އދ.ދަނގެތީގައި އަނިޔާވެރިކަމާއެކު މަރާލާފައި އޮތްވައި ފެނުނު މަޙުމޫދު އަބޫބަކުރުގެ މަރުގެ ތުހުމަތުގައި ހައްޔަރުކުރި ބިދޭސީ މީހާ ސާލިމް މަހުމޫދުގެ ޖަނާޒާގައި ބައިވެރިވެފައިވާކަން އެގިއްޖެއެވެ.
މަހުމޫދު މަރާލުމުގެ ތުހުމަތު ކުރެވޭ ސާލިމް ލައްވާ ހާދިސާގެ ހުރިހާ މަންޒަރެއް ކުޅުވައި، އޭނާ ވަނީ ފުލުހުންގެ ބެލުމުގެ ދަށުން އދ.މަހިބަދޫއަށް ރޭ ގެންގޮސްފައެވެ. މަހުމޫދުގެ ޖަނާޒާ ބާއްވާފައިވަނީ ހުކުރު ދުވަހުގެ ހަވީރުއެވެ. ޖަނާޒާގައި ސާލިމް ބައިވެރިވެފައިވާއިރު، އޭނާ އެދުވަހުވެސް ލައިގެން ހުރީ ފުލުހުން އޭނާ ހައްޔަރުކޮށް މަންޒަރުތައް ކުޅުވި އިރުވެސް ލައިގެން ހުރި ގަމީހެވެ.
ބޮޑަށް ބެލެވޭ ގޮތުގައި އޭނާ އެގަމީސް ލައްވައިގެން މަންޒަރުތައް ކުޅުވީ، މަހުމޫދަށް ހަމަލާދިންރޭވެސް އޭނާ އެގަމީސް ލައިގެން ހުރުމުންކަމަށް ބެލެވެއެވެ.
މަހްމޫދުގެ މަރާ ގުޅިގެން މީގެކުރިން ތިން ދިވެއްސަކު ފުލުހުންގެ ބެލުމުގެ ދަށަށް ގެންދިޔައެވެ. އެއީ ދެ ފިރިހެނަކާއި އަންހެނެކެވެ. އެ ތިން މީހުން މިހާރު ހައްޔަރުކޮށްފައިވާއިރު މިވަގުތު އެ މީހުން ހައްޔަރުކޮށްފައި ތިބީ މަހްމޫދުގެ މަރުގެ ތުހުމަތުގައި ނޫން ކަމަށް ފުލުހުން ބުނެއެވެ.
މަޙުމޫދު މަރާލާފަ އޮއްވައި ފެނިފަވަނީ ބުރާސްފަތި ދުވަހުގެ މެންދުރު ފަހުގެ ވަގުތެއްގައެވެ. އޭނާ އޮތީ މަރާލުމަށްފަހު، ފަޅު ގެއްގެ ތެރޭގައި ހުރި ވަޅަކަށް އެއްލާލާފައެވެ. ހަށިގަނޑުގެ އެކިތަންތަނަށް ވަޅިން ޙަމަލާދީފައިވާ ގިނަ ނިޝާންތައް ހުރިކަމަށް މަންޒަރުދުން މީހުން ބުނެއެވެ. އަދި އިތުރު ތަޙުލީލުތަކަށް މަޙުމޫދުގެ ހަށިގަނޑު މާލެ ގެނައުމަށްފަހު، އަނބުރާ ރަށަށްގެންގޮސް ހަށިގަނޑު ހުކުރު ދުވަހުގެ ހަވީރުއެވެ.
މަޙުމޫދުގެ ޚަބަރެއް އެންމެ ފަހުންވެފައިވަނީ ބުދަދުވަހުގެ ރެއެވެ. އެހެންކަމުން ބެލެވެނީ އޭނާއަށް ޙަމަލާދީ މަރާލާފައިވަނީ އެރޭގެ ދަންވަރުގެ ވަގުތެއްގައިކަމަށެވެ.
