ހުރިހާ ގޮތަކުން ބެލިކަމުގައިވި ނަމަވެސް، އިންޑިއަކީ ދިވެހިން "ބިގް ބްރަދަރ"އެވެ. އެންމެ ގާތް ރަހުމަތްތެރިއާއެވެ. އަދި އިންޑިއާއަކީ، ރައީސް މައުމޫނުގެ ވެރިކަމުގެ ޒަމާނުއްސުރެ އެ ގައުމަކަށް ދިވެހި ޚާރިޖީ ސިޔާސަތު ދޮލަނގަކަށް ލާ "އިންޑިއާ ފަސްޓު"ގެ ގޮތުގައި ޚާއްސަކުރެވިފައިވާ ގައުމެއްވެސް މެއެވެ. ސަބަބުތައް ވަރަށް ގިނައެވެ.

އިންޑިއާ ހިމެނިގެންދަނީ، ވިޔަފާއި ދަތުރުތަކުގައި މީގެ އެތައް ޒަމާންތަކެއް ކުރިން ފެށިގެންވެސް ދިވެހިން ދަތުރުފަތުރު ކޮށް އުޅުނު ގައުމެއްގެ އިތުރުން، އެންމެ ފުރަތަމަ ދިވެހިން މަތީ ތަޢުލީމު ހާސިލްކުރަން ދާންފެށި އެއް ގައުމު ކަމުގައިވެސްމެއެވެ. އަދި މީގެ އެތައް ޒަމާނެއްކުރިން، ރައީސް މުހައްމަދު އަމީން އިންޑިއާގެ އަލީގަޅު ޔުނިވަރސިޓީގައި ތައުލީމު ހާސިލްކުރެއްވި ދުވަސްވަރުން ފެށިގެންވެސް މިއީ މި ހަގީގަތް އޮތްގޮތެވެ. އަދި ވަކީން ޚާއްސަކޮށް، ޒަމާންތައް ބަދަލުވެ، ދަތުރު ފަތުރުކުރުމުގެ ފަސޭހަތައް އާންމުވެ، އިންޑިއާއަށް މަތީ ތައުލީމު ހާސިލްކުރުމަށް ދިވެހީން ދަތުރުކުރަން ފެށުން އިތުރުވެ، ވިޔަފާރިއާއި އަދި ބޭސްފަރުވާއަށްވެސް ދިވެހިން އެންމެ އާންމުކޮށް ދަތުރު ކުރަމުންދާ ގައުމަކަށް ވެގެން ގޮސްފައިވަނީވެސް އިންޑިއާއެވެ.

ނަތީޖާއެއްގެ ގޮތުން، އިންޑިއާއި ދިވެހި ރާއްޖެއާ ދެމެދު އުފެދިގެން ގޮސްފައިވާ ސަގާފީ، އިގްތިސާދީ އަދި އިޖުތިމާޢީ ގާތް ގުޅުމަކީ އޭގެ މައްޗަށް އެއްވެސް ދެބަސްވުމެއް ނެތް ގުޅުމެކެވެ. އެއީ ރާއްޖޭގެ ފާއިތުވެދިޔަ ހުރިހާ ސަރުކާރަކުންވެސް ދަމަހައްޓަމުން އައިސްފައިވާ "އިންޑިއާ ފަސްޓް ޕޮލިސީގެ" އަސްލު ހަގީގަތްވެސް މެއެވެ.

މިސަރުކާރުގެ އެންމެ ގާތް މިތުރު!

ރައީސް އިބުރާހިމް މުހައްމަދު ސާލިހުގެ ވެރިކަމުގެ ފެށުމާއެކު، މިސަރުކާރުގެ ޚާރިޖީ ސިޔާސަތުގެ ތެރެއިން ފެނިގެންދިޔަ އެންމެ ބޮޑު ބަދަލަކަށް ވެގެންދިޔައީ، ރައީސް ޔާމިންގެ ސަރުކާރާ އިންތިހާއަށް ގުޅުން ގޯސްވެފައޮތް އިންޑިއާއި ރައީސް ސާލިހުގެ ސަރުކާރާ ގުޅުން ރަގަޅުވެ، ދެސަރުކާރުގެ ދެމެދުގައި އެކުވެރިކަމުގެ މުޅިން އާ ސަފުހާއެއް ހުޅުވިގެން ދިޔަ ދިއުމެވެ.

