ޑްރަގް ބޭނުންކުރާ ކަމުގެ މައުލޫމާތު ލިބިގެން އިންޑިއާގެ ނާކޮޓިކްސް ކޮންޓްރޯލް ބޯޑުން އާދިއްތަދުވަހު ހިންގި ޚާއްސެ ރެއިޑެއްގައި ހައްޔަރު ކޮށްފައިވާ 8 މީހުންގެ ތެރޭގައި، ބޮލީވުޑްގެ މަޝްހޫރު ފިލްމީ ތަރި، ޝާހުރުކް ޚާންގެ ދަރިފުޅު ހިމެނޭކަމުގައި އިންޑިއާގެ މީޑިއާތަކުން ރިޕޯޓު ކޮށްފިއެވެ.

ރިޕޯޓުތައް ބުނާގޮތުގައި މަޝްހޫރު އެކްޓަރު ޝާހުރުކު ޚާންގެ ދަރިފުޅު ފުލުހުން ހައްޔަރު ކޮށްފައިވަނީ، މަސްތުވާތަކެތީގެ މަނާ ބާވަތްތައް ބޭނުން ކުރުމާއި ގެންގުޅުމުގެ ކުށުގައެވެ.

އުމުރުން 23 އަހަރުގެ އަރުޔާން ފުލުހުންގެ ބެލުމުގެ ދަށަށް ގެންދެވުނުއިރު، އޭނާ ހައްޔަރު ކުރެވުނުތަނުން، މަސްތުވާތަކެތީގެ ބާވަތްތައް ކަމަށްވާ، ކޮކެއިންއާއި، ހަޝިޝްއާއި، އެކްސްޓަސީގެ އިތުރުން މަސްތުވާތަކެތީގެ އިތުރު ބާވަތްތަކާއި އަދި ފައިސާވެސް ފުލުސް އޮފިސަރުން ހޯދާފައިވާކަމަށްވެސް މީޑިއާ ރިޕޯޓުތައް ބުނެއެވެ.

އިންޑިއާގެ މީޑިއާތަކުން އިތުރަށް ހާމަކޮށްފައިވާ ގޮތުގައި، ޑްރަގް ބޭނުންކުރާ ކަމުގެ ތުހުމަތުގައި މި 8 މީހުން ހައްޔަރު ކޮށްފައިވަނީ، އިންޑިއާގެ ގޯއާއަށް ދަތުރު ކުރަމުންދިޔަ ކްރޫޒް ޝިޕަކުންނެވެ.

ޝާހުރުކް ޚާންގެ ގާނޫނީ ވަކީލުން ލޯކަލް މީޑިއާތަކަށް މައުލުމާތު ދީފައިވާ ގޮތުގައި، އަރުޔާން ހައްޔަރު ކުރެވުނުއިރު "އޭނާގެ އަތުގައި ކުރޫޒު ޝިޕްގައި ދަތުރު ކުރުމަށް ބޭނުންވާ ބޯޑިން ފާސްއެއް ނެތުމުގެ އިތުރުން، އަދި އޭނާއަށް ވަކި ސީޓެއްވެސް އަދި ކެބިންއެއްވެސް ޚާއްސަކުރެވިފައި ނުވާ،" ކަމުގައެވެ. އަދި ގާނޫނީ ވަކީލުންނާ ހަވާލާދީ ލޯކަލް މީޑިއާތަކުން އިތުރަށް ބުނެފައިވަނީ އޭނާ އެ ކުރޫޒް ޝިޕަށް ގޮސްފައިވަނީ ޕާޓީއަކަށް އޭނާއަށް ލިބުނު ދައުވަތަކަށް ކަމުގައެވެ.

"ދެވަނަކަމަށް، އޭނާ ހައްޔަރު ކުރެވުނުއިރު އޭނާގެ އަތުން މަސްތުވާ އެއްވެސް ބާވަތެއް ފެނިފައެއް ނުވޭ. އޭނާ ހައްޔަރު ކުރެވިފައިވަނީ، ހަމައެކަނި ދެކެވުނު ވާހަކަތަކެއްގެ މައްޗަށް،" ޝާހުރުކް ޚާންގެ ލޯޔަރު ވިދާޅުވެފައި ވެއެވެ.