ޖުޑީޝަލް ސާވިސް ކޮމިޝަން (ޖޭއެސްސީ) ގެ ކަންކަން އިސްލާހު ކޮށްދެއްވުމަށް ރައީސުލްޖުމްމްހޫރިއްޔާ އިބްރާހިމް މުހައްމަދު ޞާލިހަށް ދީނީ އިލްމުވެރިޠ ޑރ.މުހައްމައު އިޔާޒު ގޮވާލައްވައިފިއެވެ.

ޖުޑިޝަލް ސާވިސް ކޮމިޝަން އިސްލާހު ކޮށްދެއްވުމަށް ރައީސް ޞާލިހަށް ޑރ.އިޔާޒު ގޮވާލެއްވީ ފަނޑިޔާރުންނާއިމެދު ނިންމަވާ ނިންމުންތާއި، އަމަލުކުރަމުންދާ ގޮތާއިމެދު ގިނަ ބަޔަކު ހިންތަހަމަ ނުޖެހުން ފާޅު ކުރަމުންދާ ދަނޑިވަޅެއްގައެވެ. ޝައިޚު ވިދާޅުވީ ފަނޑިޔާރު މައްސަލައެއް ނިންމިގޮތް ރަގަޅުނޫންވީމާ އެކަމާ ހިތްހަމަ ނުޖެހޭނަމަ ދާން އޮންނަނީ މަތީ ކޯޓަކަށެވެ. މިއަދު ޖޭއެސްސީގެ އަމަލުތައް ހުރި ގޮތުން ދައުލަތުގެ އެންމެ ކޯޓަށްވުރެވެސް މަތީގައި ޖޭއެސްސީ އޮންނަހެން ހީވާކަމަށް ޑރ.އިޔާޒު ވިދާޅުވިއެވެ. 

ފަނޑިޔާރު މައްސަލަ އެއް ނިންމިގޮތް ރަގަޅުނޫންވީމާ އެކަމާ ހިތްހަމަ ނުޖެހޭނަމަ ދާން އޮންނަނީ މަތީ ކޯޓަކަށެވެ. ނަމަވެސް މިހާރު ޖޭއެސްސީގެ ޢަމަލުތައް ހުންނަ ގޮތުން ހީވަނީ އެއީ ސުޕްރީމް ކޯޓަށްވުރެވެސް މަތީ ކޯޓެއްހެން. އަވަހަށް އެތަން އިޞްލާޙުކޮށްދެއްވާ.

– ޑރ.އިޔާޒު ވިދާޅުވިއެވެ. 

ޖުޑީޝަލް ސާވިސް ކޮމިޝަން، ޖޭއެސްސީއަށް ބަދަލު ގެންނަންޖެހޭ ކަމަށް އެމްޑީޕީގެ މެނިފެސްޓޯގައި ލިޔެފައިވާނެ ކަމަށާއި، އެހެންނަމަވެސް، އެއީ ކޮން ބަދަލެއްކަމެއް މެނިފެސްޓޯގައި ނޯންނާނޭކަމުގައި، އެމްޑީޕީގެ ރައީސް ވަނީ ވިދާޅުވެފައެވެ.

ޖޭއެސްސީއަށް ގެންނާނީ ކޮން ބަދަލެއްކަމެއް އެމްޑީޕީގެ މެނިފެސްޓޯގައި ލިޔެފައި ނޯންނާނެ ކަމަށް ނަޝީދު ވިދާޅުވިނަމަވެސް، ސިޔާސީ ބޭފުޅުން ޖޭއެސްސީގައި ނުތިބުމަށް އެންމެ ބޮޑަށް ވަކާލާތު ކުރައްވާފައިވަނީ އެމްޑީޕީގެ ލީޑަޝިޕުންކަން ފާހަގަ ކޮށްލެވެއެވެ. އަދި ރައީސް ޔާމިންގެ ވެރިކަމުގައި ޖޭއެސްސީއަށް އޭރުގެ ސަރުކާރުން ނުފޫޒު ފޯރުވަމުންދިޔަ ކަމުގެ ތުހުމަތުގައި، ރައްޔިތުންގެ މަޖިލިހުގެ ރައީސް ޖޭއެސްސީގައި އިންނަވާ އިނުމަށް އެންމެ ބޮޑަށް ފާޑު ވިދާޅުވަމުން ގެންދެވި އެއް ބޭފުޅަކީވެސް ނަޝީދުކަން ފާހަގަ ކޮށްލެވެއެވެ.

ޖޭއެސްސީގެ ރައީސްއަކީ ތުޅާދޫ ދާއިރާގެ މެންބަރު ހިސާން ހުސައިނެވެ. އަދި މަޖިލީހުގެ ރައީސްގެ ހައިސިއްޔަތުން އެމްޑީޕީގެ ރައީސް މުހައްމަދު ނަޝީދު ވެސް މި ކޮމިޝަންގައި އިންނަވައެވެ. އޭގެ އިތުރުން، ދައުލަތުގެ ބަންޑާރަ ނައިބު އިބްރާޙީމް ރިފްއަތު އިތުރުން، ރައީސް ސޯލިހްގެ ފަރާތުން ކޮމިޝަނަށް އައްޔަން ކޮށްފައިވާ މެންބަރެއްގެ ގޮތުގައި މަސްތޫރު ހުސްނީ ވެސް އެ ކޮމިޝަންގައި އިންނަވައެވެ. ނަޖީއާއެއްގެ ގޮތުން، މި ކޮމިޝަންގައި މިހާރު މެޖޯރިޓީ ބެފުޅުންގެ ގޮތުގައި ތިއްބެވީ، ސަރުކާރުގެ ވިސްނުމަށް ތާއީދު ކުރައްވާ، އަދި ވަކި ސިޔާސީ ފިކުރަކަށް ނިސްބަތްވާ ފަރާތްތައްކަން ފާހަގަ ކޮށްލެވެއެވެ.