އަދި މި ގުޅުމުގެ ތެރެއިން، އިންޑިއާއިން ރާއްޖެއަށް ބަޖެޓު ސަޕޯޓުގެ ގޮތުގައާއި، ތައްރަގީގެ އެތަކެއް މަޝްރޫއުތަކެއްވެސް ހިމެނޭގޮތުން، ކްރެޑިޓް ފެސިލިޓީތަކާއި އަދި ލޯނު އެހީތެރިކަމުގެ ގޮތުންވެސް ފާއިތުވެދިޔަ މުއްދަތުގައިވަނީ ގިނަގުނަ އެހީތަކެއް ފޯރުކޮށް ދީފައެވެ.

މީގެ އިތުރުން ފާހަގަވެގެން ދިޔަ އެންމެ މުހިންމުކަމަކަށް ވެގެން ދިޔައީ، މިސަރުކާރުން އަޅާ ތިލަމާލެ ބްރިޖެ އެޅުމަށްޓަކާ އިންޑިއާގެ ކުންފުންޏަކާ މި ބިޔަ މަޝްރޫޢު ހަވާލުކުރި ކުރުމުވެ. މިގޮތުން މިމަސައްކަތް އިންޑިއާގެ އެފްކޮން އިންފްރާސްޓްރަކްޗާގެ ކުންފުންޏާއި ހަވާލުކޮށް، މިހާރު މަސައްކަތް ފެށުމަށް ތައްޔާރު ވަމުންދާއިރު، އިންޑިއާ ސަރުކާރުން ފޯރުކޮށްދީފައިވާ 400 މިލިއަން ޑޮލަރުގެ ލައިން އޮފް ކްރެޑިޓްއަކާއި 100 މިލިއަން ޑޮލަރުގެ ގްރާންޓެއްގެ ދަށުން ކުރިޔަށް ގެންދާ މިމަޝްރޫޢޫވެގެން ދާނީ، އިންޑިއާ ސަރުކާރުން މިހާތަނަށް ރާއްޖޭގައި ކުރިޔަށް ގެންދާ ތަރައްގީގެ އެންމެ ބޮޑު މަޝްރޫޢު ކަމުގައެވެ.

އަދި މީގެ އިތުރުންވެސް، އިދިކޮޅު ފަރާތްތަކުގެ އެންމެ ބޮޑު ޝަކުވާއަކަށް ވެގެން ގޮސްފައިވާ އުތުރު ތިލަފަޅުގައި އިންޑިއާގެ އަސްކަރިޔާއިން ކުރިޔަށް ގެންދާ މަސައްކަތްތަކަށް ބަލާލިޔަސް، މި ސަރުކާރާ އިންޑިއާ ސަރުކާރާ ދެމެދު އޮތް ގާތް ގުޅުން އިތުރަށް ތަފްސީލު ކޮށްދިނުމުގެ މާބޮޑު ބޭނުމެއް އޮތް ކަމުގައި ދެންނެވޭކަށް ނެތެވެ.

އިންޑިއާއި ގުޅުން ވަރަށް ބަދަހި، އެހެންނަމަވެސް އިންޑިއާށް ދަތުރުކުރުން އުދަގުލަކަށް ވެފައި!

މިގޮތުން ބަލާއިރު، އިންޑިއާއާއި ރާއްޖެއާއި ދެމެދުގައި އޮތް ގާތް ގުޅުން މިއަދު ރަމްޒުކޮށްދެނީ ޚާއްސަ ގޮތެއްގައި އިންޑިއާއިން ރާއްޖޭގައި ކުރިޔަށް ގެންދާ ތަރައްގީގެ މަޝްރޫޢުތަކުންކަން މިއީ އިންޑިއާ ސަރުކާރުން ފަޚުރުވެރިކަމާއެކު މިއަދު ފާހަގަ ކުރަމުންދާ އެއްކަމެކެވެ.

