ހިޔާ ފްލެޓްތަކަށް ގޭސް ފޯރުކޮށްދިނުމުގެ ސިސްޓަމެއް ޤާއިމުކުރުމަށް މޯލްޑިވް ގޭސްއާއެކު ހައުސިންގ ޑިވެލޮޕްމަންޓް ކޯޕަރޭޝަން، އެޗް.ޑީ.ސީން އެއްބަސްވުމެއްގައި ސޮއިކޮށްފިއެވެ.
އެޗް.ޑީ.ސީން ވިދާޅުވީ، މިއީ މިގޮތަށް ސޯޝަލް ހައުސިންގ މަޝްރޫޢެއްގައި ރާއްޖޭގައި ކުރާ ފުރަތަމަ މަސައްކަތްކަމަށެވެ. އެގޮތުން ގޭސް ފޯރުކޮށްދިނުމަށް ސިސްޓަމެއް އެޅުމަށް ނިންމާފައިވަނީ، ހިޔާ ފްލެޓްތަކަކީ ނިސްބަތުން އުސް އިމާރާތްތަކަކަށްވާތީ، ގޭސް ފުޅި އަރުވާ ބޭލުމުގައި އާއްމު ރައްޔިތުންނަށް ދިމާވެދާނެ ތަކުލީފު ކުޑަކުރުމަށްޓަކާ ކަމަށް އެޗް.ޑީ.ސީން ވިދާޅުވެއެވެ. އަދި ލިފްޓުތަކުގައި ގޭސް ފުޅި އެހާ ގިނަ ފަރާތްތަކަކުން އުފުލުމަކީވެސް އެންމެ ރައްކާތެރިކަމަކަށްނުވާތީ ކަމަށްވެސް އެޗް.ޑީ.ސީން ވިދާޅުވެއެވެ.
An agreement was signed with @maldivegas for installation of Centralised Gas Systems in Hulhumalé phase II Hiya Flats. pic.twitter.com/EdbrtStRqn
— HDC (@hdcmaldives) November 2, 2021
މި މަސައްކަތް ކުރުމަށް ހަމަޖެހިފައިވަނީ ކޮންމެ ޓަވަރެއްގެ ތިރީގައި ސްޓޯރޭޖް ޔުނިޓްތަކެއް ޤާއިމުކޮށްގެންނެވެ. އަދި މިކަން ކުރެވިގެންދާނީ އެމް.އެން.ޑީ.އެފްގެ ރެގިއުލޭޝަންސްތަކާ އެއްގޮތްވާގޮތުގެ މަތިން ކަމަށް އެޗް.ޑީ.ސީން ވިދާޅުވެއެވެ. މި މަސައްކަތް އަންނަ އަހަރުގެ ދެވަނަ ކުއާޓާގައި ނިންމުމަށް ހަމަޖެހިފައިވާއިރު، މި ޚިދުމަތް ދިނުމަށް މޯލްޑިވް ގޭސްއާ ޙަވާލުކޮށްފައިވަނީ 20 އަހަރު ދުވަހުގެ މުއްދަތަކަށެވެ.
މި އެއްބަސްވުމުގައި އެޗް.ޑީ.ސީގެ ފަރާތުން ސޮއިކުރެއްވީ މެނޭޖިންގ ޑިރެކްޓަރ ސުޙެއިލް އަޙްމަދެވެ. މޯލްޑިވް ގޭހުގެ ފަރާތުން ސޮއިކުރެއްވީ އެކުންފުނީގެ މެނޭޖިންގ ޑިރެކްޓަރ ޝަޒައިލް ސިޔާމެވެ.
