ބޮލީވުޑްގެ ސުޕަސްޓަރ ސަލްމާން ޚާންގެ ހަޔާތުގެ މައްޗަށް ބިނާކޮށް ހަދަމުންދާ ޑޮކިއުމެންޓްރީ "ބިޔޯންޑް ދަ ސްޓަރ ސަލްމާން ޚާން" ގައި ޑައިރެކްޓަރ ސަންޖޭ ލީލާ ބަންސާލީގެ އިންޓަވިއުއެއް ހިމެނުމަށް ނިންމައިފިއެވެ.

ސަލްމާންގެ ފިލްމީ ހަޔާތާއި ގުޅޭ މި ޑޮކިއުމެންޓްރީގައި ބައިވެރިވުމަށް ވަނީ ގިނަ ބަޔަކަށް ދައުވަތު ދީފައެވެ. އޭގެ ތެރޭގައި އޭނާ ކުޅެފައިވާ ފިލްމް ތަކުގެ ޕްރޮޑިއުސަރުންނާއި ޑައިރެކްޓަރުންނާއި އަދި އެކުގައި މަސައްކަތް ކޮށްފައިވާ ކޯ ސްޓަރުން ވެސް ހިމެނެއެވެ.

ސަލްމާން ވަނީ ބަންސާލީ އާއި އެކު ކާމިޔާބު ފިލްމް ތަކެއްގައި މަސައްކަތް ކޮށްފައެވެ. އެގޮތުން އޭނާގެ ކެރިއަރުގެ ވަރަށް މުހިންމު ފިލްމެއް ކަމުގައިވާ 1999ގެ "ހަމް ދިލް ދޭ ޗުކޭ ސަނަމް" ފާހަގަކޮށްލެވެއެވެ. މީގެ އިތުރުން ވެސް ބަންސާލީއާ އެކުގައި ސަލްމާން ވަނީ "ސާވަރިއާ" އާއި "ޚާމޯޝީ: ދަ މިއުޒިކަލް" ފަދަ މޮޅެތި ފިލްމް ތަކުގައި މަސައްކަތް ކޮށްފައެވެ. އެހެން ކަމުން ބަންސާލީއާ ނުލައި މި ޑޮކިއުމެންޓްރީ ފުރިހަމަ ނުވާނެ ކަމަށްވެސް ގިނަބަޔަކު ދެކެއެވެ.

މި ޚަބަރުތައް ވަރަށް ހޫނުކޮށް ފެތުރެމުންދާއިރު،  ބަންސާލީ އާއި ސަލްމާނާ ދެމެދުގައި ކުންޏެއް ޖެހިފައި ވާކަމަށް ވެސް މީޑިއާ ރިޕޯޓްތައް ބުނެއެވެ. ސަބަބަކީ ސަލްމާނާއި އާލިއާ އާއެކުގައި ބަންސާލީ ހަދަން ނިންމި ފިލްމް "އިންޝާﷲ" ފަހުވަގުތުގައި ނުކުޅެން ސަލްމާން ނިންމުމެވެ.

"ބިޔޯންޑް ދަ ސްޓަރ ސަލްމާން ޚާން" އަކީ ސަލްމާންގެ ފިލްމު ކުންފުނި އެސްކޭއެފާއި އެޕްލޯޒް އެންޓަޓައިންމަންޓްގެ އިތުރުން ވިޒް ފިލްމްސް ގުޅިގެން ހަދާ ޑޮކިއުމެންޓްރީ ސީރީޒެކެވެެ. މި ޑޮކިއުމެންޓްރީ ނެރޭނެ ދުވަހެއް އަދި ހާމަކޮށްފައިއެއް ނުވެއެވެ.