ޖުޑިޝަލް ސަރވިސް ކޮމިޝަން (ޖޭއެސްސީ) އެކުލަވާލާފައިވާގޮތް ބަދަލު ކުރުމަށް ރައްޔިތުންގެ މަޖިލީހުގެ މަހުބަދޫ ދާއިރާގެ މެމްބަރު އަޙްމަދު ތާރިޤު މަޖިލީހަށް ހުށަހެޅުއްވި އިސްލާހުގެ ފުރަތަމަ ކިޔުން މާދަމާ އިއްވުމަށް އެޖެންޑާކޮށްފިއެވެ.
މިއީ މި ބިލު ތޯރިގް ހުށަހަޅުއްވާ ދެ ވަނަ ފަހަރެވެ. މިދިޔަ އަހަރު ވެސް މި ބިލު ހުށަހެޅުއްވިއިރު، މަޖިލީހުގައި ތިއްބަވާ 87 މެންބަރުން ތިއްބަވާ މަޖިލީހުގެ 50 މެންބަރަކު ވޯޓު ދެއްވީ ބިލު ބޭރުކޮށްލުމަށެވެ. ބިލު ބަލައިގަންނަން ވޯޓު ދެއްވީ އެންމެ 13 މެންބަރުންނެވެ.
މިފަހަރު އިސްލާހު ހުށަހެޅުއްވި ސަބުކަމަށް ތޯރިގު ވިދާޅުވީ ޖުޑީޝަލް ސަރވިސް ކޮމިޝަންއަށް މީހުން ޢައްނުކުރުމާއި، އެ ކޮމިޝަނުގައި ހިމެނުމަށް، ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގައި ބަޔާންކޮށްފައިވާ ގޮތުގެ މަތީން، މީހުން ޢައްޔަނުކޮށް، އަދި އެ ކޮމިޝަނަށް މީހުން ހިމެނުމުގެ ސަބަބުން، އެ ކޮމިޝަނުން ބަލާ މައްސަލަތަކާއި އަދި ނިންމާ ނިންމުން ތަކުގައި ވެރިކަން ހިންގުމުގެ ބާރާއި، ޤާނޫނު ހެދުމުގެ ބާރުގެ ނުފޫޒާއި، ގޮތް ކިޔުން އިންތިހާއަށް ބޮޑަށް ހިމެނި، ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ ހަވަނަ ބާބުން އަދުލު އިންޞާފު ޤާއިމްކުރުމުގެ ބާރަށް ލިބިދޭ މިނިވަންކަމާއި، މުސްތަޤިއްލުކަމަށް ހުރަސް އެޅެމުން ދާތީ ކަމުގައެވެ.
އަދި މިފަހުން ދިވެހިރާއްޖޭގައި ކުރެވެމުންދާ ތަޖުރިބާތަކަށް ބަލާއިރު، ފަނޑިޔާރުންނަށް ނުފޫޒު ފޯރުވުމުގައި ސިޔާސީ މަޤްސަދު ޙާސިލްކުރުމަށާއި، ސިޔާސީ ބަދަލުހިފުމުގެ ގޮތުން، ވެރިކަމާއި ވާދަވެރި ފަރާތްތަކުގެ ޝަރީއަތްތަކަށް ފާޅުކަންބޮ ނުފޫޒު ފޯރުވައި، ޝަރީއަތްތަކުގައި ހުކުމްކުރަން ކުޑަތަންވެފައިވަނިކޮށް ހުކުމް ކުރަން އިންނަވާ ޤާޒީން ސަސްޕެންޑްކުރުމާއި، ވަކި ގޮތަކަށް ހުކުމްކޮށްދޭ ފަނޑިޔާރުން، ސްޕްރީމް ކޯޓް ފަދަ ކޯޓްތަކަށް ޕްރޮމޯޝަން ދިނުމާއި، އަދި ސިޔާސީ ފަރާތްތަކަށް ހުކުމްކޮށްދޭ ފަނޑިޔާރުންނަށް ވަކި މަޤާމްތަކެއް ދިނުމަށް ވަޢުދުވެ، އެ މަޤާމުތައް ނުލިބިގެން ފަނޑިޔާރުން މަގުތައްމަތީގައި ޝަކުވާކުރަމުންދިޔުމާއި، ދައުލަތުން ދަޢުވާ ކުރާ މައްސަލަތަކުގައި ދައުލަތާއި ދެކޮޅަށް އެ މައްސަލައެއް ނިމިއްޖެނަމަ، ޖުޑީޝަލް ސާވިސްކޮމިޝަން މެދުވެރިކޮށް ފަނޑިޔާރުން ސަސްޕެންޑްކޮށް އަދި ވަކިކޮށް މުޅި ފަނޑިޔާރުގެއަށް ބިރުވެރިކަން ފޯރުވަމުންދާތީއާިވެސް ގުޅިގެންނެވެ.
މީގެ އިތުރުން ކޯޓްތަކުން ކުރާ ބައެއް ހުކުމްތައް ލިޔެ ތައްޔާރުކުރަނީ ޖޭއެސްސީގެ މެންބަރުންގެ ގޮތުގައި ތިއްބަވާ ސިޔާސީ ފަރާތްތައްކަމަށް ގިނައަދަދެއްގެ ދިވެހިރައްޔިތުން ތުޙުމަތު ކުރަމުންދާތީއާއި ޖުޑީޝަލް ސާވިސްކޮމިޝަން މިހާރު އެކުލަވާލެވިފައިވާ ގޮތުގެ ބޭނުން ޚުދުމުހުތާރުގޮތެއްގައި ވެރިކަމުގެ ބާރުންހިފައި، އަދި ވެރިކަން ދިފާޢުކުރާ އަސާއެއްގެ ރަމުންދިއުމުގެ އިތުރުން، ޖޭއެސްސީއިން ނުފޫޒުފޯރުވައިގެން ފަނޑިޔާރުން ގެ މުސްތަޤިއްލުކަމާއި، ނުފޫޒެއްނެތި ހުކުމްކުރަން އޮންނަ މަގު ހަނިކޮއްލައި، ޖޭއެސްސީއަކީ ފަނޑިޔާރުން އަޅުވެތި ކުރާތަނަކަށް ބަދަލުވެފައިވާތީކަމުގައި ވަނީ ބުނެފައެވެ.
ޖޭއެސްސީގެ އެކުލެވުން ބަދަލު ކުރުމަކީ ރައީސް އިބްރާހީމް މުހައްމަދު ސޯލިހްގެ ރިޔާސީ ވައުދުފުޅެކެވެ. ރިޔާސީ ދައުރު ނިމުމުގެ ކުރިން އެ ކަން ކުރައްވާނެ ކަމަށް ރައީސް ވިދާޅުވެފައިވެއެވެ.
އެކަމަކު މިހާތަނަށް އައި އިރު ވެސް ޖޭއެސްސީގެ އެކުލެވުން އެ އޮތް ގޮތަށް ބާއްވައިގެން ކުރިއަށް ދާތީ އާންމުންގެ ގިނަ ފާޑުކިއުމެއް އެމްޑީޕީއަށާއި ސަރުކާރަށް ދަނީ އަމާޒު ކުރެވެމުންނެވެ. އެމްޑީޕީގެ އިސް ބޭފުޅުން ވިދާޅުވަނީ އެއީ ޖުޑިޝަރީ އިސްލާހު ކުރުމުގެ އެޖެންޑާގެ އެންމެ ފަހަށް އޮތް މަސައްކަތް ކަމުގައެވެ.
