ކޯވިޑް-19އާ ގުޅިގެން ރާއްޖެއަށް ބޭނުންވާ ވެންޓިލޭޓަރުތައް ގެނައުމުގައި ކޮރަޕްޝަނަށް ހިންގާފައިވާކަމަށް ތުހުމަތު ކުރެވޭ މައްސަލާގައި މިމަސް ނިމުމުގެ ކުރިން ގޮތެއް ނިންމާނެކަމަށް އެންޓި ކޮރަޕްޝަން ކޮމިޝަން (އޭސީސީން) ވިދާޅުވެއްޖެއެވެ.
ވެންޓިލޭޓަރު މައްސަލާގައި އެންޓި ކޮރަޕްޝަން ކޮމިޝަނުން ފަހުން ހުށަހެޅި މަޢުލޫމާތުތައް ރިވިއުކޮށް ބެލުމުންވެސް ޖިނާޢީ ކުށެއް ސާބިތުކުރުމަށް ބޭނުންވާ އުންޞުރުތައް ފުރިހަމަ ވެދާނެކަމަށް ނުފެންނާތީ ކުރިންވެސް ނިންމިގޮތަށް އެމަސަލާގައި ދަޢުވާ ނުކުރުމަށް ޕްރޮސިކިއުޓަރ ޖެނަރަލްގެ އޮފީހުން ވަނީ ނިންމާފައެވެ. ނަމަވެސް ނިންމުމާމެދު އޭސީސީއާއި އާންމު ރައްޔިތުންގެ ކަންބޮޑުވުން އޮތުމުން އެކަމުގައި އިތުރަށް ބަލަންޖެހޭ ކަންކަން ހުރިކަން ނުވަތަ ނޫންކަން ދެނަގަތުމަށް ނިންމައި، މައްސަލައިގެ ތަހުގީގް އިތުރަށް ފުރިހަމަ ކުރިމަށްވަނީ އޭސީސީއަށް ފޮނުވާފައެވެ.
ޕީޖީ އޮފީހުން އެ ނިންމުން މުރާޖަޢާ ކުރާއިރު، މައްސަލައިގައި ފުލުހުންނާ ގުޅިގެން ހޯދިފައިވާ ހެކިތައްވެސް ވަކިން ގެނެސް، އިތުރަށް ތަޙުޤީޤުކުރަންޖެހޭ ކަމެއް އޮތްނަމަ، އެކަމެއް، މޯލްޑިވްސް ޕޮލިސް ސަރވިސްގެ އެހީތެރިކަމާއެކު ތަޙުޤީޤު ކުރުމަށް އެންޓި ކޮރަޕްޝަން ކޮމިޝަނަށް އިރުޝާދު ދިނުމަށްވެސް ޤަޞްދުކުރާކަމަށް ޕީޖީ އޮފީހުގެ ބަޔާނުގައިވެއެވެ. އަދި އޭގެ ފަހުން މައްސަލަ ދިރާސާ ކުރުމަށްފަހު އަލަށް ހޯދޭ ހެކިތަކުގެ އަލީގައި ނިންމުން މުރާޖައާ ކުރައްވާނެކަމަށްވެސް ޕީޖީ އޮފީހުގެ ބަޔާނުގައިވެއެވެ.
އޭސީސީން ކުރަމުންދާ މަސައްކަތްތަކައި ގުޅޭގޮތުން ރައްޔިތުންގެ މަޖިލީހުގެ މިނިވަން މުއައްސަސާތަކައި ބެހޭ ކޮމިޓީގައި ބިލެއްދޫ ދައިރާގެ މެމްބަރު އަހުމަދު ހަލީމް ވަނީ ވެންޓިލޭޓަރު މައްސަލާގައި އޭސީސީން ކުރަމުންދާ ތަހުގީގް މިހާރު ކުރިއަށް ގޮސްފައިވާ ހިސާބާއި ގުޅޭގޮތުން ސުވާލު ކުރައްވާފައެވެ. އޭސީސީގެ ރައީސާ މަރިޔަމް ޝިއުނާ ވިދާޅުވީ މިމައްސަލާގައި ދައުވާ ކުރަން ފޮނުވުމުން، ދައުވާ ނުކޮށް އަބުރައި ފޮނުވާލިއިރު ޕީޖީ ފާހަގަ ކުރި ކަންކަން މިހާރު ތަހުގީގް ކުރަމުންދާކަމަށެވެ.
އެގޮތުން އޭސީސީން ބަލަމުންދާ ކަންތައްތަކުގެ ތެރޭގައި، ދައުލަތަށް ގެއްލުންވާ ގޮތަށް އެގްރީމަންޓް ހެދި މައްސަލައާއި، ފައިނޭޝަލްގެ މުއާމަލާތުގެ އިތުރު ތަހުގީގްތަކެއް ކުރަމުންދާކަމަށެވެ. މިމަސައްކަތް މިހާރު ނިމުމަކާއި ގާތަށް ގޮސްފައިވާއިރު، މައްސަލާގައި އޭސީސީން ދައުވާ ކުރަން ފޮނުވުމާއިމެދު މިމަސައް ނިމުމުގެ ކުރިން ގޮތެއް ނިންމާނެކަމަށް ޝިއުނާ ވަނީ ވިދާޅުވެފައެވެ.
ކުރީގެ ތަހުގީގުގައި ނުހިމެނޭބައެއްމި އެގްރީމަންޓާއި ގުޅޭގޮތުން ދައުލަތަށް ގެއްލުންވާ ގޮތަށް އެގްރީމަންޓް ހަދާފަ އޮތީމަ އެކަމާއި ގުޅޭ ތަހުގީގް. އެހެންވީމަ މި ދެބައިގަވެސް ދައުވާ އުފުލަންޖެހޭ ވަރަށް ހެކި ހުރިއްޔާ ދައުވާ ކުރާ ގޮތަށް އަޅުގަނޑުމެން ފޮނުވާނީ.
– ޝިއުނާ ވިދާޅުވިއެވެ.
މިމައްސަލާގައި ވެންޓިލޭޓަރުތައް ހޯދުމަށް ދުބާއީގެ އެގްޒެކިއުޓާސްއާއެކު ހެދި އެއްބަސްވުން ބާޠިލުކޮށް އާބިޓްރޭޝަން މެދުވެރިކޮށް ފައިސާހޯދަން ސަރުކާރުން ވަނީ ނިންމާފައެވެ.
ކޯވިޑް-19 އާ ގުޅިގެން ދިވެހިރާއްޖެއަށް ބޭނުންވާ ވެންޓިލޭޓަރުތައް ފޯރުކޮށްދިނުމަށް މިނިސްޓްރީ އޮފް ހެލްތާއި އެގްޒެކިއުޓަރސް ޖެނެރަލް ޓްރޭޑިންގއާ ދެމެދު 2 އޭޕްރިލް 2020 ގައި ވެފައިވާ އެއްބަސްވުމުގައި، އެޑްވާންސް ޕޭމަންޓް ހަދާތާ 29 މަސައްކަތު ދުވަހުގެ ތެރޭގައި މުދާ ފޯރުކޮށްދޭންވާނެކަމުގައި ބަޔާންކޮށްފައިވީ ނަމަވެސް އެއްބަސްވުމުގައި ބަޔާންކޮށްފައިވާ ގޮތުގެ މަތިން އެފަރާތުން މުދާ ފޯރުކޮށްދީފައި ނުވާކަން ސަރުކާރުން ފާހަގަކުރެއެވެ.
