ވައްކަމުގެ މައްސަލައެއްގައި ޖަލަށްލުމަށް އިއްޔެ ހުކުމްކުރި މީހަކު، ކަރެކްޝަނާއި ހަވާލުކުރުމުގެ މަރުހަލާ ކުރިއަށްދަނިކޮށް ހައިކޯޓުގައި ހުރެފައި އެމީހާ ފިލައިފިއެވެ.

އިއްޔެ ހައިކޯޓުގައި ކުރި ހުކުމާއެކު ފިލާފައިވަނީ، މއ. ވިއަވަތި ޝިނާހް އާމިރެެވެ. ދައުލަތުން ޝިނާހުއާއި، އޭނާގެ އެއްބަނޑު ކޮއްކޮ ތ. މަޑިފުށި، އެދުރުގެ ޝައްފާން ލުތުފީގެ މައްޗަށް ވައްކަމުގެ ދައުވާކޮށްފައިވަނީ، ޑިސެމްބަރު 29، 2013ގައި މާލޭގެ ގެއަކަށް އެ ދެ މީހުން ވަދެ ކަބަޑެއްގެ ތެރޭގައި ހުރި 170،000 ރުފިޔާއާއި 10،000 ތައިލެންޑް ބާތު އަދި ސޮނީ ބްރޭންޑުގެ ކެމެރާއެއް ވަގަށް ނަގާފައިވާ ކަމުގެ ތުހުމަތުގައެވެ. އެ ދެމީހުންގެ މައްޗަށް 2015 ވަނަ އަހަރު ދައުވާ ކުރުމުން ކްރިމިނަލް ކޯޓުން ވަނީ 2019 ވަނަ އަހަރުގެ ޖުލައި މަހު ޝައްފާން އެއް އަހަރާއި ހަތް މަހާއި ހަ ދުވަހަށް ޖަލަށް ލުމަށް ޙުކުމްކޮށްފައެވެ. ނަމަވެސް، ޝިނާހުގެ މައްޗަށް އެކަށީގެންވާ ވަރަށް ހެކި ނެތުމުންނާއި ވަގަށް ނެގި ތަކެއްޗަށް ޝައްފާން ޒިންމާ ނެގުމުން އޭނާގެ މައްޗަށް ކުށް ސާބިތު ނުވާ ކަމަށް ނިންމާފައިވެއެވެ.

ދަށު ކޯޓުގެ މި ހުކުމާއި ގުޅިގެން ދައުލަތުންވަނީ، ޝިނާހުގެ މައްސަލަ ހައި ކޯޓުގައި އިސްތިއުނާފުކޮށްފައެވެ. އަދި މި މައްސަލާގައި އިއްޔެ ހައި ކޯޓުން ހުކުމް ކުރީ ޝިނާހުގެ މައްޗަށް ކުށް ސާބިތުވާކަމަށެވެ. ހައިކޯޓުން ވަނީ އޭނާ ދެ އަހަރާއި ހަތަރު މަހާއި 24 ދުވަހަށް ޖަލަށް ލުމަށް ޙުކުމްކޮށްފައެވެ.

ކޯޓުގެ ޙުކުމާއެކު ފިލި ޝިނާޙް އަދި މިހާތަަށް ފެނިފައެއްނުވެއެވެ. އެހެންކަމުން މޯލްޑިވްސް ކަރެކްޝަނަލް ސާރވިސްއާއި، ޕޮލިސް ގުޅިގެން އޭނާ ހޯދުމުގެ މަސައްކަތް ފަށާފައެވެ.

މިކަމާއި ގުޅިގެން ހައިކޯޓުން އިތުރު އެއްޗެއް ހާމަކޮށްފައެއްނުވެއެވެ.