ތެދުފުޅެކެވެ. އިންޑިއާއިން ދޫކޮށްފައިވާ ކްރެޑިޓް ލައިންއާއި ގްރާންޓުން ހޭދަކޮށްގެން، އިންޑިއާގެ ކުންފުނިތަކަށް އާމްދަނީ ލިބޭނޭ އުސޫލުގެ މަތިންނަމަވެސް، ތަރައްގީގެ ބޮޑެތި މަޝްރޫޢުތައް އިންޑިއާގެ ކުންފުނިތަކުން ރާއްޖޭގައި ކުރިޔަށް އެބަ ގެންދެއެވެ. އަދި މިއީ، ތަރައްގީގެ މަޝްރޫޢުތަކަށް ވުމުން، ދެގައުމުގެ ދެމެދުގައި އޮތް ގުޅުމުގެ ތެރެއިން ކުރިޔަށްދާ މިމަޝްރޫޢުތައް ދިވެހި ރައްޔިތުން ބަލައިގަންނަ ޖެހޭ ކަމުގައިވެސް ދަންނަވަން ޖެހެއެވެ.

އެހެންނަމަވެސް ފާހަގަ ކޮށްލަންޖެހޭ އެންމެ މުހިންމު ނުކުތާއަކީ، މިއަދުގެ ހާލަތު ނިޔާ ކޮށްފައި އޮތްގޮތުން، އިންޑިއާއަކީ ގިނަ އަދަދެއްގެ ދިވެހީ ބޭސްފަރުވާއަށް ދަތުރު ކުރަން ޖެހިފައި އޮތް ގައުމެއްކަމެވެ. އެއީ އަދިވެސް ރާއްޖޭގެ ސިއްޙީ ނިޒާމުގެ ތެރެއިން ރަގަޅު ފެންވަރުގެ ފަރުވާ ހޯދެންނެތް އެތައް ބަޔަކަށް ބޭސްކުރުމަށް އެންމެ ގާތުގައި، އެންމެ އަވަހަށް ދަތުރުކުރެވެން އޮތް ގައުމަކީ އިންޑިއާ ކަމުގައި ވެގެން ދާތީވެސް މެއެވެ. މިގޮތުން ކޮންމެ މަހަކުވެސް، ތަފާތު އެކި ބަލިތަކަށް ބޭސްކުރުމަށް އެތައް ހާސް ދިވެހިންނެއް އިންޑިއާއަށް ދަތުރުކުމުންދާ ކަމީ، ދެބަސްވެވެން ނެތް ވަރަށް ބޮޑު ހަގީގަތެކެވެ.

އެހެންނަމަވެސް، މި ސަރުކާރާއި، ކޮނޑާއި ކޮނޑު ޖައްސައިގެން އޮތް އެންމެ ގާތް މިތުރު، އިންޑިއާއަށް ދިވެހިން ދަތުރު ކުރުމުގައި އުފުލަންޖެހިފައިވާ ބުރައާއި، އަދި ތަހައްމަލް ކުރަން ޖެހިގައި ދައްޗަކީ، މިއަދު އެކަންކަމުގެ ވާހަކަ ދިވެހީންނަށް ދެއްކުން މަޖުބޫރު ވާހަކައަކަށް މިވަނީ ވެގެން ގޮސްފައެވެ. އެއީ ބޭސްފަރުވާއަށް އިންޑިއާއަށް ދަތުރު ކުުރުކުރުމަށް ދިވެހިން ނަގަންޖެހޭ ވިސާގެ ވާހަކަ ތަކެވެ. އެވިސާ ނެގުމަށްޓަކާ އުފުލަންޖެހޭ ބުރައާއި، ކުރިމަތި ލާންޖެހޭ ދައްޗާއި، އަދި ކުރަންޖެހޭ ދިގު އިންތިޒާރުގެ ވާހަކަތަކެވެ.

މިގޮތުން ފާހަގަ ކޮށްލަންޖެހޭ އެންމެ މުހިންމު ނުކުތާއަކީ، ސްރީ ލަންކާ އަދި އިނގިރޭސިވިލާތް ފަދަ ގައުމުތަކަށްވެސް ވިސާއާއި ނުލާ އެ ގައުމުތަކަށް ދަތުރު ކުރުން ވަކި މުއްދަތަކަށް ދިވެހިންނަށް ފުރުސަތު ލިބިފައި އޮންނައިރު، ޚާރިޖީ ގޮތުން އެންމެ ބޮޑު މިތުރެއްގެ ގޮތުގައި އޮތް އިންޑިއާއަށް ދަތުރުކުރުމުގައި ދިވެހިން ވިސާ ނަގަން ޖެހޭޖެހުމެވެ.

