރު ކުރިއެރުމެއް ހޯދައިފިއެވެ.
މިގޮތުން، 2023 ވަނަ އަހަރުގެ ކޯޕް28 ޔޫއޭއީގައި ބޭއްވުމަށް އެގައުމުން ކޮށްފައިވާ ބިޑަށް މިހާރުވަނީ، އޭޝިއާ ޕެސިފިކް ގްރޫޕްގެ ގައުމުތަކުގެ ތާއީދު ލިބިފައި ކަމުގައި ޔުނައިޓެޑް އަރަބި އެމިރޭޓްސްގެ ގައުމީ ނޫސް އޭޖެންސީ WAM އިންވަނީ ރިޕޯޓު ކޮށްފައެވެ.
ކޯޕް28 ޔުނައިޓެޑް އަރަބި އެމިރޭޓްސްގައި ބޭއްވުމަށް އެގައުމުން ކުރަމުންދާ މަސައްކަތުގައި އިތުރު ކުރިއެރުމެއް ހޯދާފައިވާކަން އިއުލާން ކޮންފައި މިވަނީ، ކޯޕް26 ސަމިޓް އިނގިރޭސިވިލާތުގެ ސްކޮޓްލޭންޑްގެ ގްލަސްގޯވްގައި ކުރިޔަށް ދަމުން ދަނިކޮށެވެ.
"ތިމާވެއްޓަށް ކުރިމަތިވެފައިވާ މައްސަލަތަކަށް އެކަށީގެންވާ ހައްލެއް ގެނައުމަށް އެކުވެރި ގައުމުތަކުން ގުޅިގެން ކުރަމުންދާ މަސައްކަތަކަށް، އަދި އޭޝިއާ ޕެސިފިކް ގްރޫޕްގެ ގައުމުތަކުން ކުރި ތާއީދަށް އަހަރެންމެން ވަރަށް ބޮޑަށް ޝުކުރުވެރި ވަން،" WAM އިން އާންމުކުރި ސްޓޭޓްމަންޓެއްގައި، މިނިސްޓަރ އޮފް ފޮރިންގ އެފެއާޒް ޝެއިޚް އަބުދުﷲ ބިން ޒައިދު ވިދާޅުވެފައި ވެއެވެ.
ޔޫއެންއިން ބާވަމުން ގެންދާ ކޮންފަރެންސް އޮފް ޕާޓީސްއަކީ، ޕެރިސް އެގްރީމަންޓްއާއި އަދި ޔޫއެން ފެރޭމްވާކް ކޮންވެންޝަން އޮން ކްލައިމެޓް ޗޭންޖް (UNFCCC)ގައި ކަނޑައަޅަފައިވާ ލަޑުދަޑިތައް ހާސިލްކޮށް، އަދި އެ ލަނޑުދަނޑިތައް ކުރިއެރުވުމަށް ދުނިޔޭގެ ގައުމުތައް އެއްތަން ކުރުމުގެ ގޮތުން ކޮންމެ އަހަރަކުވެސް ޔޫއެންއިން ބާއްވަމުންދާ ބައްދަލުވުމެކެވެ.
މިއަހަރުގެ މާރޗް މަހު ޔޫއޭއީންވަނީ، އެގައުމުން ތިމާވެށި ހިމާޔަތް ކުރުމަށް ކޮށްފައިވާ މަސައްކަތްތައް ފާހަގަކޮށް، ކޯޕް28 ހޯސްޓު ކުރުމުގެ ފުރުސަތު ހޯދުމަށް މަސައްކަތް ކުރާނެކަން ހާމަ ކޮށްފައެވެ.
ޔޫއޭއީންވަނީ، ވިއެނާ ކޮންވެންޝަން ފޯރ ޕްރޮޓެކްޝަން އޮފް ދަ އޯޒޯން ލޭޔަރ 1989ވަނަ ތަސްދީގުކޮށް، ޔޫއެން ފެރޭމްވާކް ކޮންވެންޝަން އޮން ކްލައިމެޓް ޗޭންޖް (UNFCCC)ގައި 1995 ގައި ބައިވެރިވެ، 2005 ވަނަ އަހަރު ކިޔޯޓޯ ޕްރޮޓޮކޯލް ތަސްދީގުކޮށް އޭގެ އިތުރުން 2015ވަނަ އަހަރު ޕެރިސް އެގްރީމަންޓުގައި ސޮއި ކޮށްފައެވެ.
މީގެ އިތުރުން ޔޫއޭއީގެ ވެރިރަށް އަބޫދާބީގައި ވަނީ، 2019ވަނަ އަހަރު އަބޫ ދާބީ ކްލައިމެޓް މީޓިން ބާއްވާފައެވެ. އަދި އަބު ދާބީއަކީ އިންޓަރނޭޝަނަލް އެނާރޖީ އޭޖެންސީ ގާއިމްވެފައި ހުންނަ ސިޓީވެސްމެއެވެ. މި އޭޖެންސީގެ މައި އޮފީސް ހުންނަނީ އަބޫ ދާބީގެ މަސްދަރު ސިޓީގައެވެ.
