ޔުއެފާ ޗެމްޕިއަންސް ލީގު ފުޓްބޯޅަ މުބާރާތުގެ ގްރޫޕް އެފް ގައި މިރޭ އެޓްލަންޓާ ކޮޅަށް މެޗުގެ ފަހު ވަގުތު ރޮނާލްޑޯ ޖެހި ލަނޑާއެކު މެންޗެސްޓަރ ޔުނައިޓެޑް ބަލިނުވެ ސަލާމްވެއްޖެއެވެ.

ރަށުން ބޭރުގައި މިރޭ މެންޗެސްޓަރ ޔުނައިޓެޑުން އެޓްލަންޓާ އާއި ވާދަކުރި މެޗު ނިމުނީ 2-2 ގެ ނަތީޖާއަކުން އެއްވަރުވެގެންނެވެ.

މި މެޗުގެ ފުރަތަމަ ހާފުގައި ގިނަ ވަގުތު ބޯޅަ ކޮންޓްރޯލްކޮށްގެން ކުޅެފައިވަނީ އެޓްލަންޓާ ޓީމުންނެވެ. އެގޮތުން މެޗުގެ 12 ވަނަ މިނެޓުގައި އެޓްލަންޓާއިން ވަނީ ލަނޑެއް ޖަހާ ލީޑު ނަގާފައެވެ. މި ލަނޑު އެޓްލަންޓާއަށް ކާމިޔާބުކޮށްދިނީ، ޖޯސިޕް ލިކިކްއެވެ. މި ލަނޑަށްފަހު ޔުނައިޓެޑުން ވަނީ މެޗުގެ ނަތީޖާ ހަމަހަމަ ކުރުމަށް ވަރަށް މަސައްކަތްކޮށްފައެވެ. އޭގެ ނަތީޖާއެއްގެ ގޮތުން ފުރަތަމަ ހާފުގެ ފުރިހަަމަ ވަގުތު ހަމަވެގެން ދެއްކި އިތުރު ވަގުތުގެ ތެރޭގައި ބްރޫނޯ ފެނާންޑޭޒްގެ އެހީތެރިކަމާއެކު ޔުނައިޓެޑަށް ނަތީޖާ ހަމަހަމަކޮށްދިން ލަނޑު ކާމިޔާބުކޮށްދިނީ، ކްރިސްޓިއާނޯ ރޮނާލްޑޯއެވެ.

މެޗުގެ ދެވަނަ ހާފު ފަށައިގެން 11 ވަނަ މިނެޓުގައި އަނެއްކާވެސް އެޓްލަންޓާއިން ވަނީ ލަނޑެއް ޖަހާ ލީޑު ނަގާފައެވެ. މި ލަނޑު ކާމިޔާބުކޮށްދިނީ ޑުވާން ޒަޕަޓާއެވެ. މި ލަނޑަށްފަހުވެސް އެޓްލަންޓާއަށް ވަނީ އިތުރު ލަނޑު ޖަހާނެ ފުރުޞަތުތަކެއް ލިބި ބޭކާރުވެފައެވެ. މި މެޗުން އެޓްލަންޓާ މޮޅުވާން ދަނިކޮށް އެޓީމަށް މާޔޫސްކަމާއި ކުރިމަތިލާން ޖެހުނީ 90 މިނެޓު ހަމަވެގެން ދެއްކި އިތުރު ވަގުތުގެ ތެރޭގައި ކްރިސްޓިއާނޯ ރޮނާލްޑޯ އަނެއްކާވެސް ޔުނައިޓެޑަށް ލަނޑެއް ކާމިޔާބުކޮށްދީ މެޗުގެ ނަތީޖާ ހަމަހަމަކޮށްދިން ހިސާބުންނެވެ.

މި މެޗުގެ އިތުރުން ގްރޫޕް އެފް ގައި މިރޭ ވިލަރެއާލް އާއި ޔަންގް ބޯއިޒް ބައްދަލުކުރި މެޗު 0-2 ގެ ނަތީޖާއަކުން ކާމިޔާބުކުރީ ވިލަރެއާލްއެވެ. މެޗުގެ އެޓީމުން ޖެހި 2 ލަނޑު ކާމިޔާބުކޮށްދިނީ، އެޓިއެން ކަޕޮއެ އަދި އަރްނައުޓް ޑަންޖުމާއެވެ.

މި ނަތީޖާއާއެކު ޗެމްޕިއަންސް ލީގުގެ ގްރޫޕް އެފް ގެ 1 ވަނައިގައި 4 މެޗުން ހޯދި 7 ޕޮއިންޓާއެކު މެންޗެސްޓަރ ޔުނައިޓެޑް އޮތްއިރު 2 ވަނައިގައި އޮތް ވިލަރެއާލްއަށްވެސް 4 މެޗުން ވަނީ 7 ޕޮއިންޓް ލިބިފައެވެ. އަދި 3 ވަނައިގައި 4 މެޗުން ހޯދި 5 ޕޮއިންޓާއެކު އެޓްލަންޓާ އޮތްއިރު، ފުލުގައި އޮތް ޔަންގް ބޯއިޒްއަށް 4 މެޗުން ލިބެނީ 3 ޕޮއިންޓެއެވެ.