މަސްތުވާތަކެތީގެ މައްސަލައެއްގައި ހައްޔަރު ކޮށްފައިވާ، ބޮލީވުޑްގެ ތަރި ޝާހްރުކް ޚާންގެ ދަރިފުޅު އާރިޔަން ޚާންގެ މައްސަލަ ތަހުގީގު ކުރަމުންދާ ނާކޮޓިކްސް ކޮންޓްރޯލް ބިއުރޯ (އެންސީބީ) މުމްބާއީ ޒޯންގެ ވެރިޔާ ސަމީރު ވަންކަޑޭ ފުލުހުންގެ ހިމާޔަތަށް އެދިއްޖެއެވެ.
ކްރޫޒް ލައިނާއެއްގައި މަސްތުވާތަކެއްޗާއެކު ޕާޓީކުރި ކަމަަށް ބުނާ މައްސަލައަކާ ގުޅިގެން 23 އަހަރުގެ އާރިޔަނާއެކު އިތުރު 7 މީހަކު ވަނީ ހައްޔަރު ކޮށްފައެވެ. އަދި އެ މައްސަލަ އަންނަނީ ވަރަށް ސީރިއަސްކޮށް ތަހުގީގު ކުރަމުންނެވެ.
އާރިޔަންގެ ކަފާލާތުގެ މައްސަލަވެސް ތިން ފަހަރެއްގެ މަތިން ކޯޓުން ވަނީ ބޭރުކޮށްލާފަ އެވެ. ކަފާލާތުގެ މައްސަލަ މުމްބާއީ ހައި ކޯޓްގައި މިއަދަށް އަލުން ތާވަލްކޮށްފައިވެއެވެ.
މިދިޔަ ހަފުތާގެ ތެރޭގައި ޝާހްރުކް ވަނީ ދަރިފުޅު ބަންދު ކޮށްފައި ހުރި ޖަލަށް ވެސް ޒިޔާރަތްކޮށްފަ އެވެ. ޚަބަރުތަށް ބުނާ ގޮތުގައި މިހާރު ޝާހްރުކާއި އޭނާގެ އަންހެނުން، އަދި އާރިޔަންގެ މަންމަ ގޯރީ ޚާނަށް ހަމަ ނިދި ނުލިބޭތާ އެތަށް ދުވަހެއް ވެއްޖެވެ.
ހިމާޔަތަށް އެދި ސަމީރު މުމްބައި ފުލުހުންނަށް ފޮނުވި ސިޓީގައި ބުނެފައިވަނީ އޭނާއަށް ގިނަ ދޮގު ތުހުމަތު ތަކެއް ކުރަމުންދާކަމަށެވެ. އަދި އެކި ގޮތްގޮތުން ތަފާތު އިންޒާރުތަށް ދެމުންދާކަމަށް ވެސް ބުނެފައި ވެއެވެ.
ޚަބަރުތަށް ބުނާގޮތުގައި ސަމީރާއި އޭނާގެ ބައިވެރިން ވަނީ ރިޝްވަތުގެ ގޮތުގައި 25 ކްރޯޑް ރުޕީސް ނަގާފައެވެ. އަދި އޭގެ ތެރެއިން 8 ކްރޯޑަކީ ސީދާ ސަމީރަށް ދިން ރިޝްވަތު ކަމަށާއި ބަކީބައި އޭނާގެ ބައިވެރިން ހަމަ ހަމައަށް ބަހާފައި ވާކަމަށްވެސް ތުހުމަތު ކުރެއެވެ.
ސަމީރާ ގުޅިގެން ދެކެވޭ ވަހަކަތަށް އޭނާ ވަނީ ދޮގުކޮށްފައެވެ. އަދި ބުނެފައިވަނީ ވަކި މީހަކަށް އަމާޒު ކޮށްގެން އެއްވެސް މައްސަލައެއް ކުރިއަށް ނުގެންދާ ކަމަށެވެ. އަދި ގާނުނުގެ ކުރިމަތީގައި އެންމެނަކީވެސް ހަމަހަމަ ބައެއްކަމަށް އޭނާ ވަނީ ބުނެފައެވެ.
