އައްޑޫ ފްލައިން ސްކޫލްގެ މައްސަލާގައި ސިވިލް އޭވިއޭޝަންގެ އިޙްމާލެއްވޭތޯ ބެލުމަށް ހެދި އޮޑިޓް ރިޕޯޓް ކޮބައިތޯ އައިލެންޑް އޭވިއޭޝަންގެ ކުރީގެ ޑިރެކްޓަރ އޮފް އޮޕޮރޭޝަންސް ކެޕްޓަން މުހައްމަދު އަމީން ސުވާލުކުރައްވައިފިއެވެ.
މައްސަލަ ބޮޑުވެފައިވާ އައްޑޫ ފްލައިން ސްކޫލާއި ގުޅޭގޮތުން ކެޕްޓަން އަމީން ވިދާޅުވީ، އައްޑޫ ފްލައިން ސްކޫލްގެ ހުރިހާ ދަރިވަރުންވެސް ތިބީ މަގުމަތިވެފައިކަމަށެވެ. އޭނާ ވަނީ ސިވިލް އޭވިއޭޝަން އޮތޯރިޓީގެ އިހުމާލެއްވޭތޯ ރައީސް އޮފީހުން ކުރި އޮޑިޓްގެ އަޕްޑޭޓަކީ ކޮބައިތޯ ސުވާލުކުރައްވާފައެވެ.
އޭރުވެސް އަޅުގަނޑު ދެންނެވިން ފްލައިން ސްކޫލް ހުއްޓުނީ މިސަރުކާރުގެ ސަބަބުންނޭ!
– މުޙައްމަދު އަމީން
އަމީން މިހެން ވިދާޅުވެފައިވާއިރު، އައްޑޫ ފްލައިން ސްކޫލްގެ މައްސަލަތައް ގިނަވެ ގިނަ ދުވަސްތަކެއް ފާއިތުވެގެން ދިޔައިރުވެސް ސަރުކާރަށް މިހާތަނަށް މައްސަލަ ހައްލުކޮށްދެވިފައެއްނުވެއެވެ. އަދި މިކަމުގައި އިހްމާލު އޮތް ފަރާތްތަކެއްވޭތޯ ބެލުމަށް އޮޑިޓެއް ހަދާނެކަމަށް ހާމަކޮށްފައިވާއިރު، މިހާތަނަށް އެ އޮޑިޓް ޢާންމު ކޮށްފައެއް ނުވެއެވެ.
އައްޑޫ ފްލައިން ސްކޫލްގެ މައްސަލަ ހައްލު ނުވެ ދިގުލައިގެން ދާއިރު އެކަން ހައްލުކޮށްދޭނެކަމަށް ސަރުކާރުން އެތައް ފަހަރަކު މިހާތަނަށް ބުނެފައިވެއެވެ. މިގޮތުން މިއަދުވެސް އެތަނުގައި ކިޔަވާ ދަރިވަރުން ރައީސްއާއި ބައްދަލުކުރެއްވުމުން ވަނީ، ކިޔެވުން ހުއްޓިފައިވާ ދަރިވަރުންނަށް އަންނަ ޑިސެންބަރުމަހުގެ ތެރޭގައި އަލުން ކޯސް ކުރިޔަށް ގެންދެވޭނެ މަގު ސަރުކާރުން ފަހިކޮށްދެއްވުމަށް މަސައްކަތްތަކެއް ކުރައްވަމުންދާކަމަށް ރައީސް ވިދާޅުވެފައެވެ.
މިއަދު މެންދުރުފަހު ރައީސުލްޖުމްހޫރިއްޔާގެ އޮފީހުގައި މިކަމާ ގުޅޭގޮތުން އޭ.އޭ.އޭ ގައި ޕައިލެޓްކަން ކިޔަވަމުންދާ ދިވެހި ދަރިވަރުންނާ ކަމާގުޅޭ އިދާރާތަކުގެ އިސްވެރިންނާއެކު ބޭއްވެވި މި ބައްދަލުކުރެއްވުމުގައި، ދަރިވަރުން ވަނީ މިދިޔަ ޙަފްތާ ބުރާސްފަތި ދުވަހު ރައީސަށް ހުށަހެޅުއްވި ސިޓީއަށް މިހާ އަވަހަށް އިޖާބަ ދެއްވީތީ އެކަމަށްޓަކައި ޝުކުރު އަދާކުރައްވާފައެވެ. އަދި، އެ ދަރިވަރުން ފާހަގަކުރެއްވި ގޮތުގައި އެދަރިވަރުންނަށް ދިމާވެފައިވާ ކަންކަމަށް ޙައްލު ހޯދުމަށް ހުރިހާ އިދާރާއަކަށް ދިޔަކަމަށާއި، ކުރެވެންހުރި ހުރިހާ މަސައްކަތެއް ކޮށްފައިވީ ނަމަވެސް މިހާތަނަށް އެއްވެސް އެދެވޭ ޖަވާބެއް ލިބިފައި ނުވާކަމުގައި ފާހަގަކުރެއްވިއެވެ.