ހަމައެއާއެކު، އެންމެ ގާތް، އެންމެ އެކުވެރި ގައުމަށް ވިސާ ނަގައިގެން ދަތުރު ކުރަންޖެހިފައި ވާއިރު، މި ވިސާނެގުމަށް ފަހަކަށް އައިސް ދިވެހިންނަށް މިވަނީ އާދަޔާ ޚިލާފު ބޮޑު ތަކުލީފުތަކެއްވެސް އުފުލަން ޖެހިފައެވެ.

މިގޮތުން އިންޑިއާއަށް ގިނަ އަދަދެއްގެ ދިވެހިން ބޭސް ފަރުވާއަށް ދަތުރު ކުރަމުންދަނީ އާސަންދައާއި އެންސްޕާގެ އެހީތެރިކަމާއެކީ ކަމަށްވާއިރު، މިތަންތަނުން އެހީތެރިކަން ލިބި، އިންޑިއާއަށް ދިއުމަށް ޓިކެޓް ނަގާ، އެހެންނަމަވެސް، މާލޭގައި ހުންނަ އިންޑިއާ އެމްބަސީން ވިސާ ހަމަ ނުޖެހި ދިގުލައިގެން ދިއުމުގެ ސަބަބުން ނުފުރި، ނެގި ޓިކެޓް ކެންސަލްވާ ހިސާބަށް ގޮސް، މި ބުރަ ދިވެހިންނަށް މިއަދު އުފުލަން ޖެހިގެން މިއުޅޭނީ ކޮން ސަބަބަކާ ހެދިތޯ މިއީ މިއަދު އެތައްބަޔަކު ކުރަމުންދާ ސުވާލެކެވެ.

އަދި މީގެ އިތުރުން، ވިސާ ހޯދުމަށްްޓަކައި ހައި ކޮމިޝަނުގެ ބޭރުގައި ކޮންމެ ދުވަހަކުހެން ކަހަލަ ގޮތަކަށް މީހުން ކިއު ހަދާފައި ތިބޭ މަންޒަރު ފެންނަ ފޮޓޯތަކާއި ވީޑިއޯތައް ސޯޝަލް މީޑިއާގައި ދައުރު ވަމުން ދާއިރު، އިންޑިއާ އެމްބަސީން ވިސާ ހޯދުމަށް ދިވެހިން މިއަދު "ސަލާން ޖަހަން" ޖެހިފައި ވުމުގެ ހަގީގީ ސަބަބަކީ ކޮބައިތޯ، މިއީ މިއަދު ސިޔާސީ ގޮތުން އިދިކޮޅު ފަތާތްތަކަށް އެކަނި ކުރަންޖެހިގެން އުޅޭ ސުވާލެއް ނޫންކަން، ފެނި ތަޖުރިބާ ކުރެވެމުންދާ ހަގީގަތްތަކުން ސާފުކޮށް ފެންނާން އެބައޮތެވެ.

އަދި ނުހަނު ޒަރޫރީ ބޭނުންތަކުގައި އިންޑިއާއަށް ދާންޖެހޭ އެތައް ނިކަމެތި ރައްޔިތުންނަކަށް، އިންޑިއާއަށް ދާން ވިސާ ހޯދުމަށް ތިން ހަތަރު ހަފްތާ ހޭދަކުރަން ޖެހި، އެ މުއްދަތުގައި ކޮޓަރި ކުއްޔަށް ހިފައިގެން މާލޭގައި އުޅެން މަޖުބޫރުވެ، އަތުގައި ހުންނަ ފައިސާކޮޅު މާލޭގައި ދިރިއުޅުމަށާއި ކެއިންބުއިމަށް ޚަރަދުކޮށް، އިންޑިއާށްދާން މާލެ އަންނަ މީހާ ހާލުގައިޖެހި ހަފުސް ވެގެންދާއިރުވެސް، މި ޝަކުވާތަކުގެ އަޑު އަހާނޭ ފަރާތެއް ނެތި، އިންޑިއާ އެމްބަސީން ވިސާ ނަގަންޖެހޭ ޖެހުން ގިލަންވެރި ކަމަކަށް ވެގެން ދިއުމަކީ، ބަލައިގަނެވޭނޭ ކަމެއް ކަމުގައި ހަގީގަތުގައިވެސް ދެންނެވެން އެބަ އޮތްތޯއެވެ.

