އދ.ދަނގެތީ މޮނަލާޒް މަހްމޫދު އަބޫބަކުރު އަނިޔާވެރިގޮތަކަށް މަރާލި މައްސަލާގައި ޝާމިލްވާ މީހުން ހޯދާ ހަރުކަށި އަދަބު ދިނުމަށް ދަނގެތި ދާއިރާގެ މެންބަރު އަދި މޯލްޑިވްސް ނޭޝަނަލް ޕާޓީގެ ރައީސް ކާނަލް މުޙައްމަދު ނާޒިމް ގޮވާލައްވައިފިއެވެ.
ނާޒިމް ކުރެއްވި ޓްވީޓެއްގައި ވަނީ، އދ.ދަނގެތީގެ މަޝްހޫރު ވިޔަފާރިވެރިޔާ މޮނަލާޒް މަހްމޫދު އަބޫބަކުރު އަނިޔާވެރިގޮތަކަށް މަރާލައި ވަޅަކަށް ވައްޓާލާފައި އޮތްއޮތުން، ހަރުކަށި އިބާރާތުން ކުއްވެރިކުރާކަމަށެވެ. ނާޒިމް ވަނީމި ޖަރީމާ ހިންގި ބަޔަކު ހޯދާ ހަރުކަށި އަދަބު ދިނުމަށް ފުލުހުންނަށް ގޮވާލާފައެވެ.
އާމީން. މި ޖަރީމާ ހިންގި ބަޔަކު ހޯދާ ހަރުކަށި އަދަބު ދިނުމަށް ފުލުހުންނަށް ގޮވާލަން.
— Col(rtd)Mohamed Nazim MP (@nazim7878) October 14, 2021
ދަނގެތި ކައުންސިލުން ބުނީ މަރާލާފައި އޮއްވާ ފެނިފައިވަނީ ޢުމުރުން 57 އަހަރުގެ، އެ ރަށު މޮނަލާޒު, މަހުމޫދު އަބޫބަކުރުއެވެ. ރޭ އޮތް މެޗް ބެލުމަށްފަހު ގެއިން ބޭރަށް ދިޔަގޮތަށް އޭނާގެ ޚަބަރެއް ވެފައިނުވާތީ އޭނާ ހޯދުމުގެ މަސައްކަތް ކުރަމުން ދަނިކޮށް ފެނުނީ އޭނާ މަރާލާފައި އޮއްވައެވެ. މިގޮތުން ފުލުހުންނާއި އަދި އެމްއެންޑީއެފްގެ އެހީތެރިކަމާއެކު އޭނާ ހޯދުމުގެ މަސައްކަތް ފަށާފައިވަނީ މިއަދު ހެނދުނުއެވެ. މިމަސައްކަތުގައި އެރަށުގެ ފަޅާއި ރަށު ތެރެވެސް ބަލާ ފާސްކޮށްފައި ވެއެވެ.
މައުލޫމާތު ލިބިފައިވާ ގޮތުގައި މަރާލާފައި އޭނާ އެއްލާލާފައި އޮތީ ވަޅަކަށެވެ. އަދި އޭނާވަޅަށް ވައްޓާލާފައި އޮތްއިރު، އޭނާގެ ބޮލަށާއި ދެފަޔަށް ސުތުލި ގޯންޏެއް އެރުވުމަށްފަހު ކަމަށްވެސް އަރަށުން ވާހަކަ ދެއްކި ބައެއް ފަރާތްތަކުން މައުލޫމާތު ދީފައި ވެއެވެ.
މިމައްސަލާގައި މިހާތަނަށް އެއްވެސްމީހަކު އަދި ހައްޔަރު ކޮށްފައި ނުވާކަމަށް ފުލުހުން ބުނެފައިވި ނަމަވެސް، އެރަށުން ވާހަކަ ދެއްކި ބައެއް މީހުން ބުނެފައިވާ ގޮތުގައި އޭނާ މަރާލުމުގައި ބައިވެރިވެފައިވާ ކަމަށް ތުހުމަތުކުރެވޭ ދެމީހަކު އެރަށުގެ ރައްޔިތުންވަނީ ފުލުހުންނާ ހަވާލުކޮށްފައެވެ. އެހެންނަމަވެސް އެއީ ކޮން ދެމީހަކު ކަމެއް އަދި ސާފުވެފައެއް ނުވެއެވެ.
މަހުމޫދަކީ އެރަށުގައި ކެފޭއެއް ހިންގަމުން އަންނަ ވިޔަފާރިވެރި އެކެވެ. އޭނާގެ ތިން ދަރިންނާއި އަތްނބަކު އެބަ ހުއްޓެވެ.
