މިއަދަކީ ޤައުމިއްޔަތު ބިނާކުރުމުގައި، ފަޚުރުވެރި ކާމިޔާބީއެއް ހޯދޭ ދުވަހެއް ކަމުގައި އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.
މެެއި މަހުގެ 6 ވަނަ ދުވަހު ދިން ނުރައްކާތެރި ޓެރެރިސްޓު ހަމަލާއަށްފަހު އިނގިރޭސިވިލާތުގައި މިހާރުވެސް ފަރުވާ ހޯއްދަވަމުންދާ ރައީސް ނަޝީދު މިއަދުގެ އިންތިޚާބާއި ގުޅިގެން ކުރެއްވި ޓްވީޓުގައި ވިދާޅުވީ މިއަދަކީ ޤާއުމިއްޔަތު ބިނާކުރުމުގައި އަނެކާވެސް ފަޚުރުވެރި ކާމިޔާވީއެއް ހޯދޭ ދުވަހެއް ކަމުގައެވެ. އެމްޑީޕީން އަބަދުވެސް ކަންކަން ނިންމަމުން ދަނީ ވޯޓުން ކަމަށާއި، މިއަދުގެ ނިންމުންވެސް އެމްޑީޕީގެ މެމްބަރުން ވަރަށް އަމާން ކަމާއި އޮމާން ކަމާއިއެކު ނިންމާނެކަމަށް ރައީސް ނަޝީދު ވިދާޅުވިއެވެ.
މިއަދަކީ ޤައުމިއްޔަތު ބިނާކުރުމުގައި އަނެކާވެސް ފަޚުރުވެރި ކާމިޔާބީއެއް ހޯދޭ ދުވަހެއް. އެންމެންގެ ބައިވެރިވުމާއި ވޯޓު ފޮށިން ކަންކަން ނިންމުމަކީ އެމްޑީޕީގެ އެންމެ މުހިންމު އަމާޒު. ވަރަށް މަރުހަބާ.
– ރައީސް ނަޝީދު ވިދާޅުވިއެވެ.
Miadhakee qaumiyath binaakurumugai anehkaaves fakhuruveri kaamiyaabee eh hoadhey dhuvaheh. Enmenge baiverivumaai vote foshin kankan nimmumakee MDP ge enme muhinmu amaaz. Varah marhaba. ????????
— Mohamed Nasheed (@MohamedNasheed) September 25, 2021
މިއަދުގެ އިންތިޚާބުގައި ރައީސް ނަޝީދަށް ވޯޓު ލުމުގެ ފުރުސަތެއް ނެތެވެ. ރާއްޖެއިން ބޭރުގައި ހުންނެވި ނަމަވެސް ވާދަވެރިކަން ބޮޑުވެފައިވާ މިއިންތިޚާބުގައި ރައީސް ނަޝީދުގެ ޝުއޫރު ފާޅު ކުރައްވާފައިވާއިރު، އެމްޑީޕީގެ އެންމެ އިސްލީޑަރު ރައީސް ޞާލިހު އަދި އިންތިޚާބާއި ގުޅިގެން އެއްވެސް އެއްޗެއް ވިދާޅުވެފައިނުވެއެވެ.
އެމްޑީޕީގެ އިންތިޚާބު ތަކުގައިވެސް އަދި އާންމު އިންތިޚާބު ތަކުގައިވެސް އަމަލީގޮތުން އެންމެ ބޮޑަށް ހަރަކާތްތެރިވާ އެމްޑީޕީގެ ރައީސް މުހައްމަދު ނަޝީދަކީ އިންތިޚާބުން ކަންކަން ނިންމުމަށް ވަރަށް ބޮޑަށް ބާރު އަޅުއްވާ ބޭފުޅެކެވެ. މިއަދުގެ އިންތިޚާބުގައި ރައީސް ޞާލިހާއި، ރައީސް ނަޝީދަށް ތާއީދު ކުރައްވާ ބޭފުޅުންގެ މެދުގައި ވާދަވެރިކަން ބޮޑުވެ އިންތިޚާބުގެ ނަތީޖާއަށް ގިނަ ބަޔަކު ދަނީ އިންތިޒާރު ކުރަމުންނެވެ. މިނަތީއަކީ އެމްޑީޕީގެ މުސްތަގުބަލާއިވެސް ގުޅިފައިވާ ނަތީޖާއެކެވެ.
