ހިޔާ ފްލެޓަށް މީހުން ބަދަލުވާއިރު، ކަންކަން ކޯޑިނޭޓް ކުރަން އެސަރަހައްދުގައި ވަގުތީ އޮފީހެއް ހުންނަންޖެހޭކަމަށް ކުރީގެ ޓެލެކޮމިއުނިކޭޝަން މިނިސްޓަރ މުޙައްމަދު މަލީހު ޖަމާލް ވިދާޅުވެއްޖެއެވެ.
މަލީހު މިހެން ވިދާލުވީ ހުޅުމާލެ ދެވަނަ ފިޔަވަހީގައި ދިރިއުޅޭ މީހުންނަށް ޚާއްޞަކޮށްގެން ހެދި ބަސް ޓަމިނަލް ހުރިގޮތަށް ފާޑުވިދާޅުވެ ކުރެއްވި ޓްވީޓެއްގައެވެ. މަލީހު ވަނީ، ބަސް ސްޓޮޕް ހެދިއިރު މަގުމެދަށް ބަސް ހުއްޓުމުގެ ބަދަލުގައި މަގުން އެއްފަރާތަކަށް ބަސް މަޑުކުރާގޮތަށް ޕްލޭން ނުކުރެވުނީ އޮޅުމަކުންތޯ ސުވާލުކުރައްވާފައެވެ. އަދި ފްލެޓަށް ރައްޔިތުން ބަދަލުވާއިރު ފެންނަން އޮތީ ދޯހަޅި އިންތިޒާމް ތަކެއްކަމަށާއި، ކަންކަން ކޯޑިނޭޓް ކުރަން އެސަރަހައްދުގައި ވަގުތީ އޮފީހެއް ހުންނަންޖެހޭކަމަށް އޭނާ ވިދާޅުވިއެވެ.
ބަސް ސްޓޮޕް ހެދިއިރު މަގުމެދަށް ބަސް ހުއްޓުމުގެ ބަދަލުގައި މަގުން އެއްފަރާތަކަށް ބަސް މަޑުކުރާގޮތަށް ޕްލޭން ނުކުރެވުނީ އޮޅުމަކުން ބާ? ފްލެޓަށް ރައްޔިތުން ބަދަލުވާއިރު ފެންނަން އޮތީ ދޯހަޅި އިންތިޒާމް ތަކެއް. ކަންކަން ކޯޑިނޭޓް ކުރަން އެސަރަހައްދުގައި ވަގުތީ އޮފީހެއް ހުންނަންޖެހޭ. pic.twitter.com/eQaM1OfAbc
— Mohamed Maleeh Jamal (@maleehjamal) October 3, 2021
ހުޅުމާލޭ ދެވަނަ ފިޔަވައްސަށް ބަހުގެ ޚިދުމަތް އަވަހަށް ފަށާފައިމިވަނީ، ހިޔާ ފްލެޓަށް މީހުން ބަދަލުވަމުން ދިއުމާއެކު އެ ރައްޔިތުންނަށް ދަތުރުފަތުރުުރެވޭނެ އިންތިޒާމެއް ހަމަޖެއްސުމަށެވެ. އެގޮތުން ބަހުގެ ޚިދުމަތް ފަށާފައިވަނީ މިމަހުގެ 1 ގައެވެ.
ޔާ ފްލެޓްތަކަށް ބަހުގެ ހިދުމަތް ދެނީ ކޮންމެ ދުވަހެއްގެ ހެނދުނު 5:45 އިން ރޭގަނޑު 11:45 އަށެވެ. އެކަމަކު ހުކުރު ދުވަހު ހެނދުނު 11:45 އިން މެންދުރުފަހު 1:45 އަށް ހިޔާ ފްލެޓްތަކަށް ބަހުގެ ހިދުމަތް މެދުކަނޑާލައެވެ.
ހުޅުމާލޭ ބަހުގެ ހިދުމަތުގެ އަގަކީ ފަސް ރުފިޔާއެވެ. މާލެ ސަރަހައްދުގައި ދިރިއުޅެމުންދާ ރައްޔިތުންނަށް ފެންވަރު ރަނގަޅު ހިދުމަތެއް ފޯރުކޮށްދިނުމަކީ އެމްޓީސީސީގެ އަމާޒުކަމަށް އެ ކުންފުނިން ބުނެއެވެ. އަދި ބަހުގެ ހިދުމަތް އެކަށީގެންވާ ފެންވަރެއްގައި ދިނުމަށް ބޭނުންވާނެ ބަސްތައް ގެނައުމާއި، އެއާއި ގުޅިގެން ކުރަންޖެހޭ މަސައްކަތްތައް މިހާރުވެސް ކުރަމުންދާ ކަމަށް އެ ކުންފުނިން ބުނެއެވެ.
ހުޅުމާލޭގެ ދެވަނަ ފިޔަވަހީގައި މީހުން ދިރިއުޅެން ފެށީ މިދިޔަ އަހަރުއެވެ. އެކަމަކު އެއީ އަމިއްލަ މީހުންނަށް ވިއްކާފައިވާ ބިންތަކުގައި ހަދާފައިވާ މަދު ގެއެއްގައި އުޅޭ މަދު އާއިލާތަކެކެވެ. ހުޅުމާލޭގެ ދެވަނަ ފިޔަވަހީގައި އިޖުތިމާއީ ބޯހިޔާވަހިކަމުގެ ދަށުން އިމާރާތްކޮށްފައިވާ ހިޔާ ފްލެޓްތަކަށް ވެސް މިހާރު 60 ވަރަކަށް އާއިލާ ވަނީ ދިރިއުޅުން ބަދަލުކޮށްފައެވެ.