ވާގޮތް ސަރުކާރުން ސާފު ކޮށްދޭން ޖެހޭ!

ކޮންމެ ގޮތަކުން ބެލި ކަމުގައިވި ނަމަވެސް، އިންޑިއާއަކީ، މިސަރުކާރުގެ އެންމެ ބޮޑު މިތުރެވެ. އަދި މިސަރުކާރަށް އެންމެ ގިނަ ތަރައްގީގެ މަޝްރޫޢުތައްވެސް ހިންގައިދެމުންދާ ގައުމުވެސް މެއެވެ. އަދި މިސަރުކާރުގެ ފޮރިންގ މިނިސްޓަރަށް އދ.ގެ އާންމު މަޖިލިހުގެ ރިޔާސަތުވެސް ހޯއްދަވާ ދެއްވުމުގައިވެސް އެންމެ މުހިންމު ދައުރެއް އަދާކޮށްދިން ގައުމުވެސް މެއެވެ.

އެހެންކަމުން، ކޯދުލާ ފޯދެމުންދާ މި ދެ ސަރުކާރުގެ ބަދަހި ގުޅުމުގެ ތެރެއިން، ވިސާ ހޯދުމުގައި ދިވެހިންނަށް ކުރިމަތިވަމުންދާ ދަތި އުދަގޫތަކުގެ ހަގީގީ އަސްލު، ދިވެހި ރައްޔިތުންނަށް ސަރުކާރުން ސާފު ކޮށްދޭން ޖެހޭ ކަމީ ކަށަވަރުވެ ޔަގީންވާ ކަމެކެވެ. އެންމެ އެކުވެރި ގައުމަށް، އެންމެ ޒަރޫރީ ކަންކަމުގައިވެސް ދަތުރުމަކީ އެންމެ އުދަގޫ ކަމެއްގެ ގޮތުގައި އޮތުމަކީ ކޮން ގޮތަކުން ދެކޮޅު ޖެހޭ ޚާރިޖީ ސިޔާސަތެއްކަން، މިތަކުލީފުތައް ކޮންމެ ދުވަހަކުވެސް އުފުލަމުންދާ ނިކަމެތި ރައްޔިތުންނަށް ސަރުކާރުން ސާފުކޮށްދޭން އެބަޖެހެއެވެ.

އަދި، "އެންމެ ފުތަމަ އިންޑިއާ" ސިޔާސަތު، އިންޑިއާ ސަރުކާރާ އެކީ އޮތް ޚާރިޖީ ގުޅުމުގެތެރިން މިސަރުކާރުން ދަމަހައްޓަމުން ދާއިރު، މި ސިޔާސަތަކީ އެއްކޮޅަށް ބުރަވެފައި އޮތް ސިޔާސަތަކަށްވެ، މި ސިޔާސަތުގެ ތެރެއިންވެސް، އިންޑިއާއަށް ދިވެހިން ދަތުރު ކުރުމުގައި ލިބިގެންދާ ލުއި ފަސޭހަކަމެއް ފެންނާން ނެތްއިރު، އެގައުމަށް ދަތުރުކުރާ ދިވެހިންނަށް އިންޑިއާ އެމްބަސީއިން ވިސާ ހޯދުމުގައި ކުރުމަތިވަމުންދާ ގިލަންވެރި ކަމަކީ މިއީ މިއަދު ރައްޔިތުން ފުންކޮށް ވިސްނާލަން ޖެހިފައި އޮތް ބޮޑު މައްސަލައަކަށް ވެގެން ގޮސްފައިވާއިރު، މިއީ ސަރުކާރުން ހައްލު ހޯދާ ދޭން ޖެހިފައިވާ ގައުމީ ބޮޑު މައްސައަކަށްވެސް ވެގެން ގޮސްފައިވާ ކަމީވެސް ކަށަވަރުވެ ޔަގީންވާ ކަމެކެވެ.