އެމެރިކާގެ ކަޅު ނަސްލުން އައި، އެގައުމުގެ ފުރަތަމަ ސެކެޓްރީ އޮފް ސްޓޭޓް ކޮލިން ޕަވަލް ކޯވިޑްބަލީގައި ނިޔާވެއްޖެއެވެ. ކޯލިންޕަވަލްއަކީ އެމެރިކާގެ ސަރުކާރުގެ އިސްމަގާމްތަކުގައި އޭނާ ދައްކަވާފައިވާ ލީޑަރޝިޕްގެމައްޗަށް އެމެރިކާގެ މިއަދުގެ ޚާރިޖީ ސިޔާސަތުގެ ވަރަށްބޮޑު ބައެއް ބައްޓަންވެފައިވާ ބޭފުޅެއްގެ ގޮތުގައި އެމެރިކާގެ ގިނަ ބަޔަކު ދެކޭ ބޭފުޅެކެވެ.

ކޮލިން ޕަވަލްގެ އާއިލާގެ ފަރާތުން ފޭސްބުކްގައި އާންމު ކުރި ސްޓޭޓްމަންޓެއްގައި ބުނެފައިވަނީ، އުމުރުން 84 އަހަރުގެ ކޮލިން ޕަވަލް ނިޔާވެފައިވަނީ، ކޯވިޑްގެ އާލާސްކަންފުޅުގައި ކުރިމަތިވެ ވަޑައިގެންނެވި ސިއްޙީ މައްސަކަތަކާ ގުޅިގެން ކަމުގައެވެ.

"އެމެރިކާގެ ކުރީގެ ސެކެޓްރީ އޮފް ސްޓޭޓް، އަދި ކުރީގެ ޗެއަރމަން އޮފް ޖޮއިންޓް ޗީފް އޮފް ސްޓާފް، ޖެނެރަކް ކޮލިން ޕަވަލަ ވަނީ، ކޯވިޑ19ްގެ އާލާސްކަންފުޅުގައި ކުރިމަތިވެވަޑައިގެންނެވި ސިއްޙީ މައްސަލަތަކާ ގުޅިގެން މިއަދު ނިޔާވެއްޖެ،" އާއިލާގެ ފަރާތުން ފޭސްބުކްގައި އާންމު ކުރި ސްޓޭޓްމަންޓުގައި ބުނެފައި ވެއެވެ.

"އަހަރެމެންނަށް ގެއްލިގެން ދިޔައީ ލޮބިވެތި ފިރިއެއް، ޕައްބައެއް، ކާފައެއް، އަދި އެމެރިކާގެ ފަޚުރުވެރި ރައްޔިތެއް،" ކޮލިން ޕަވަލް ކޯވިޑް19 ވެކްސިން ފުރިހަމަ ކޮށްފައިވާކަން ފާހަގަ ކުރަމުން، އާއިލާގެ ފަރާތުން ނެރުނު ބަޔާނުގައި ބުނެފައި ވެއެވެ.

ކޮލިން ޕަވަލްގެ ކެރިއަރުގައި އޭނާ ފާހަގަ ވެގެން ގޮސްފައިވަނީ، ތޫނުފިލި، ޕްރޮފެޝަނަލް ސިފައިންގެ މީހެއްގެ ގޮތުގައެވެ. އެހެންނަމަވެސް އޭނާގެ ގައުމީ ޚިދުމަތްތަކުގައި، ވިއެޓްނާމު ހަގުރާމާގައި ބައިވެރިވި ސިފައިންގެ މީހެއްގެ ވަޒީފާއިން ފެށިގެން ގޮސް، އެމެރިގާގެ ކުރީގެ ރައީސް ރޮނަލްޑް ރޭގަންގެ ވެރިކަމުގެ ފަހު ދުވަސްކޮޅު، އެމެރިކާގެ ކަޅު ނަސްލުން އައި އެންމެ ފުރަތަމަ ނޭޝަނަލް ސެކިއުރިޓީ އެޑްވައިޒަރަށް ވެވަޑައިގަތުމުގެ އިތުރުން، އެމެރިކާގެ ކުރީގެ ރައީސް ޖޯޖް އެޗް. ޑަބްލިއު ބުޝް (ފުރަތަމަ ބުޝް)ގެ ވެރިކަމުގައި އެމެރިކާގެ އެންމެ ހަނގު އަދި ކަޅު ނަސްލުން އައި ފުރަތަމަ ޗެއަރމަން އޮފް ޖޮއިންޓް ޗީފްސް އޮފް ސްޓާފްގެ މަގާމާއި ހަމައަށްވެސް އެނާ ދަތުރު ކޮށްފައި ވެއެވެ.

އެމެރިކާގައި އާންމުންގެ މެދުގައި އޭނާއަށް އޮތް ތާޢީދު އެންމެ ބޮޑުވެގެން ދިޔައީ ގަލްފު ހަގުރާމާގައި އެމެރިކާ އިސްވެ އޮވެ، އިރާގު ސިފައި ކުވެއިތުން ބޭލުމަށް ކުރި ހަނގުރާމާގައި ކޯލިޝަން ފައުޖުތަކަށް އެހަގުރާމާގައި ލިބިގެންދިޔަ ކާމިޔާބީއަށް ފަހުއެވެ.

އަދި 90ގެ އަހަރުތަކުގައި، އޭނާ ފާހަގަވެގެން ދިޔައީ، އެމެރިކާގެ ކަޅު ނަސްލުގެ ފުރަތަމަ ރައީސަށް ވެވަޑައިގަންނަވާނެ ބޭފުޅެއްގެ ގޮތުގައެވެ.

އެހެންނަމަވެސް، އޭނާއަށް އޮތް ތާއީދު އެމެރިކާގައި އަބަދަށްޓާކާ ގެއްލިގެން ދިޔައީ، އެމެރިކާގެ ކުރީގެ ރައީސް ޖޯޖް ޑަބްލި ބުޝް (ދެވަނަ ބުޝް)ގެ ވެރިކަމުގައި އެމެރިކާގެ އޭރުގެ ސެކެޓްރީ އޮފް ސްޓޭޓްގެ ހައިސިއްޔަތުން ނުރަގަޅު ޖާސޫސީ މައުލޫމާތުގެ ބޭނުން ކޮށްގެން، އެމައުލޫމާތު ޔޫއެންއަށް ހުށަހަޅާ، އެމެރިކާ ސިފައިން އީރާގަށް އެރުމަށް ހިތްވަރުދީ އޭނާ ކުރި މަސައްކަތްތަކުގެ ނަތީޖާއެއްގެ ގޮތުންނެވެ. އޭނާ މިކަން ސިފަ ކޮށްފައިވަނީ އޭނާގެ މާޒީގައި ޖެހުނު "ކަޅު ލައްގަޑެއް"ގެ ގޮތުގައެވެ.