އދ.ގަނގެތީގެ އެންމެ ފާހަގަކޮށްލެވޭ ވިޔަފާރިވެރިންގެ ތެރޭގައި ހިމެމޭ ދަނގެތީ މޮނަލާޒް، މަހްމޫދު އަބޫބަކުރު ވަރަށް އިހާނެތި ގޮތަކަށް މަރާލުމަށްފަހު ގޯންޏަކަށްލައި، ވަޅަކަށް އެއްލާލާފައި އޮއްވާ ފެނުނީ އިއްޔެގެ ވަގުތެއްގައެވެ. ބުދަ ދުވަހުގެރޭ ރާއްޖެއާއި، އިންޑިއާ ކުޅުނު މެޗަށްފަހު އާއިލާއަށް އޭނާގެ ހަބަރެއް ނުވެއެވެ. އަދި ރަށުގެ އެހެން މީހަކަށްވެސް އޭނާގެ ޚަބަރެއް ނުވެއެވެ.
މަހުމޫދު ފެނުނީ ފަޅުގެއެއްގެ ތެރޭގައި ހުރި ވަޅަކަށް ވައްޓާލާފައި އޮއްވައެވެ. އޭރު މަހުމޫދަށް އޮތީ ބޮޑެތި ޒަހަމުތަކެއް ދިނުމަށް ފަހު އަތާއި ފައި ގޯންޏަކުން ބަދެ ގޯނީގެ ތެރެއަށްލާފައެވެ. މިއީ ދަގެތީގައި މިހާތަނަށް ހިންގުނު އެންމެ ރަހުމްކުޑަ އަނިޔާވެރި އަމަލެވެ. މަހުމޫދުގެ މަރުގެ ހަބަރާއިއެކު މުޅި ދަނގެތި ވަނީ ހުއްޓުަކަށް އައިސްފައެވެ. ރަށުގެ ރައްޔިތުންގެ ހިތްތަކުގައި ވަނީ ބޮޑު ބިރުވެރިކަމެއް އުފެދިފައެވެ. ރަށަށް އަރާ މީހުންނާއިމެދުވެސް އެރަށުގެ ރައްޔިތުންގެ ހިތްތަކުގައި ވަނީ ބިރުވެރިކަމާއި ނުތަނަވަސްކަން އުފެދިފައެވެ. ސަބަބަކީ މަހުމޫދު މަރުގެ އެންމެ ބޮޑު ތުހުމަތެއް ކުރެވެނީވެސް ރަށުން ބޭރުން ރަށަށް އެރި ދެމީހަކަށް ވުމެވެ.
އެންމެން ވެސް ދައްކަނީ އެއް ވާހަކައެވެ. މި ރަށަކީ މިކަހަލަަ ކުށްތައް ދަންނަ ރަށެއް ނޫނެވެ. ހަގީގަތަކީ މިއީ މި ރަށު ބަޔަކު ކުރި ކަމެއް ވެސް ނޫން މެ އެވެ. މިއީ ކުށުގެ ވެށިން، ރަށަށް އައި ބަޔަކު ހިންގި ޖަރީމާއެކެވެ. އެކަމުން ރަށަށް ހުތުރު ނަމެއް ލިބޭކަށް އެ މީހުން ނޭދެއެވެ. ދަނގެތީގައި ތިބި އެންމެ ދުވަސްވީ މީހުން ވެސް ބުނަނީ އެ މީހުންގެ ހަޔާތުގައި ވެސް މިފަދަ ކަމެއް ދިމާވި މިއީ ފުރަތަމަ ފަހަރު ކަމަށެވެ. އަދި މިވަރުގެ ބޮޑު އެހެން ކުށެއް ވެސް މީގެ ކުރިން މި ރަށުގައި ނުކުރެއެވެ.
މަހުމޫދުގެ ހަށިގަނޑު ފެނުނުއިރު ތޫނު އެއްޗަކުން އެތައް ފަހަރަކު ހަމަލާދީފައި ހުއްޓެވެ. ބައެއް ޒަހަމުތައް ވަރަށް ފުނެވެ. ބޯކޮޅާއި ދެ ފައިގައި ގޯނި އައްސައި ބޯ ވަތަށް ވަޅަކަށް އެއްލާލާފައި އޮއްވާ މަހުމޫދު ފެނުނީ އޭނާ ހޯދަން ނުކުމެ އުޅުނު އަންހެނުންތަކަކަށެވެ. ފަޅު ގޯއްޗެއްގައި ހުރި އެ ވަޅުން އޭނާ ފެނުމުން އެ މީހުން ރޮއި ހަޅޭއްލަވައިގަތް އަޑަށް އިތުރު މީހުން އެތަނަށް އެއްވިއެވެ. ގިނަ ބަޔަކު އެތަނަށް އެއްވެ، އޭނާއާ މެދު ކަންތައް ކޮށްފައި އޮތް އިހާނެތިކަން ފެނިފައި އޭނާގެ ހަށިގަނޑު ވަޅުން ނަގަން ވެސް ބޭނުންވި އެވެ. އެކަމަކު، ރަށުގައި ތިބި ތިން ފުލުހުން ބުނީ ފޮރެންސިކް ޓީމް އަންނަންދެން ހަށިގަނޑު ވަޅުން ނުނެގޭނެ ކަމަށެވެ.
