އުފަންވެނިވި ޞިއްޙަތުގެ ޚިދުމަތުގެ ސެންޓަރެއް ހުޅުމާލެ ހޮސްޕިޓަލްގައި ފަށައިފިއެވެ. މިއީ އޮސްޓްރޭލިއަން އެއިޑްގެ ދަށުން، ޔުނައިޓެޑް ނޭޝަންސް ޕޮޕިއުލޭޝަން ފަންޑްގެ އެހީގައި ޤާއިމުކުރި "ރިޕްރޮޑަކްޓިވް ހެލްތު ސެންޓަރ"އެކެވެ. މި ސެންޓަރުގެ ޚިދުމަތް ފައްޓަވައިދެއްވީ ޑިރެކްޓަރ ޖެނެރަލް އޮފް ޕަބްލިކް ހެލްތު މައިމޫނާ އަބޫބަކުރުއެވެ.
އެ ސެންޓަރުން ފޯރުކޮށްދިނުމަށް ހަމަޖެހިފަވާ ޚިދުމަތްތަކުގެ ތެރޭގައި މާބަނޑުމީހުންގެ ކުލިނިކު، ތުއްތުދަރިފުޅާއި މައިމީހާގެ ކުލިނިކު، އާއިލާ ރޭވުމުގެ ޚިދުމަތާއި ފުރާވަރު އުމުރުގެ ކުދިންނަށް ކައުންސިލިން ދިނުމުގެ ޚިދުމަތް ހިމެނެއެވެ.
ހުޅުމާލޭ ހޮސްޕިޓަލުގެ ސީ.އީ.އޯ މާރިޔާ ސައީދު ވިދާވީ ވަކި ސެންޓަރެއްގެ ގޮތުގަ ޚިދުމަތް ފެށިގެންދާއިރު، ބޭނުންކުރާ މެޑިކަލް އިކުއިޕްމަންޓްތައް އަޕްގްރޭޑްކުރުމުގެ އިތުރުން މުވައްޒަފުންނަށް އިތުރު ތަމްރީނުތައްވެސް ދީފައިވާކަމަށެވެ. އަދި ކުރިން ކުރިމަތިވި ގިނަ ގޮންޖެހުންތައް ޙައްލުކޮށް، ފެންވަރު ރަނގަޅު ފުރިހަމަ ޚިދުމަތެއް ރައްޔިތުންނަށް ފޯރުކޮށްދެވޭނެކަމުގެ ޔަގީންކަން މާރިޔާ ދެއްވިއެވެ. ޚާއްސަކޮށް އުފަންވެނި ޞިއްޙަތުގެ ޚިދުމަތް ދިނުމުގައި ކުރިން ދިމާވި ޖާގައިގެ ދަތިކަމަށް ހައްލެއް ލިބި، ފެންވަރު ރަނގަޅު ޚިދުމަތެއް ފޯރުކޮށްދިނުމަށް މަގުފަހިވެގެން ގޮސްފައިވާކަން އޭނާ ވިދާޅުވިއެވެ.
މި ރަސްމިއްޔާތުގައި ޔޫއެން އެފް.ޕީ.އޭއިން ހުޅުމާލެ ހޮސްޕިޓަލަށް ވެދެއްވި އެހީތެރިކަން ފާހަގަކޮށް، ހުޅުމާލޭ ހޮސްޕިޓަލުގެ ފަރާތުން ޔޫ،.އެން.އެފް.ޕީއޭއަށް ވަނީ ހަނދާނީ ފިލައެއް އަރުއްވާފައެވެ. ޔޫ.އެން.އެފް.ޕީއޭގެ ފަރާތުން މިފިލައާއި ހަވާލުވެވަޑައިގަތީ ޔޫއެންއެފް.ޕީ.އޭ މޯލްޑިވްސްގެ ހެޑް އޮފް އޮފީސް ޝާދިޔާ އިބްރާހީމްއެވެ.
ހުޅުމާލޭ ހޮސްޕިޓަލުގައި ގިނަ ޚިދުމަތްތަކެއް އަންނަނީ ތަޢާރަފްކުރަމުންނެވެ.
