ދުނިޔޭގެ އެންމެ ވަރުގަދަ ބްރޭންޑްގެ މަގާމް ޖެހިޖެހިގެން 9ވަނަ ފަހަރަށް އެޕްލް ކުންފުނިން ކާމިޔާބު ކޮށްފިއެވެ.
ދުނިޔޭގެ އެންމެ ވަރުގަދަ 100 ބްރޭންޑްގެ ލިސްޓުގެ އެންމެ ކުރީގައި އެޕްލް ބްރޭންޑް ހިމެނުމަށްފަހު، ނިއުޔޯކުގެ މެނޭޖްމަންޓް ކޮންސަލްޓިމް ފާރމެއް ކަމުގައިވާ އިންޓަރބްރޭންޑްއިން ވަނީ އެޕްލް ބެރޭންޑް އަގު (ބްރޭންޑް ވެލިއު)އަކީ 408.3 ބިލިއަން އެމެރިކާ ޑޮލަރު ކަމުގައިވެސް ހަމަ ޖައްސާފައެވެ. މިއީ ފާއިތުވެދިޔަ އަހަރާ އަޅާ ބަލާއިރު 26 އިންސައްތައިގެ ކުރިއެރުމެކެވެ.
އިންޓަރ ބްރޭންޑްއިން ބްރޭންޑުގެ އަގު (ބްރޭންޑް ވެލިއު) ހިސާބު ކުރަނީ، ބްރޭންޑް ނިސްބަތްވާ ކުންފުނީ ވިޔަފާރީގެ ފޯރުންތެރިކަމުގެ އިތުރުން، ބްރޭންޑްގެ ވިޔަފާރީގެ ނުފޫޒާއި، އަދި ބްރޭންޑްގެ މުސްތަގުބަލުގެ ވާދަވެރިކަމަށް ރިއާޔަތް ކޮށްގެންނެވެ.
ދުނިޔޭގެ އެންމެ ވަރުގަދަ އެއް ޓެކްނޮލޮޖީ ކުންފުނި ކަމުގައިވާ އެޕްލް ކުންފުނީގެ ފަހަތުން، އިންޓަރބްރޭންޑުގެ މިލިސްޓުން ދެން ޖާގަ ހޯދާފައިވަނީ، އެމޭޒަން، މައިކްރޯސޮފްޓް، ގޫގުލް އަދި ސެމްސަންގ އެވެ.
މީގެ އިތުރުން އެންމެ ވަރުގަދަ 10 ބްރޭންޑުތަކުގެ ލިސްޓުން ޖާގަ ހޯދި ބްރޭންޑްތަކަކީ، ކޮކާ ކޯލާ، ޓޮޔޯޓާ، މާސިޑީޒް ބެންޒް، މެކްޑޮނާލްޑްސްގެ އިތުރުން ޑިޒްނީ ރައުންޑެޑްއެވެ.
ދުނިޔޭގެ އެންމެ ވަރުގަދަ 100 ބްރޭންޑް އާންމު ކުރަމުން އެކުލަވާލި ރިޕޯޓުގައި ވާގޮތުން، އެޕްލްއިން ވަނީ، އެކުންފުނީގައި މަސައްކަތް ކުރާ ހުރިހާ އެންމެންނަކީވެސް، އާމާޒެއް ކަޑައަޅާ އެމާޒަށް ވާސިލްވުމަށް ގަދަ އަޅާ މަސައްކަތް ކުރާ ބަޔަކަށް ހަދާފައި ކަމުގައެވެ.
އެޕްލެ ކުންފުނިންވަނީ ފާއިތުވެދިޔަ ތަނުގައި، އެކުންފުނީގެ ވިޔަފާރީގެ ދާއިރާ ފުޅާކޮށް، މުޅީން އާ ސިނާއަތްތައް ކަމުގައިވާ ސިއްޙީ ދާއިރާއަށްވެސް ޚިދުމަތްތައް ފުޅާ ކޮށްފައެވެ. މިގޮތުން، އެޕްލް ގަޑިތައް ބޭނުން ކޮށްގެން މިހާރު ހަށިގަޑުގައި ދައުރުވާ ލޭގެ އޮކްސިޖަން ލެވެލްގެ ބެލެން ހުރެއެެވެ. އަދި މީގެ އިތުރުން، އެންޓަރޓެއިންމަންޓުގެ ދައިރާއަށް ސަބްސްކްރިޕްޝަން ޚިދުމަތް ތައާރަފް ކޮށްދީ، ޑާޓާ ސްޓޯރޭޖާއި އަދި މިއުޒިކްގެ ދާއިރާއަށްވެސް އެޕްލްގެ ވިޔަފާރި މިހާރުވަނީ ފުޅާ ކޮށްފައެވެ.
"އެޕްލް ކުންފުނިންވަނީ، ކަސްޓަމަރުންނާ ވަރަށް ގާތް ގުޅުމެއް އުފައްދާފަ. އަދި އެ ކުންފުނިން ދަނީ، ކޯވިޑް ކާރިސާގެ ގޮންޖެހުންތަކާ އެކުވެސް، އޮންލައިންކޮށް، ވަކިވަކި ފަރުދުންނަށް ހައްލު ހޯދާ ދެމުން،" އިންޓަރ ބްރޭންޑުން ބުނެފައި ވެއެވެ.
