އުރީދީ ސާފް ޗެންޕިއަންޝިޕްގައި މިރޭ ދިވެހި ޤައުމީ ޓީމު ކުޅޭ މެޗުން މޮޅުވެ މިއީ ދިވެހި ޓީމު މުބާރާތުގެ ފައިނަލަށް ދަތުރުކުރާ ރޭ ކަމުގައި މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
މަޖިލިސްގެ ތަޅުމުގައި ވާހަކަ ދައްކަވަމުން ރައީސް ނަޝީދު ވިދާޅުވީ މިއީ ދިވެހި ޓީމު ފައިނަލަށް ދާނެ ރޭ ކަމުގައެވެ. ފުޓުބޯޅައިގެ ތަޖުރިބާ ކާރުންނާއި ކުރެވުނު މަޝްވަރާތަކުން މިރޭ ދިވެހި ޓީމަށް ފައިނަލަށް ދެވޭނެ ފުރުސަތު ފަހިކަމަށް އެބޭފުޅުންގެ ލަފާވެސް ލިބިފައިވާކަމަށް ރައީސް ނަޝީދު ވިދާޅުވިއެވެ. އަދި މަޖިލީގެ ކައުންސިލާ ޖެނެެރަލްގެ ޒަވާޖީ ހަޔާތް ގުޅިފައިވަނީ ފުޓުބޯޅައާއި ކަމަށްވެފައިވާ، އެކަމަނާގެ ލަފާ ހޯދުމުންވެސް ޤައުމީ ޓީމަށްއެއްވަރު ކޮށްލައިގެންވެސް ފައިނަލަށް ދެވޭނެކަމަށް ވިދާޅުވެފައިވާކަމަށެވެ. ނަމަވެސް ޤައުމީ ޓީމު ފައިނަލަށް ދާނީ މޮޅުވެގެންކަމަށް ރައީސް ނަޝީދު ވަނީ ވިދާޅުވެފައެވެ.
މިފަހަރުގެ އުރީދޫ ސާފް ޗެންޕިއަންޝިޕް އެހެން އަހަރުތަކާިއ ހިލާފަަށް، ލީގް އުސޫލުން ކުރިއަށްދާއިރު، މިރޭ ލީގު ބުރުގެ ފަހު މެޗްގައި އިންޑިޔާ އާއި ދިވެހިރާއްޖެ ބައްދަލުކުރާއިރު، މިމެޗް އެއްވަރުކޮށްލައިގެންވެސް ރާއްޖެއަށް ފައިނަލަށް ދިއުމުގެ ފުރުސަތުވަނީ ލިބިފައެވެ. ނަމަވެސް އިންޑިޔާއިން ފައިނަލްގެ ޖާގައެއް ހޯދާނަމަ، އިންޑިޔާއިން ޖެހޭނީ ރާއްޖޭގެ މައްޗަށް ކުރި ހޯދާށެވެ.
ރާއްޖެއިން މިހާތަނަށް ސާފް ޗެންޕިއަންޝިޕް ދެ ފަހަރު ހޯދާފައިވާއިރު، މިދެ ފަހަރުވެސް ރާއްޖެއިން މިތަށި ކާމިޔާބުކޮށްފައިވަނީ އިންޑިޔާ ބަލިކޮށްގެންނެވެ. އެއީ 2008ވަނަ އަހަރު އާއި 2018ވަނަ އަހަރުއެވެ. މިމެޗަށް މިދެ ޓީމް ނިކުންނައިރު، އިންޑިޔާއަކީ މިސަރައްހަދުގެ ވަރުގަދަ ބާރެކެވެ. ފުޓްބޯޅަ ކުރިއެރުވުމަށް އެގައުމުން ބޮޑު ހޭދައެއް ކޮށްފައިވާއިރު، 2018ވަނަ އަހަރު އިންޑިޔާއިންވަނީ އޭޝިއަން ކަޕްގައިވެސް ވާދަކޮށްފައެވެ. އިންޑިޔާއިން ފުޓްބޯޅައަށް ބޮޑު ހަރަދެއް ކުރާއިރު، މިސަރައްހަދުގައި އަބަދުވެސް އިންޑިޔާ އާއި ރާއްޖެ ކުޅޭ މެޗަކީ ވަރަށް ވާދަވެރި މެޗެކެވެ.