މި ބައްދަލުކުރެއްވުމުގައި، ދަރިވަރުން ވަނީ ސްކޫލްގެ ކިޔެވުން ހުއްޓިފައިވާތާ އެއް އަހަރަށްވުރެ ގިނަ ދުވަސްވެފައިވާކަމަށާއި، ރީފަންޑް ނުލިބުމާއި، އަލުން ކިޔެވުން ފެށޭނެ ދުވަހެއް ނޭންގުމުގެ ސަބަބުން އެ ދަރިވަރުންނަށް ދިމާވަމުންދާ މާލީ، ނަފްސާނީ އަދި ވަގުތުގެ ގޮތުން ދިމާވާ ދަތިތައް ރައީސުލްޖުމްހޫރިއްޔާއާ ހިއްސާކުރައްވާފައެވެ.
ރައީސުލްޖުމްހޫރިއްޔާ ވިދާޅުވިގޮތުގައި މިކަމަށް ޙައްލެއް ހޯއްދެވުމުގެ ގޮތުން އައިލެންޑް އޭވިއޭޝަނާއި، މޯލްޑިވްސް ނެޝަނަލް ޔުނިވަރސިޓީއިން ގުޅިގެން ޖޮއިންޓް ވެންޗަރ ކުންފުންޏެއް ޤާއިމުކުރުމަށް ނިންމާފައިވާކަމަށާއި، މި ޖޮއިންޓް ވެންޗަރ ކުންފުނީގެ ދަށުން ރާއްޖޭގައި ހިންގާ ފަލައިންގ ސްކޫލް ހިންގާނީ ޕްރޮފެޝަނަލް ޔޫރަޕިއަން ފްލައިން ސްކޫލަކުން ކަމުގައެވެ.
އަދި، މި ފްލައިން ސްކޫލްގައި ކިޔަވާދިނުމަށް ބޭނުންވާކަންކަން ފުރިހަމަކޮށް ޑިސެންބަރުމަހުގެ ތެރޭގައި ކިޔެވުން ފެށުމުގެ މަސައްކަތްތައް ކުރިޔަށްދާނެކަމުގައި އެމަނިކުފާނު ހާމަކުރައްވާފައިވެއެވެ. މީގެ އިތުރުން ވެސް ކުދިންނަށް ދިމާވެފައިވާ މާލީ ދަތިތައް ޙައްލުކޮށްދެއްވުމަށް ޓޮޕްއަޕް ލޯން ތަކެއް ދިނުމާއި، މިކަމުގައި އިތުރަށް ކުރެވެން ހުރި ކަންތައްތަކަކީ ކޮބައިތޯ ބެއްލެވުމަށްފަހު އެކަންކަން ޙައްލުކޮށްދެއްވާނެކަމުގައި އެމަނިކުފާނު ވަނީ ވިދާޅުވެފައެވެ. މީގެ ކުރިންވެސް ސަރުކާރުން ވަނީ މި ކޯސް ހަދާ ދަރިވަރުންނަށް ލުޔެއް ދިނުމުގެ ގޮތުން ދަރިވަރުން އަނބުރާ ލޯނު ދައްކަންޖެހޭނީ ކޯސް ނިމޭ ތާރީޚުން ފެށިގެން 6 މަސްދުވަސް ފަހުންކަމުގައި ކަނޑައަޅައި، މި ކޯސް ފުރިހަމަ ކުރުމަށް ބައެއް ދަރިވަރުން ބޭންކް އޮފް މޯލްޑިވްސް މެދުވެރިކޮށް ނަގާފައިވާ "ކިޔަވާ" ލޯންތައް ހަޔަރ އެޑިއުކޭޝަން މިނިސްޓްރީގެ ދަށަށް ބަދަލުކޮށްފައެވެ.
މި ބައްދަލުކރެއްވުމުގައި، މިނިސްޓަރ އޮފް ފިނޭންސް އިބްރާހީމް އަމީރާއި، މިނިސްޓަރ އޮފް ހަޔަރ އެޑިޔުކޭޝަން ޑޮކްޓަރ އިބްރާހީމް ޙަސަނާއި، ރައީސުލްޖުމްހޫރިއްޔާގެ އޮފީހުގެ އިސްވެރިންނާއި، އައިލެންޑް އޭވިއޭޝަންގެ ބޭފުޅުން އަދި ސިވިލް އޭވިއޭޝަންގެ ބޭފުޅުން ވަނީ ބައިވެރިވެވަޑައިގެންފައެވެ.
