ރާއްޖެއަށް ހިޖުރަ ކުރި ފްލެމިންގޯ ދޫނިތަކެއް ހިފައި އެ ވިއްކަން އިއުލާން ކޮށްފައިވާ މައްސަލައެއް ފުލުހުން ބަލަން ފަށައިފިއެވެ.
މި ފްލެމިންގޯތައް އެންމެ ފުރަތަމަ ފެނިފައި ވަނީ ހއ. ފިއްލަދޫ ފުއްޓަރު ފަރާތު އަތިރިމަތިންނެވެ. މި ދޫނިތަކުގެ ފޮޓޯ ނަގައި ސޯޝަލް މީޑިއާ އަށް ލި ހއ. ފިއްލަދޫގެ ޒުވާން ފޮޓޯގްރާފަރު އަބްދުﷲ އިހުވާން ބުނީ އެ ރަށު އަތިރިމަތިން މި ދޫނިތައް އެންމެ ފުރަތަމަ ފެނުނީ މިދިޔަ އާދިއްތަ ދުވަހު މެންދުރު ފަހު ކަމަށެވެ. އޭނާ ބުނީ އެ ފްލެމިންގޯ އައިނުގައި 14 ދޫނި ތިބި ކަމަށެވެ.
ރާއްޖެއަށް އައިސްގެން އުޅޭ ފްލެމިންގޯ ދޫނިތައް ވިއްކާ އިއުލާން ކޮށްފައި ވަނީ ކުޅުދުއްފުށީ "ޕެޓް ލަވާސް" ކިޔާ ވައިބާ ގްރޫފެއްގަ އެވެ. ވިއްކަން ޖަހާފައިވަނީ 30،000 ރުފިޔާ އަށެވެ. މިކަމާ ގުޅޭގޮތުން އީޕީއޭއާއި ސުވާލު ކުރުމުން އީޕީއޭގެ ޑިރެކްޓާ ޖެނެރަލް އިބްރާހިމް ނައީމް ވިދާޅުވި މި މައްސަލަ ވަރަށް ސީރިއަސް ކަމާއެކު ފުލުހުންނާއި ގުޅިގެން ބަލާ ކަމަށާއި ޝާމިލްވާ މީހުނަށް ފިޔަވަޅު އަޅާނެ ކަމަށެވެ.
ހިމާޔަތްކުރެވިފައިވާ ދޫނި ހިފާ، ހައްޔަރުކޮށް އަދި ގޯނާކުރާ ފަރާތްތައް ޖޫރިމަނާ ކުރުމަށް އެންވަޔަރަންމަންޓް ޕްރޮޓެކްޝަން އެޖެންސީ (އީޕީއޭ) އިން ވަނީ ބުނެފައެވެ.
ހިމާޔަތްކުރެވިފައިވާ ދޫނި ހިފާ ހައްޔަރުކޮށް އަދި ގޯނާކުރާ ފަރާތްތަކާމެދު ތިމާވެއްޓަށް ގެއްލުން ދިނުމާއި، ޖޫރިމަނާ ކަނޑައެޅުމާއި ބަދަލު ހޯދުމުގެ ގަވާއިދާއި އެނޫންވެސް ގަވާއިދުތަކުގެ ދަށުން ޖޫރިމަނާ ކުރެވޭނެކަމަށް އީޕީއޭއިން ވަނީ ބުނެފައެވެ.
ކޮމެންޓު ފޮނުވާ