ނިޒާމީ މައްސަލައާ މެދު މާބޮޑަށް އަޅާލާން ވެއްޖެކަން އިންތިޚާބުން ހާމަވެއްޖެ: އިންތި

އިއްޔެ ނިމުމު އެމްޑީޕީ ދާއިރާތަކުގެ ނަތީޖާއިން، މިހާރު ވެރިކަން ކުރަމުންދާ ނިޒާމު ބަދަލު ކުރުމާއިމެދު މާބޮޑަށްވެސް ވިސްނަންޖެހޭކަން ހާމަވެގެން ގޮސްފައިވާކަމަށް ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ ވިދާޅުވެއްޖެއެވެ.

އިއްޔެ ބޭއްވި އެމްޑީޕީގެ ދާއިރާތަކުގެ އިންތިޚާބު ބަރުލަމާނީ ނިޒާމަށް ތާއީދުކުރާ ކެނޑިޑޭޓުން ކާމިޔާބު ކުރިކަމަށް ބަރުލަމާނީ ނިޒާމަށް ތާއީދު ކުރާ ކެނޑިޑޭޓުން ވަނީ ވިދާޅުވަމުންނެވެ. އިންތި ވިދާޅުވީ އިންތިޚާބުގައި ރާއްޖޭގެ އެކި ކަންކޮޅުތަކުން އެއްވެސް އެހީތެރިކަމެއްނެތި ބަރުލަމާނީ ނިޒާމަށް ތާއީދު ކުރާ ކެނޑިޑޭޓުން ކުރި ބުރަ މަަސއްކަތުން ހޯދި ކާމިޔާބީއަކީ ބޮޑު ކާމިޔާބެއްކަމަށެވެ.

އަދި އިއްޔެގެ ނަތީޖާއިން ރާއްޖޭގައި ވެރިކަން ކުރަމުންދާ ނިޒާމު ބަރުލަމާނީ ނިޒާމަކަށް ބަދަލު ކުރުމާއިމެދު ސަރުކާރުން މިހާރު ވިސްނަންޖެހޭކަން ވަރަށް ރަނގަޅަށް ހާމަވެފައިވާކަމަށެވެ. އަދި ފާޅުގައި ބަރުލަމާނީ ނިޒާމަށް ތާއީދުކޮށް މެމްބަރުން ކުރެއްވި ކެމްޕެއިނަކީ ނަމޫނާ ކެމްޕެއިނެއްކަމަށް އިންތި ވިދާޅުވިއެވެ.

އިތުރު އެހީތަކަކާ ނުލައި، އެކި ސަރަޙައްދުތަކުން ބަރުލަމާނީއަށް ފާޅުގައި ކެމްޕޭންކުރި މި ޕާރޓީ ރަމްޒުކޮށްދޭ ވަރުގަދަ ގިނަ ކެންޑިޑޭޓުން ކުރި ހޯދި ހޯދުމުން، ވެރިކަމުގެ ނިޒާމީ މައްސަލައާ މެދު މާބޮޑަށް އަޅާލާންވެއްޖެކަން ދައްކުވައިދޭ. މަރުޙަބާ!

– އިންތި ވިދާޅުވިއެވެ.

މިއިންތިޚާބާއި ކުރިމަތިލީއިރު ބަރުލަމާނީ ނިޒާމް ގެންނަން، ގާނޫނު އަސާސީ އިސްލާހު ކުރުމުގެ ކަންކަން އަވަސްކުރުމަށް ގޮވާލައި ރައީސުލްޖުމްހޫރިއްޔާއަށް ހުށައަޅާ ޕެޓިޝަނެއްގައި ސޮއިކުރުމުގެ މަސައްކަތް އެމްޑީޕީގެ އާންމު މެންބަރުން ދިޔައީ ކުރަމުންނެވެ. މި ޕެޓިޝަން ރައީސުލްޖުމްހޫރިއްޔާގެ އިތުރުން ރައްޔިތުންގެ މަޖިލީހަށްވެސް ހުށައަޅާނެ ކަމަށް މިކަން އިންތިޒާމު ކުރާ ފަރާތުން ބުނެއެވެ.

ރާއްޖޭގައި މިހާރު މިއޮތް ވެރިކަމުގެ ނިޒާމު ބަދަލުކުރެވޭނީ އާންމު ރައްޔިތުންގެ ވޯޓަކުން ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްވަނީ ވިދާޅުވެފައެވެ. 2008 ވަނަ އަހަރު ދިވެހިން ބަލައިގަތް ފެހި ޤާނޫނު އަސާސީއަށް އަމަލުކުރަން ފެށުމުގެ ކުރިން ރާއްޖޭގައި އޮންނަން ބޭނުންވާ ވެރިކަމުގެ ނިޒާމު ކަނޑައެޅުމަށް ނެގި ރައްޔިތުންގެ ފެންނަ ނުފެންނަ ވޯޓުގައި 95،619 މީހުން ވޯޓުދީފައިވަނީ ރާއްޖޭގައި އޮންނަން ފެންނަނީ ރިޔާސީ ނިޒާމުކަމަށެވެ.

ބަރުލަމާނީ ނިޒާމު އޮންނަން ފެންނަކަމަށް ވޯޓުދީފައިވަނީ 58،504 މީހުންނެވެ. މި ވޯޓުގައި 199،841 މީހުން ވޯޓުލުމަށް ރަޖިސްޓްރީކުރިއިރު، ވެރިކަމުގެ ނިޒާމު ކަނޑައެޅުމަށް ވޯޓުދީފައިވަނީ 155،890 މީހުންނެވެ.