ދިވެހި ފުލުހުންގެ ޚިދުމަތުގެ ޤާނޫނަށް އަމަލު ކުރަންފެށިފަހުން ހޯމް މިނިސްޓަރ އިމްރާން އަބްދުﷲ އާއި އެވުޒާރާއިން ނިންމާފައިވާ ފުލުހުންނާއި ގުޅުންހުރި ކަންކަމާއިމެދު ރައްޔިތުންގެ މަޖިލީހުގެ މަހިބަދޫ ދާއިރާގެ މެމްބަރު އަހުމަދު ތޯރިޤު ސުވާލު އުފައްދަވައިފިއެވެ.
ފުލުހުންގެ ހިދުމަތުގެ ގާނޫނަށް އަމަލުކުރަން ފެށުމުން ހޯމް މިނިސްޓްރީގެ ދަށުން ފުލުހުންގެ މުއައްސަސާ ވަކިވެފައިވާކަމަށް ރައީސް އޮފީހުން ވަނީ ހޯމް މިނިސްޓަރ އިމްރާން އަބްދުﷲ އަށް ދަންނަވާފައެވެ. ހޯމް މިނިސްޓްރީގެ ދަށުން ފުލުހުން ވަކިކޮށް، ރައީސް އޮފީހުން ހޯމް މިނިސްޓަރު އިމްރާން އަބްދުﷲ އަށް މިދިޔަ އަންގާރަ ދުވަހު ފޮނުވި ސިޓީއެއްގައި ބުނެފައިވާ ގޮތުން، ދިވެހި ފުލުހުންގެ ހިދުމަތުގެ ގާނޫނުގެ ދަށުން އުފައްދާފައިވާ "ދިވެހި ފުލުހުންގެ ހިދުމަތް" އަކީ ވަކި މިނިސްޓްރީއެއްގެ ދަށުން ހިނގަމުންދާނެ އިދާރާއެއް ކަމަށް ކަނޑައަޅައިފައެއް ނުވެއެވެ. އެހެންވެ ހޯމް މިނިސްޓްރީގެ ދަށުން ފުލުހުންގެ އިދާރާ ހިނގަމުން ދާ ގޮތަށް އޮތް އޮތުން ބަދަލުކޮށްފައިވާ ކަމަށް ރައީސް ވިދާޅުވެފައިވާ ކަމަށް ސިޓީގައި ވެއެވެ.
ރައީސް އޮފީހުގެ މި ނިންމުމާއި ގުޅިގެން ތޯރިޤު ވިދާޅުވީ ދިވެހި ފުލުހުންގެ ޚިދުމަތުގެ ޤާނޫނަށް އަމަލު ކުރަން ފެށި ހިސާބުން ފުލުހުންގެ މުއައްސަސާ ހޯމް މިނިސްޓްރީގެ ދަށުން ވަކިވެފައިވާނަމަ މިވީ މުއްދަތުގައި ހޯމް މިނިސްޓްރީން ފުލުހުންނާއި ގުޅޭ ގޮތުން ނިންމާފައިވާ ނިންމުންތަކާއި، މަޖިލީހަށާއި، އެނޫން އިދާރާތަކަށް ފޮނުވާފައިވާ ލިޔެ ކިޔުންތަކާއިމެދުވެސް ޤާނޫނީ ގޮތުން ގިނަ ސުވާލުތަކެއް އުފެދޭކަމަށެވެ.
27/03 ފެށިގެން ފުލުހުންގެ ވަޒީރެއްގެ ބެލުމުގެ ދަށުގައި ނެތީތޯ؟ ޤާނޫނު އަސާސީގެ 242 އާއި، ޤާނޫނުގެ 68 ގައި ބަޔާންކުރާ ވަޒީރަކީކާކު؟ މިނިސްޓްރީގެ މެންޑޭޓް ބަދަލުވެގެން މަޖިލީހަށް ނުފޮނުވީ ކީއްވެ؟ 27/03 އިން 14/10 އަށް ހޯމްމިނިސްޓަރު ފުލުހުންގެ ކަންކަމާއި ފޮނުވި ސިޓީތަކަށް ޤާނޫނީބާރު ލިބެނީ ދެން ކިހެނެއް؟
– ޓޮމް ވިދާޅުވިއެވެ.
އެކަމަކު ގާނޫނުއަސާސީގެ 242 ވަނަ މާއްދާގައި ބުނެފައިވާ ގޮތުން، ސަލާމަތީ ކޮންމެ ހިދުމަތެއް ހިންގަން ވާނީ ވަޒީރުންގެ މަޖިލީހުގެ މެމްބަރެއްގެ ބެލުމުގެ ދަށުންނެވެ. އެ ވަޒީރެއްގެ ބެލުމުގެ ދަށުން ހިނގާ ސަލާމަތީ ހިދުމަތެއްގެ ކަންކަމާ ގުޅިގެން ރައީސުލްޖުމްހޫރިއްޔާ އަށާއި ރައްޔިތުންގެ މަޖިލީހަށް އެ ވަޒީރަކު ޖަވާބުދާރީ ވާން ވާނެ ކަމަށް ވެސް ގާނޫނުއަސާސީގައި ބުނެފައި ވެއެވެ.
ފުލުހުންގެ އިދާރާގެ މަސްއޫލިއްޔަތުތައް ހޯމް މިނިސްޓްރީގެ ޒިންމާތަކުގެ ތެރެއިން ނެގުމުން، ފުލުހުންގެ ނަމުގައި ޖަވާބުދާރީ ވާނީ ކޮން ވަޒީރެއް ކަމެއް އަދި ނޭނގެއެވެ. ސަރުކާރުގެ މިނިންމުމާއި ގުޅިގެން ގިނަ ބަޔަކު ސުވާލު އުފައްދަމުންދާއިރު، މިކަމުގައި ސަރުކާރުން އަދި ސާފު ވާހަކަތަކެއް ދައްކަވާފައިނުވެއެވެ. އަދި މިނިސްޓްރީ ފުލުހުންގެ މުއައްސަސާ ހިންގަނީ ކޮން ވަޒީރެއްގެ ބެލުމެއްގެ ދަށުން ކަމެއް، އަދި މިނިވަން މުއައްސަސާއަކަށް ވީކަމެއްވެސް ސާފެއް ނުވެއެވެ.
