މާޒިޔާ ސްޕޯޓްސް އެންޑް ރެކްރިއޭޝަނުގެ އައު ކޯޗަގުގެ މަގާމަށް މަޝްހޫރު ފުޓްބޯޅަ ކޯޗު މުޙައްމަދު ޝިޔާޒް (މޯހަން) ހަމަޖައްސައިފިއެވެ.
މޯހަން ހަމަޖައްސާފައިވަނީ އަންނަ ސީޒަންގެ ނިޔަލަށެވެ. މިދިޔަ ސީޒަނުގައި މާޒިޔާއަށް ކޯޗުކޮށްދިނީ ސާބިއާގެ ރިސްޓޯ ވިޑަކޮވިޗްއެވެ. މޯހަން މާޒިޔާއާއި ހަވާލުވުމުގެ ކުރިން ކޯޗު ކޮށްދިނީ މިދިޔަ ސީޒަނުގައި ފުރަތަމަ ޑިވިޝަނުގައި އަލަށް ވާދަކުރި ސުޕަ ޔުނައިޓެޑް ސްޕޯޓްސް (ސަސް)ގެ ކޯޗުގެ މަގާމުގައެވެ.
އޭއެފްސީ ޕްރޯ ލައިސަންސް ކޯޗު މޯހަން ބުނީ ސަސްއިން ވަކިވީ އެއްވެސް ކަހަލަ މައްސަލައެއް ޖެހިގެން ނޫންކަމަށާއި ދެ ފަރާތަށްވެސް އެންމެ ފައިދާ ބޮޑު ގޮތަކީ މިއީ ކަމަށް ވާތީކަމަށެވެ. ނިމިގެންދިޔަ ސީޒަންގައި މުހައްމަދު ޝިޔާޒް (މޯހަން) އެންމެ ފުރަތަމަ ފެނިގެންދިޔައީ ޒުވާން ކުޅުންތެރިންގިނަ ކުލަބް އީގަލްސްއާއެކުއެވެ. އެގޮތުން ސީޒަން ހުޅުވުމުގެ ގޮތުން ކުޅުނު ޗެރިޓީ ޝީލްޑް މެޗްގައި ކުލަބް އީގަލްސްއިންވަނީ މާޒިޔާ ބަލިކޮށް ސީޒަންގެ ފުރަތަމަ ތަށި ކާމިޔާބުކޮށްފައެވެ. ނަމަވެސް ލީގްގެ ފުރަތަމަ ބުރުގައި އީގަލްސްއަކަށް މާރަނގަޅު ކުޅުމެއް ދެއްކިފައެއް ނުވެއެވެ. އެއާއިއެކު އީގަލްސްގެ ކޯޗްކަމުން ދެ ފަރާތް އެއްބަސްވެގެން މޯހަންވަނީ ވަކިވެފައެވެ.
We are delighted to announce that experienced coach Mohamed Shiyaz (Mohan) will be the new head coach of Maziya.
Shiyaz, who has tremendous coaching experience in the top division, signed with Maziya for the 2021 / 2022 football season. #greenboys #gomaziyago #ooredoomaldives pic.twitter.com/T4ra2yqiAp— MAZIYA SPORTS (@MaziyaSr) October 28, 2021
އީގަލްސް ދޫކޮށްލިތާ މާގިނަ ދުވަސްތަކެއްވެސް ނުވަނީސް މޯހަން ސަސްއާއި ގުޅުނެވެ. ސަސްއިން ލީގް ފެށީ އަހުމަދު ނާޝިދު (ނާދު)ގެ ކޯޗުކަމުގައެވެ. މޯހަންގެ ކޯޗްކަމުގެ ދަށުން ސަސް މިދިޔަ ސީޒަނުގައި ކުޅުނު 8 މެޗުގެ ތެރެއިން އެޓީމު ވަނީ 2 މެޗު ކާމިޔާބުކޮށް، 2 މެޗު އެއްވަރުކޮށްފައެވެ. ސަސް އިން ލީގު ނިންމާލީ 14 މެޗުން ހޯދި 15 ޕޮއިންޓާ އެކު ލީގު ތާވަލުގެ 6ވަނާގައި އޮވެގެންނެވެ.
ތަޖްރިބާކާރު ކޯޗް މޯހަންވަނީ 2008ވަނަ އަހަރު ރާއްޖެއިން އެންމެ ފުރަތަމަ ސާފް ޗެންޕިއަންޝިޕް ކާމިޔާބުކުރިއިރު، އެޓީމްގެ އެސިސްޓަންޓް ކޯޗެއްގެ ގޮތުގައި މަސައްކަތްކޮށްފައެވެ. އޭފެ ފަހުން މޯހަންވަނީ ކުލަބް ފުޓްބޯޅައިގައި ގިނަ ކާމިޔާބީތަކެއް ހާސިލްކޮށްފައެވެ. ފުރަތަމަ ޑިވިޝަނުގައި ސަސް އާއި އީގަލްސްގެ އިތުރުން ނިއުރޭޑިއަންޓާއި ވެލެންސިއާ އަދި މަހިބަދޫގެ އިތުރުން ދ. ކުޑަހުވަދޫ ޓީމަށްވެސް މޯހަންވަނީ ކޯޗްކޮށްދީފައެއވެ. ކުލަބް ފުޓްބޯޅައިގައި މޯހަން އެންމެ ކާމިޔާބު ދުވަސްތަކެއް ހޭދަކޮށްފައިވަނީ ނިއުރޭޑިއަންޓް ސްޕޯޓްސް ކުލަބްގައެވެ. އެކުލަބާއެކު މޯހަންވަނީ 2012 ވަނަ އަހަރުގެ ދިވެހި ޕްރިމިއާ ލީގާއި ޕްރެޒިޑެންޓްސް ކަޕް ކާމިޔާބުކޮށްފައެވެ. އަދި 2017ވަނަ އަހަރުގެ މިނިވަން ޗެންޕިއަންޝިޕް ދ.ކުޑަހުވަދޫ ޓީމަށްވެސް މޯހަންވަނީ ހޯދާދީފައެވެ.
