ރައްޔިތުންގެ މަޖިލީހުގެ ބައެއް މެމްބަރުން ޔޫރިން ޕީސީއާރު ޓެސްޓް ހަދައި ނަތީޖާ ނެގެޓެވް ވުމުން ނޫނީ މަޖިލިސް ތަޅުމަށް ވަނުން މަނާކުރަން ޖެހޭ ކަމުގައި މޯލްޑިވްސް ޓްރޭޑް ޔޫނިއަންގެ ނާއިބު ރައީސް ސަައުދުﷲ އަހުމަދު ވިދާޅު ވެއްޖެއެވެ.
ސައުދު މިފަދައިން ވިދާޅުވީ ކާށިދޫ ދާއިރާގެ މެމްބަރު އަބްދުﷲ ޖާބިރުގެ ފަރާތްޕުޅުން ފަހަކަށް އައިސް ފެންނަމުންދާ ދަށު ދަރަޖައިގެ އަމަލުތަކަށް އިޝާރާތް ކުރައްވައެވެ. ޖާބިރުވަނީ މިއަދު މަޖިލީހުގައި ރާއްޖޭގައި ދީނީ މިނިވަންކަން ދިނުމަށްވެސް ގޮވާލާފައެވެ. ޖާބިރުގެ އަމަލުތަކާއިމެދު ގިނަ ބަޔަކު ކަންބޮޑުވުން ފާޅު ކުރުމުން މަޖިލީހުން ވަނީ ކުއްލިއަކަށް އެމައްސަލަ ބަލަމުންދާކަމަށް ވިދާޅުވެފައެވެ.
މިމައްސަލާގައި ސައުދު ވިދާޅުވީ ރައްިތުންގެ މަޖިލީހަކީ ކަރާމާތް ލިބިގެންވާ ރައްޔިތުން އިންތިޚާބުކުރާ ރިވެތި އަޚުލާގާއި ސުކޫލުހުރި މެމްބަރުން ވަދެ ނިކުމެ އުޅޭތަނަކަށް ވާންޖެހޭކަމަށެވެ. އެތަނަކީ ތިމާމެން ހިތުހުރި ވާހަކައެއް ދައްކައި، ބޭނުންހާ ވައްތަރެއް ޖައްސަން އޮތް ތަނެއްނޫންކަމަށް ސައުދު ވިދާޅުވިއެެވެ. މަޖިލިސްގައި މިހާރު ކަންކަން ހުރި ގޮތުން އަދަބެއް އަޚުލާގެއްނެތި އުޅުއްވާ މެމްބަރުންގެ ޔޫރިން ޓެސްޓް ހަދައި ނަތީޖާ ނެގެޓިވް ވުމުން ނޫނީ ތަޅުމަށް ނުވަދެވޭ ގޮތް ހެދުމަށް ސައުދު ވަނީ ގޮވާލާފައެވެ.
ރައްޔިތުންގެ މަޖިލިސް ބައެއް މެމްބަރުން ޔޫރިން ޕީސީއާރު ހެދުމަށްފަހު ރިޒަލްޓް ނެގެޓިވް ނުވާނަމަ ފްލޯއަށް ވަނުން މަނާކުރަންޖެހޭ. މުޅި ޤައުމު ފަސާދަކޮށް، ޤައުމަށް އޮތް ނުރައްކަލަށް މި މަންދޫބުން ވެއްޖެ. މި މީހުން ހިތައް އެރި ގޮތަކަށް ވާހަކަ ދައްކަން އޮތްތަނަކަށް މިތަންވެ ނިމިއްޖެ.
– ސައުދު ވިދާޅުވިއެވެ.
މިއަދުގެ މަޖިލިސްގެ ޖަލްސާގައި، ހެއްކާއިބެހޭ ބިލަށް ވާހަކަ ދައްކަވަމުން ޖާބިރުވަނީ ރާއްޖޭގައި ދީނީ މިނިވަންކަން އޮންނަންޖެހޭ ކަމަށް ވިދާޅުވެ ވާހަކަ ދައްކަވާފައެވެ. ފަހަކަށް އައިސްގެ ޖާބިރުގެ އަމަލުތަކާއި، ވާހަކަތައް ދިވެހި ރާއްޖޭގެ ޤާނޫނު އާސާސީއާއި، ޤާނޫނުތަކުން ބޭރުވެ ހިތުހުރި ގޮތަކަށް އުޅެމުންދާއިރު އޭނާއާއިމެދު އެއްވެސް ފިޔަވަޅެއް އަޅާތަން ނުފެނެއެވެ.
މަޖިލިސް މެމްބަރަކަށްވެ ހުންނަވައި، ރޯ އަވަގުރާނަ ގޮވުމާއި، މީހުންގެ މުދަލަށް ގެއްލުން ދިނުމާއި، ބޮޑެތި އަދަދުތަކުން ދައްކަންޖެހޭ ދަރަނިތައް އަދާނުކުރާ މައްސަަލަތަކަކީވެސް ޖާބިރާއިމެދު ކުރެވޭ ބޮޑެތި ތުހުމަތުތަކެވެ. މަޖިލީހުން ބޭރުގައާއި، މަޖިލިސް ތެރޭގައިވެސް ޖާބިރު އުޅުއްވަނީ އޭނާ ހިތުހުރި ގޮތަކަށް ކަމުގައި ގިނަ ބަޔަކުދެކެއެވެ. މިކަން އެންމެ ރަނގަޅަށް ހާމަވެގެން ގޮސްފައިވަނީ މިއަދުއެވެ. މިއަދުގެ ޖަލްސާގައި ޖާބިރުވަނީ ދުލަށް އައިހައި އެއްޗެއް ގޮވަމުން ގޮވަމުން ގޮސް، އެންމެފަހުން ރާއްޖޭގައި ދީނީ މިނިވަންކަން ދިނުމަށްވެސް ގޮވާލާފައެވެ.
ރައްޔިތުންގެ މަޖިލީހުގެ މެންބަރުންނަށް މަޖިލީހުގެ ތަޅުމާއި ކޮމިޓީތަކުގައި ވާހަކަދައްކަވާއިރު ހާއްސަ އިމްތިޔާޒުތަކެއް ލިބިގެންވ އެވެ. އެގޮތުން އިސްލާމްދީނުގެ އަސްލަކާ ހިލާފު ނުވާ ގޮތަކަށް މެންބަރަކު ދައްކަވާ ވާހަކަފުޅަކާ ގުޅިގެން ތަހުގީގުކޮށް، ދައުވާ ނުކުރެވޭނެ ކަމަށް ގާނޫނުއަސާސީގެ 90 ވަނަ މާއްދާގެ (ހ)ގައި ބުނެފައިވެއެވެ.
