ހުޅުމާލޭ ދެވަނަ ފިޔަވަހީގައި އިމާރާތް ކޮށްފައިވާ ހިޔާ ފްލެޓްތަކާއި ގުޅޭ މައްސަލަ ހުށަހެޅުމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ހާއްސަ ހޮޓަލައިނެއް ތައާރަފް ކޮށްފިއެވެ.
އެޗްޑީސީން ބުނީ، ހިޔާ ފްލެޓްތަކާއި ގުޅޭގޮތުން މައްސަލައެއް އޮޅުން ފިލުވުމަށް ނުވަތަ މައްސަލައެއް ހުށަހަޅަން ބޭނުންވާ ފަރާތްތަކަށް އެ އިދާރާގެ 7253535 ނަމްބަރަށް މެސެޖު ކޮށްލައިގެން މައްސަލަ ހުށަހެޅޭނެ ކަމަށެވެ.
އެޗްޑީސީން ބުނީ މި ތައާރަފް ކުރެވުނު ހޮޓްލައިންއާއެކު ގިނަ މައްސަލަތަކަށް ހައްލު ލިބިގެންދާނެ ކަމަށް އުންމީދު ކުރާ ކަމަށެވެ. އަދި ހިޔާ ފްލެޓްތަކުގައި ދިރިއުޅޭ އާއިލާތަކަށް ވަރަށް ބޮޑު ލުޔެއް ލިބޭނެ ކަަމަށް އެޗްޑީސީން ބުނެއެވެ. ހޮޓްލައިންއަށް މެސެޖްކުރާއިރު، އެ މެސެޖުގައި މީހާގެ ފުރިހަމަ ނަން، ގުޅޭނެ ފޯނު ނަމްބަރު، ފްލެޓް ނަމްބަރު އަދި މައްސަލަ ނުވަތަ އޮޅުން ފިލުވަން ބެނުންވާ މައުލޫމާތު ފޮނުވަން ޖެހެއެވެ.
For any queries/requests regarding Hiya flats, please send an SMS to 7253535. pic.twitter.com/TpMWpPcHPM
— HDC (@hdcmaldives) October 13, 2021
އެޗްޑީސީން އެކުލަވައިލި އެ ހޮޓްލައިން ނަންބަރު މެދުވެރިކޮށް ހިޔާ ފްލެޓާ ގުޅޭ މައުލޫމާތު ސާފުކުރުމާއި، އިތުރު ކަންކަން ވެސް ހުށަހެޅޭނެއެވެ.
ހުޅުމާލޭ ދެވަނަ ފިޔަވަހީގައި އިމާރާތް ކޮށްފައިވާ ފްލެޓްތަކުގައި މިހާރު ބައެއް އާއިލާތައް ދިރިއުޅެމުން އަންނައިރު، ބައެއް ފަރާތްތަކަށް ދަތިތަކެއް ހުރުމުންނާއި ތަނުގައި މައްސަލަތަކެއް ހުރުމުން އަދި ބަދަލުވެވޭ ގޮތް ވަނީ ނުވެފައެވެ.
