ވަކިކުރަން ނިންމި އޮފިސަރުންގެ މައްސަލައިގެ އަޑުއެހުންތައް މާދަމާ ފަށަނީ

ފުލުހުންގެ އިސް އޮފިސަރުންތަކެއް ވަޒީފާއިން ވަކިކުރަން ނިންމެވި ނިންމެވުމާއި ދެކޮޅަށް އެ އޮފިސަރުންގެ ފަރާތުން ސިވިލް ކޯޓަށް ހުށައެޅި މައްސަލަ ފެށުމަށް މާދަމާއަށް ތައާވަލުކޮށްފިއެވެ. މި މައްސަލައިގެ ފުރަތަމަ އަޑުއެހުން ތައާވަލުކޮށްފައިވަނީ ހެނދުނު 09:00އަށެވެ.

އަލަށް އަމަލުކުރަން ފެށި ފުލުހުންގެ ޚިދުމަތުގެ ޤާނޫނުގައިވާ ގޮތުން ކޮމިޝަންޑް އޮފިސަރުންގެ ތެރެއިން ކޮމިޝާނާ އޮފް ޕޮލިސް ފިޔަވައި، ސުޕްރިންޓެންޑެންޓް އޮފް ޕޮލިސްއިން ފެށިގެން މަތީ ރޭންކުގެ ކޮމިޝަންޑް އޮފިސަރުން، ފުލުހަކަށް ވީތީ އެމީހަކަށް ލިބިފައިވާ ގާނޫނީ ބާރާއި އިހްތިޔާރު ނަހަމަ ގޮތުގައި ބޭނުންކޮށް، ލާއިންސާނީ އަނިޔާވެރި އަމަލެއް ނުވަތަ ކޮރަޕްޝަންގެ އަމަލެއް ހިންގާފައިވާ ކަމަށް ތުހުމަތުކުރެވޭތޯ ބޯޑުން ބަލަން ޖެހެއެވެ.

އަދި އެފަދަ މައްސަލައެއް ދައުލަތުގެ އިދާރާއަކަށް ނުވަތަ ކޮމިޝަނަކަށް ރިޕޯޓުކުރެވިފައިވާ އޮފިސަރުންނަކީ މަގާމަށް އެކަށޭނަ ތައުލީމާއި ހުނަރާއި މަސައްކަތުގެ ތަޖުރިބާ އާއި ނަޒާހަތްތެރިކަން ހުރި އޮފިސަރުން ކަމާމެދު ގޮތެއް ޕޮލިސް ބޯޑުން ކަނޑައެޅަން ޖެހޭނެއެވެ.

ޕޮލިސް ބޯޑުން މިހާތަނަށް ވަނީ 7 އޮފިސަރަކު ވަޒީފާއިން ވަކިކުރުމަށް ކޮމިޝަނަރ އޮފް ޕޮލިސް މުޙައްމަދު ޙަމީދަށް ހުށައަޅުއްވާފައެވެ.

ފުލުހުންގެ ވަޒީފާއިން ވަކިކުރުމަށް ޕޮލިސް ބޯޑުން ލަފާދީފައިވާ 7 ބޭފުޅުންނަކީ:

• ސުޕްރިންޓެންޑެންޓް މުހައްމަދު ދާއޫދު
• އެސިސްޓެންޓް ކޮމިޝަނަރު ފަރުހާދު ފިކުރީ
• ޗީފް ސުޕްރިންޓެންޑެންޓް އަހުމަދު ޝުހާދު
• އެސިސްޓެންޓް ޕޮލިސް ކޮމިޝަނަރު މުހައްމަދު ޖަމްޝީދު
• އެސިސްޓެންޓް ކޮމިޝަނަރު އަހުމަދު މުހައްމަދު
• ސުޕްރިންޓެންޑެންޓް އިސްމާއީލް ޝަމީމް
• ޗީފް ސުޕްރިންޓެންޑެންޓް އަބްދުﷲ ޝަރީފް

އެބޭފުޅުންގެ ތެރެއިން ފަރުހާދާއި ޝުހާދު ފިޔަވައި ދެން ތިއްބެވި އޮފިސަރުންގެ ފަރާތުން ފަރާތުން މައްސަލަ ކޯޓަށް ހުށަހެޅީ ދިވެހި ޗެމްބާސްއިންނެވެ. މިހާރު އެމައްސަލަ ކޯޓުން ވަނީ ބަލައިގެންފައެވެ.

