ސާފް ޗެމްޕިއަންޝިޕްގެ ފައިނަލުން ފުރުސަތު ނުލިބުމުގެ ފުރިހަމަ ޒިންމާ ނަގާކަމަށް ޤައުމީ ފުޓްބޯޅަ ޓީމްގެ ކޯޗު އަލީ ސުޒޭން ބުނެފިއެވެ.

މުބާރާތުގެ ފުރަތަމަ މެޗުގެ ކުރިން ސުޒޭން ބުނެފައި ވަނީ، ދިވެހި ކޯޗުންނަށް ރާއްޖޭގެ ގައުމީ ޓީމު މެނޭޖު ކުރެވޭނެކަން ސާބިތުކޮށްދޭން ބޭނުންވާ ކަމަށެވެ. އޭނާގެ ކޯޗުކަމުގެ ދަށުން ގައުމީ ޓީމަށް ކުރިމަތިވި ނާކާމިޔާބާއެކު ދިވެހިންނަށް މިކަން ނުވާނެކަން ގަބޫލު ކުރަންތޯ ސުވާލު ކުރުމުން ސުޒޭން ބުނީ ދިވެހިންނަށް އެކަން ކުރެވޭނެކަން ސާބިތުވާނެ ވަރުގެ ރަނގަޅު ކަންތައްތަކެއް ޓީމުން ފެނުނު ކަމަށެވެ.

މެޗުން ބަލިވުމުގެ 100 ޕަސެންޓް ޒިންމާ ނަގާނީ އަޅުގަނޑު. މިއަދުގެ މެޗުގައި ކުޅުންތެރިން ވަރަށް މަސައްކަތްކުރި. މެޗުގެ ކުރީކޮޅު ކުދިކުދި މިސްޓޭކްސްތަކެއް ހެދުނީ. ތަންކޮޅެށް ސޮފްޓް ގޯލްތަކެއް ފެނުނީ.

– ސުޒޭން ބުންޏެވެ.

އިންޑިޔާއިން މި މެޗަށް ތައްޔާރުވީ ތަފާތު ގޮތަކަށްކަން އިނގޭކަމަށާއި، ނަމަވެސް ދިވެހި ޓީމުން ބޭނުންވި ގޮތަށް މި މެޗުގައި ނުކުޅެވުނީކަމަށެވެ. މި މެޗު ފެށުން ދިޔައީ ވަރަށް ގޯސްކޮށްކަމަށާއި، އިންޑިޔާއިން އެޓީމުގެ ތަޖުރިބާކާރު ކުޅުންތެރިންގެ ބޭނުން ވަރަށް ރަނގަޅަށް ހިފައިފިކަމަށްވެސް އޭނާ ބުންޏެވެ. ކޯޗު ސުޒޭން ބުނީ ރާއްޖެ ކޮޅަށް ވަތް ލަނޑުތަކުގައި ކީޕަރު ފައިސަލްވެސް ފެނުނީ ތަންކޮޅެއް ފަސޭހަކޮށްކަމަށާއި، މެޗުގައި އުއްމީދުކުރިގޮތަށް ގިނަ ކަންކަން ނުދިޔަކަމަށެވެ.

ސުޒޭން ބުނީ ދިވެހިން މިކަން ވާނެ ކަމުގެ ވަރަށް ރަނގަޅު ޕޮޒިޓިވް ކަންތައްތަކެއް ވެސް މި މުބާރާތުގެ ތެރެއިން ފެނިއްޖެ ކަމަށެވެ.

އަޅުގަނޑުމެން އެންމެން ވެސް މިތިބީ މާޔޫސްވެފައި. މިދިޔަ އަހަރުގެ ތަށި ހޯދުމުގައި މިއޮތީ ނާކާމިޔާބުވެފައި. އެހިސާބުން މިއީ ދިވެހިންގެ ކޯޗިން ކެރިއާގައި ދުވަހަކު ވެސް ގައުމީ ޓިމެއް ހަވާލު ކުރުން އެއްވެސް ފެކްޓެއް ނެތި ބުނުން އެހާ ރަނގަޅު ކަމެއް ނޫން. އަދި އަޅުގަނޑު ނެތް ކަމުގައި ވިއަސް ވަރަށް ބޮޑު މަލާމާތެއް އެ ރައްދުވަނީ ހަމަ.

– އޭނާ ބުންޏެވެ.

އަނިޔާއަށް ފަހު ފައިސަލް މިރޭ ކުޅެން ނެރުނީ ސުޒޭން ބުނި ގޮތުގައި އެމްއާރްއައި ސްކޭނުން ވެސް އަނިޔާގެ މައްސަލައެއް ނެތްކަމަށް ދެއްކުމުންނެވެ. ސުޒޭން ބުނީ މި މުބާރާތުން ފެނުނު ކަންކަމަށް ބަލާއިރު ރާއްޖޭގެ ކޯޗަކަށް މި ތަށި ނުހޯދޭންވީ އެއްވެސް ސަބަބެއް ނެތްކަމަށް. އަދި ކުރިއަށް އޮތް ތާނގައި އެ ފުރުސަތު ލިބޭނެކަމަށް އުއްމީދުކުރާކަމަށްވެސް ސުޒޭން ބުންޏެވެ.