ކުރީގެ އިސްލާމިކް މިނިސްޓަރ ޑރ.މުހައްމަދު ޝަހީމް އަލީ ސައީދުގެ މާލިމީ ކަމުގައި ޤައުމީ ފެންވަރުގައި އިސްލާމީ ތަރުބިޔަތާއި ޘަޤާފަތާއި ޙަޟާރަތު ދެމެހެއްޓުމަށް އިސްލާމިކް އޮގަނައިޒޭޝަނެއް އުފައްދައި މަސައްކަތް ފެށުމަށް ތައްޔާރުވެއްޖެއެވެ.
އިތުބާރު ހުރި މަޞްދަރަކުން މަޢުލޫމާތު ލިބިފައިވާ ގޮތުން، ޑރ.މުޙައްމަދު ޝަހީމް ޢަލީ ސަޢީދުގެ ވަރަށް އަރިސް ބޭފުޅެއްގެ ނަމުގައި އުފެއްދާފައިވާ މިއޮގަނައިޒޭޝަނަކީ، ތަޢުލީމާއި ތަރުބިޔަތާއި ފިކުރާއި އިސްލާމީ އަޚުލާޤާއި ޙަޟާރަތާއި ޘަޤާފަތާއި އިސްލާމީ މެދުމިން އުޞޫލުތަކާއި އެކުވެރިކަމާއި ޞުލްޙައާއި ސިލްމާއި ސަލާމަތު ފަތުރައި ނަގަހައްޓުމުގެ އިތުރުން، ތަފާތު ދާއިރާތަކުން ޢިލްމީ ދިރާސާތައް ޝާއިޢުކޮށް، އިސްލާމީ އުންމަތާއި ރާއްޖެއާއި އޮންނަ ގުޅުން އިތުރަށް ބަދަހިކޮށް، ތަފާތު ސަޤާފަތްތަކުގެ އަހުލުވެރިންނާއި ޞުލްޙަވެރި ގުޅުން އިސްކޮށް، މިކަންކަން ދަމަހައްޓައި ނެގެހެއްޓުމުގެ މަތިވެރި މަޤުޞަދުގައި އުފެއްދި އޮގަނައިޒޭޝަނެކެވެ.
އެފަރާތުން ހާމަކުރިގޮތުން މި އޮގަނައިޒޭޝަންގެ ރައީސަކަށް ވެވަޑައިގަނަވާނީ ކުރީގެ އިސްލާމިކް މިނިސްޓަރ އަދި އިސްލާމިކް ޔުނިވަރސިޓީގެ ކުރީގެ ޗާންސެލަރ، އަދި އޯއައިސީގެ ސެކްރެޓަރީ ޖެނެރަލްގެ ކުރީގެ އެޑްވައިޒަރުކަން ވެސް ކުރެވި ޑރ. މުޙައްމަދު ޝަހީމް ޢަލީ ސަޢީދެވެ.
މި އޮގަނައިޒޭޝަންގެ ލީޑަރޝިޕާއި ފިކުރީ މަސައްކަތްތަކުގެ ތެރެއިން ބައިނަލްއަަޤުވާމީ އެކި އެކި ޔުނިވަރސިޓީތަކުން ތަފާތު ދާއިރާތަކުން މަތީ ތަޢުލީމު ޙާޞިލްކުރައްވާފައިވާ ތަޖުރިބާހުރި، ދައުލަތުގެ އެކި ފެންވަރުގެ މަޤާމުތައް ފުރުއްވާފައިވާ ގިނަ ބޭފުޅުންތަކެއް ފެނިގެންދާނެކަމަށް ވެސް މަޢުލޫމާތު ލިބިފައިވެއެވެ. އަދި އެފަދަ ބޭފުޅުންނަށް މި އޮގަނައިޒޭޝަންގެ ތެރެއިން ފުރުޞަތު އެބައޮތްކަމަށް ވެސް މަޢުލޫމާތު ލިބިފައިވެއެވެ.
މި އޮގަނައިޒޭޝަން އުފައްދާފައިވަނީ ޖަމިއްޔާތަކަށްވެސް އޭގެ މެންބަރަކަށް ވެވޭގޮތަށެވެ. ރައީސާއި ހަތަރު ނައިބުނާއި އެޑްވައިޒަރުންނާއި އެންވޯއީންނާއި ހިންގާ ކޮމެޓީގެ މަޤާމުތަކުގެ އިތުރުން އިސްލާމިކް އެޑްވައިޒަރީ ކައުންސިލެއްވެސް އޮވެއެވެ. އޮގަނައިޒޭޝަންގައި ރާއްޖެއިން ބޭރުގެ ޕްރޮފެޝަނަލްދާއިރާތަކުން މުޝްތަޝާރުންވެސް ތިއްބަވާނެކަމަށް ވެއެވެ. މި އޮގަނައިޒޭޝަންގެ ލީޑަރޝިޕްގެ މަޤާމުތަކަށް މި އަންނަ ހަފްތާގައި މީހުން ޢައްޔަންކުރާނެ ކަމަށް މަޢުލޫމާތު ލިބިއެވެ.
