އިނގިރޭސި ޕްރިމިއާ ލީގުގައި ހޮނިހިރު ދުވަހުގެރޭ ބްރެންޓްފޯޑް ބަލިކޮށް ތާވަލުގެ އެއްވަނައަށް ޗެލްސީ އަލުން ޖެހިލިއިރު، ލެސްޓާ ސިޓީ އަތުން މެންޗެސްޓާ ޔުނައިޓެޑް ބަލިވެއްޖެއެވެ.
މި މެޗު ޗެލްސީ ކާމިޔާބުކޮށްފައިވަނީ 1-0 ގެ ނަތީޖާއަކުންނެވެ. ލަނޑުޖަހާނެ ގިނަ ފުރުސަތުތަކެއް މި މެޗުގައި ޗެލްސީއަށް ލިބިގެންދިޔައެވެ. މި މެޗުގައި ފެނިގެންދިޔަ ހަމައެކަނި ލަނޑު ޗެލްސީން ކާމިޔާބުކޮށްފައިވަނީ ފުރަތަމަ ހާފުގެ އިތުރު ވަގުތުގައެވެ. މި ލަނޑު އެ ޓީމަށް ކާމިޔާބުކޮށްދިނީ އިންގްލެންޑުގެ ޑިފެންޑަރު ބެން ޗިލްވެލްއެވެ. މި މެޗުގައި ޗިލްވެލް ލަނޑު ޖެހިއިރު، ޗެލްސީ އާއި އިންގްލެންޑަށް އެންމެ ފަހުން ކުޅެދިން ތިން މެޗުގައިވެސް ޗިލްވެލް ވަނީ ލަނޑު ޖަހާފައެވެ.
ޗިލްވެލްގެ ލަނޑުން ޗެލްސީން ލީޑު ނެގި ނަމަވެސް، އޭގެ ފަހުން ބްރެންޓްފޯޑުން ވަނީ ޗެލްސީގެ ގޯލަށް ނުރައްކާކޮށް ގިނަ ހަމަލާތަކެއް ފޮނުވާލާފައެވެ. އެކަމަކު އެ ހަމަލާތަކުގެ ހުރަހަކަށްވީ މެޗުގައި ތަފާތު މޮޅު ކުޅުމެއް ދެއްކި ޗެލްސީގެ ގޯލްކީޕަރު އޮޑެއާޑް މެންޑީއެވެ. އެގޮތުން މެޗުގެ އިތުރު ވަގުތުގައި އޭރިއާ ތެރެއިން ބްރެންޓްފޯޑުގެ ކްރިސްޓިއަން ނޯގާޑް ފޮނުވާލި ނރައްކާތެރި ހަމަލާއެއްވެސް މެންޑީ ވަނީ ހުއްޓުވާފައެވެ.
މި މެޗަށް ނުކުތްއިރު ޗެލްސީއަށް ތާވަލުގެ އެއްވަނަ މަގާމު ގެއްލުނީ ހޮނިހިރު ދުވަހުގެ ހަވީރު ކުޅުނު މެޗުން ވަޓްފޯޑް އަތުން ފަސޭހަކަމާއެކު 5-0 ގެ ނަތީޖާއަކުން ލިވަޕޫލް މޮޅުވުމުންނެވެ. އެކަމަކު ބްރެންޓްފޯޑް އަތުން ހޯދި މޮޅާއެކު ތާވަލުގެ އެއްވަނައަށް ޗެލްސީ އަލުން ޖެހިލިއިރު، އެ ޓީމަށް ވަނީ ކުޅުނު އަށް މެޗުން 19 ޕޮއިންޓް ލިބިފައެވެ. އަދި ދެވަނައިގައި އޮތް ލިވަޕޫލަށް އަށް މެޗުން ލިބިފައިވަނީ 18 ޕޮއިންޓެވެ.