މަޙުމޫދު މަރާލިކަމަށް، ރަށުގެ ރައްޔިތުން ޝައްކުކުރާ 3 މީހަކު ވަނީ ފުލުހުންނާ ހަވާލުކޮށްފައެވެ. މީގެތެރޭގައި ހިމެނެނީ 2 ފިރިހެނުންނާ އަންހެނެކެވެ. މި 3 މީހުން އަދިވެސް ތިބީ ދަނގެތީ ފުލުހުންގެ ބެލުމުގެދަށުގައެވެ.
މިހާތަނަށް ފުލުހުން އެއްވެސް މަޢުލޫމާތެއް ހާމަކޮށްފައި ނުވިނަމަވެސް، ރަށުގެ ރައްޔިތުން ބުނަނީ މަޙުމޫދު މަރާލިކަމަށް ބެލެވެނީ ފައިސާ ބޭނުމުގަކަމަށެވެ. އެގޮތުން އޭނާއަކީ ރަށުގައި ގޭހާއި ކާޑުގެ ވިޔަފާރިކުރުމާއި، ޑައިވިންގ 2 ދޯންޏާއި އަދި ކެފޭއެއްވެސް ހިންގާ މީހެކެވެ. ރަށުގެ ރައްޔިތުން ބުނަނީ މަޙުމޫދަކީ ރަށުގެ ރައްޔިތުންނާ ގުޅޭ، ހިތްހެޔޮ އެކުވެރިއެއްކަމަށެވެ. އަދި އެއްވެސް މީހަކާ މައްސަލަޖެހި، ފައިސާގެ މައްސަލައެއްގައިވެސް އުޅޭ މީހުން ނޫންކަމަށް އެ ރަށު ރައްޔިތުން ބުނެއެވެ.
މަޙުމޫދުގެ ހަށިގަނޑު އިތުރު ތަޙުލީލުތަކަށް މާލެ ގެނައުމަށްފަހު އަނބުރާ ދަނގެއްޗަށް ގެންގޮސްފައެވެ. އޭނާގެ ޖަނާޒާ އޮތީ މިއަދު އަސުރު ނަމާދަށްފަހުއެވެ. މަޙުމޫދުގެ ހަށިގަނޑު މާލެ ގެނެސްފައި ވަނީ މިއަދު ހެނދުނުގެ ވަގުތެއްގައެވެ. މަޙުމޫދުގެ ޓެސްޓުތައް ހަދާފައިވަނީ އައިޖީއެމް ހޮސްޕިޓަލްގައެވެ. މަޢުލޫމާތު ލިބޭގޮތުގައި މާލެ ގެސްފައިވަނީ ސީޓީ ސްކޭނެއް ހެދުމަށެވެ.
މަހުމޫދުގެ އަނިޔާވެރި މަރާއި ގުޅިގެން ދަނގެތީގެ ރައްޔިތުންނަށް ލިބިފައިވާ ކުއްލި ސިހުމާއެކުވެސް އެރަށު ރައްޔިތުން ތިބީ އަވަސް އިންސާފަކަށް ބޭނުންވެފައެވެ. ލަސްނުކޮށް މިމަރަށް އިންސާފު ހޯދައި މިކަން ކުރި މީހުންނަށް ހައްގު އަދަބު ކަނޑައެޅުމަަކީ އެރަށު ހުރިހާ ރައްޔިތުންވެސް ބޭނުންވާ ގޮތެވެ. އަދި މިފަދަ ލާއިންސާނީ އަނިޔާވެރި އަމަލުތަކަކީ ދަނގެތީގެ ރައްޔިތުން ތާއީދު ނުކުރާނެ ކަމެއްކަން އެރަށު ކައުންސިލުންވަނީ ބުނެފައެވެ. މިމަރާއި ގުޅިގެން ފުލުހުންގެ ފޮރެންސިކް އަދި ކަމާއި ގުޅުންހުރި އެހެނިހެން ޓީމުތައްވެސް ވަނީ ދަނގެތީގައި ހަރަކާތްތެރި ވަމުންނެވެ.
