އައު ސީޒަނަށް ތައްޔާރުވާން އެންމެ ފަހުގެ ލީގު ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަނުން ފަރިތަކުރުންތައް ފަށައިފިއެވެ.
މާޒިޔާއިން ފަރިތަކުރުންތައް ފަށާފައިވަނީ އެ ޓީމުގެ ކޯޗުކަމުގެ މަގާމާއި އަލަށް ހަވާލުވި މުހައްމަދު ޝިޔާޒް (މޯހަން) އާއެކުއެވެ. މޯހަން މާޒިޔާގެ ކޯޗުކަމާއި ހަވާލުވީ އެއްއަހަރު ދުވަަހުގެ އެއްބަސްވުމެއްގެ ދަށުންނެވެ.
މާޒިޔާއިން މިހާރު ފަރިތަކުރުންތައް ކުރިޔަށްގެންދަނީ ގައުމީ ޓީމުގައި ނުހިމެނޭ ކުޅުންތެރިންނާއެކުއެވެ. އެ ކުޅުންތެރިންތައް މާޒިޔާ އާއި ގުޅެނީ މިމަހު ލަންކާގައި އޮންނަ މަހިންދާ ރާޖަޕަކްސާ ފޯ ނޭޝަންސް ކަޕަށް ފަހުއެވެ. މާޒިޔާގެ ގިނަ ކުޅުންތެރިންތަކެއް ގައުމީ ޓީމުގައި ހިމެނޭތީ، އެޓީމުގެ ފަރިތަކުރުންތަކުގައި މާޒިޔާގެ ޔޫތު ޓީމުގެ ބައެއް ކުޅުންތެރިން ވެސް އިއްޔެގެ ފަރިތަކުރުންތަކުގައި ބައިވެރިކުރިއެވެ.
އެފްއޭއެމުން ކުރިޔަށް އޮތް ފުޓްބޯޅަ ސީޒަން ފެށުމަށް ތާވަލްކޮށްފައިވަނީ އަންނަ ޑިސެމްބަރ މަހުގެ 15 ވަނަ ދުވަހުއެވެ. މިފަހަރުގެ ސީޒަން ފަށަނީ ޕްރެޒިޑެންޓްސް ކަޕް ފުޓްބޯޅަ މުބާރާތުންނެވެ. ޕްރެޒިޑެންޓްސް ކަޕަށް ފަހު ލީގު ފެށުމަށް ހަމަޖައްސާފައިވަނީ ފެބްރުއަރީ މަހުގެ 12 ވަނަ ދުވަހުއެވެ.