7 އޮފިސަރަކު ވަކިކުރުމަށް ބޯޑުން ސީޕީއަށް ލަފާދެއްވިތާ މަހަކަށްވުރެ ގިނަ ދުވަސްފަހުން ސީޕީ ޙަމީދު ވަނީ ދެ އޮފިސަރަކު ވަޒީފާއިން ވަކިކުރުމަށް ނޯޓިސް ފޮނުއްވާފައެވެ. އެގޮތުން ނޯޓިސް ފޮނުއްވާފައިވާ ދެ އޮފިސަރުންނަކީ، އެސިސްޓެންޓު ޕޮލިސް ކޮމިޝަނަރ މުހައްމަދު ޖަމްޝީދާއި އަހްމަދު މުހައްމަދެވެ.

މައްސަލަ ހުށައެޅުއްވި އޮފިސަރުންގެ ފަރާތްޕުޅުން ނެރުނު ބަޔާނެއްގައި ވަނީ، ފުލުހުންގެ މުއައްސަސާގައި ހިދުމަތްކުރުމުގައި ދިގު މާޒީއެއް އޮތް އޮފިސަރުން ވަކިކުރަން ނިންމުމުގައި ބޭއިންސާފު ކަންކަން ހިނގާފައިވާކަމަށް ބުނެފައެވެ. ދިފާއުގައި ބަސްބުނުމަށާއި ޖަވާބުދާރީވާން ފުރުސަތު ނުދީ ކަންކޮށްފައިވާ ގޮތުން ދުސްތޫރީ އަދި ގާނޫނީ ހައްގުތަކެއް ގެއްލިފައިވާކަމަށްވެސް އެ ބަޔާނުގައިވެއެވެ. އަދި ސިވިލް ކޯޓަށް މައްސަލަ ހުށަހެޅީ އޮފިސަރުންނާ މެދު އަމަލުކުރި ގޮތުގައި ގާނޫނީ ގޮތުން ބޮޑެތި ފުށުއެރުންތަކެއް އިޖުރާއޫ ގޮތުން ހުރުމުންކަމަށްވެސް ބުނެފައިވެއެވެ.

އެހެންކަމުން ކޯޓުން ގޮތެއް ކަނޑައެޅުމުގެ ކުރިން އޮފިސަރުން ވަޒީފާ އިން ވަކިކުރުމުގެ އެއްވެސް ކަމެއް ނުކުރުމަށާއި ވަޒީފާ އަދާކުރުމަށް ހުރަސްއެޅޭ ފަދަ އެއްވެސް ކަމެއް ނުކުރުމަށް ފުލުހުންގެ ހިދުމަތާއި ޕޮލިސް ބޯޑު އަދި ކަމާގުޅޭ ހުރިހާ ފަރާތްތަކަށް އަމުރުކޮށްދިނުމަށް ވެސް ވަނީ އެދިފައެވެ.

7 އޮފިސަރަކު ފުލުހުންގެ ވަޒީފާއިން ވަކިކުރުމަށް ނިންނމާފައިވާއިރު، އެ އޮފިސަރުން ވަކިކުރަން ނިންމި ސަބަބެއް އަދި އެއްވެސް ފަރާތަކުން ހާމަކޮށްފައެއްނުވެއެވެ.

ހިދުމަތުގައި ދެމިތިބި 7 އޮފިސަރަކު ވަކިކުރަން ޕޮލިސް ބޯޑުގެ ނިންމެވި ނިންމެވުމަށް އެއްވެސް ނުފޫޒެއް ޕޮލިސް ބޯޑަށް ފޯރުވާފައި ނުވާނެކަމަށް ހޯމް މިނިސްޓަރ އިމްރާން އަބްދުﷲވެސް ދާދިފަހުން ވަނީ ވިދާޅުވެފައެވެ.

ބޯޑުން ނިންމި ނިންމުމުގައި މިނިސްޓަރގެ ހައިސިއްޔަތުންވެސް އަދި ސިޔާސީ އެހެން ބޭފުޅެއްގެ ފަރާތުންވެސް އެއްވެސް ނުފޫޒެއް ފޯރުވާފައި ނުވާކަމަށް މިނިސްޓަރ ވިދާޅުވިއެވެ. މިނިސްޓަރ ވިދާޅުވީ ފުލުހުންގެ ބޯޑަށް ޤާނޫނުގައި މަތިކޮށްފައިވާ މުއްދަތުގެ ތެރޭގައި ބަލަންޖެހޭ ކަންކަން ބެލުމަށްފަހު ނިންމާފައިވާ ނިންމުންތަކަކީ ބޯޑުން ބަލަންޖެހޭ ކަންކަން ބެލުމަށްފަހު ޤާނޫނުގެ ތެރެއިން ނިންމާފައިވާ ނިންމުންތަކެއްކަމަށެވެ.