ތިން ޤާޞީއެއްގެ ލީކުވެފައިވާ އޯޑިއޯތަކުގެ މައްސަލައިގައި، ޖުޑިޝަލް ސާވިސް ކޮމިޝަނުން ނިންމި ނިންމުން ބަލައި ނުގަންނަ ކަމުގައި އިދިކޮޅު ޕްރޮގްރެސިވް ކޯލިޝަނުން ބުނެފިއެވެ.
އިދިކޮޅު ކޯލިޝަނުން ބޭއްވި ޕްރެސް ކޮންފަރެންސްގައި އިދިކޮޅު ކޯލިޝަން ހިންގުމާއި ހަވާލުވެ ހުންނެވި ޕީއެންސީގެ ރައީސް އަބްދުރަހީމް އަބްދުﷲ ވިދާޅުވީ މި އޯޑިއޯތަކުގެ ޞައްޚަކަން ބެލުމަށް ތަހުގީގް އިދާރާ ކަމުގައިވާ ފުލުހުންނާއި ހަވާލުކޮށްގެން މިކަން ނުބެލުނުއިރު، ސިޔާސީ ނުފޫޒު އިންތިހާއަށް އޮތް ކޮމިޝަނަކުން ނެރުނު ބަޔާނަކީ ގަބޫލު ކުރެވޭނެ ބަޔާނެއް ނޫންކަމަށެވެ.
ރާއްޖޭގެ ފިލްމު އުފައްދާ ބަޔަކާއި ހަވާލުކޮށްގެން އޯޑިއޯތަކުގެ ޞައްސަކަން ކަށަވަރު ކުރުމަށް ފުރަތަމަ ކުރި މަސައްކަތްވެސް ބަލައި ނުގްނަނާނެކަމަށް ވިދާޅުވެފައިވާކަމަށް އަބްދުއްރަހީމް ވިދާޅުވިއެވެ. އަދި މިއީ އެއްވެސް ހާލެއްގައި ވަކި ސިޔާސީ މަންފާއެއް ހާސިލްކުރުމަށް ގޮތް ނިމުމަށްވުރެ، ޤައުމާއި ރައްޔިތުންގެ ހައްގުގައި އިސާފުވެރިކަމާއި އަދުލުވެރިކަމާއިއެކު ކަންކަން ނިންމަންވީ ވަގުތުކަމަށް އޭނާ ވިދާޅުވިއެވެ.
ޖޭއެސްސީން ނެރުނު ބަޔާނެއްގައި ވިދާޅުވީ ލީކްވި ކްރިމިނަލްކޯޓްގެ ފަނޑިޔާރުންގެ އޯޑިއޯތަކުގެ ފޮރެންސިކް އެނާލިސިސް ހެދުމަށް ފުލުހުންގެ އިދާރާއަށް އެ ކޮމިޝަނުން ހުށަހެޅުމުން، އެ އޯޑިއޯތަކުގެ ފޮރެންސިކް އެނާލިސިސްގެ ނަތީޖާ މިއަދު ލިބިފައިވާކަމަށެވެ. އޯޑިއޯ އެނާލިސިސްގެ ނަތީޖާއިން ދައްކާގޮތުން ލީކްވިކަމަށް ބުނާ ތިން ފަނޑިޔާރުންގެ ތެރެއިން، ކްރިމިނަލް ކޯޓުގެ ޤާޟީ އަލްއުސްތާޛު ޢަލީ އާދަމް އާއި ޑްރަގް ކޯޓުގެ ޤާޟީ އަލްއުސްތާޛު މުޙައްމަދު ސަމީރުގެ އަޑާ އެ އޯޑިއޯތަކުގައި ވާހަކަދައްކާފައިވާ މީހާގެ އަޑު ދިމާނުވާކަން ކަށަވަރުވާކަމަށް ޖޭއެސްސީން ވިދާޅުވެއެވެ. އެހެންކަމުން އެ ދެ ޤާޟީންގެ މައްޗަށް އުފައްދާފައިވަނީ ދޮގު ތުހުމަތުތަކެއްކަން ޔަގީންވާތީ އެ މައްސަލަ ކުރިޔަށް ނުގެންދަން ނިންމާފައިވާކަމަށް ޖޭއެސްސީން ވިދާޅުވެއެވެ.
ޖޭއެސްސީގެ ބަޔާނުގައިވަނީ ޤާޟީ އަލްއުސްތާޛު ޙުސައިން ފާއިޒު ރަޝާދުގެ އަޑާ ދިމާވާ އޯޑިއޯގައި ދައްކާފައިހުރި ވާހަކަތަކަށް ބާލައިރު، ރައީސް ޢަބްދުﷲ ޔާމީން ޢަބްދުލްޤައްޔޫމްގެ މައްޗަށް ކްރިމިނަލް ކޯޓުގައި ހިންގި ޝަރީޢަތާ ގުޅިގެން އެއްވެސް ފަރާތަކުން އެއްވެސް ފަނޑިޔާރަކާ ބައްދަލުކޮށްފައިވާކަމަށް، ނުވަތަ ބައްދަލު ކުރަން އެދިފައިވާކަމަށް ނުވަތަ އެ ޝަރީޢަތަށް ނުފޫޒު ހިންގުމަށް އެއްވެސް މަސައްކަތެއް ކޮށްފައިވާ ކަމަށް ބުނެފައި ނުވާކަމަށް ކޮމިޝަނުން ވަނީ ފާހަގަކޮށްފައެވެ. އެހެންނަމަވެސް އެ އޯޑިއޯގައި ޝަރީއަތާއި ގުޅޭ ވާހަކަތަކެއް ކޯޓުން ބޭރުގައި ދައްކާފައިވާތީ އެހެން ފަނޑިޔާރުންގެ އިތުބާރު ގެއްލުމުގެ ފުރުސަތު އޮތްކަންވެސް ޖޭއެސްސީގެ ބަޔާނުގައިވެއެވެ.
ކޮމިޝަންގެ ބަޔާން ނިންމާލާފައިވަނީ ޞައްޙަ ނޫން އޯޑިއޯތަކެއް ހަދާ ފަނޑިޔާރުންގެ މައްޗަށް ދޮގު ތުހުމަތުކޮށްފައިވާތީ އެކަން ކުޢްވެރިކުރަމުންނެވެ. އަދި ފަނޑިޔާރުންނާއި ގުޅޭ ގޮތުން ލިބޭ މައުލޫމާތު ސައްހަކަން ކަށަވަރުކުރުމަށްފަހު ނޫނީ މީޑިއާތަކުން ނުގެނެސްދިނުމަށް އިލްތިމާސްކުރަމުންނެވެ.
