މިއަދު ކުރިއަށްދާ ވެރިކަން ކުރާ މައިޕާޓީ އެމްޑީޕީގެ އެންމެ ބޮޑު އިންތިޚާބުގައި އެޕާޓީގެ އެންމެ އިސް ދެލީޑަރުން ކަމުގައި ޕާޓީގެ ރައީސް މުހައްމަދު ނަޝީދާއި، ޕާޓީގެ އިސްލީޑަރު ރައީސް އިބްރާހިމް މުހައްމަދު ޞާލިހަށް ވޯޓެއް ނުލެއްވޭނެއެވެ.
މިއަދު އިންތިޚާބު ފޯރީގައި ކުރިއަށްދާއިރު، ގިނަ ބަޔަކު ވަނީ ވޯޓުލާން ނިކުމެފައެވެ. އިންތިޚާބުގައި އެންމެ ބޮޑު ވާދަވެރިކަމެއް އޮތީ ރައީސް ޞާލިހާއި، ރައީސް ނަޝީދުގެ މެދުގައެެވެ. ދެބޭފުޅުންނަށް ތާއީދު ކުރައްވާ ކެނޑިޑޭޓުންނަށް އިންތިޚާބު ކާމިޔާބު ކުރުމަށް ފޯރީގައި ކެމްޕެއިން ކުރެވި މިއަދު ވޯޓުލާއިރު، މިއިންތިޚާބުގައި ރައީސް ނަޝީދަށްވެސް އަދި ރައީސް ޞާލިހަށްވެސް ވޯޓެއް ނުލެވޭނެއެވެ.
ރައީސް ނަޝީދަށް މެއި މަހުގެ 6 ވަނަ ދުވަހުގެރޭ ދެވުނު ނުރައްކާތެރި ހަމަލާއަށްފަހު އެމަނިކުފާނު ހުންނެވީ އިނގިރޭސި ވިލާތުގައެވެ. އަދި ރައީސް ޞާލިހު ހުންނެވީ އދ.ގެ އާންމު މަޖިލީހުގައި ބައިވެރިވެ ވަޑައިގެންވުމަށް ވަޑައިގެން އެމެރިކާގައެވެ. ދެބޭފުޅުންގެވެސް ރާއްޖޭގައި ނެތުމުން އިންތިޚާބުގައި ވޯޓުލުމުގެ ފުރުސަތު ލިބިވަޑައި ނުގަންނަވާނެއެވެ.
ރައީސް ޞާލިހުވަނީ އެމެރިކާއަށް ވަޑައިގެންނެވުމުގެ ކުރިން ކައިރި ކައިރީގައި އަތޮޅު ތެރޭގެ ބައެއް ރަށްތަކަށް ވަޑައިގެން ކެމްޕެއިން ހަރަކާތްތައް ކުރިއަށް ގެންގޮސްފައެވެ. ނަމަވެސް ރާއްޖޭގެ ހާލަތު އޮތް ގޮތުން ރާއްޖެއަށް ވަޑައިގެން ޖެހިލުވާކަމަށް ވިދާޅުވެފައިވާ ރައީސް ނަޝީދަށް ސޯޝަލް މީޑިއާ މެދުވެރިކޮށްވެސް އިންތިޚާބުގެ ކެމްޕެއިންގައި ބައިވެރިވެވިފައިވަނީ ވަރަށް މަދު ފަހަރަކުއެވެ. އިންތިޚާބުގައި ރައީސް ނަޝީދާއި ރައީސް ޞާލިހު ނެތި ކުރިއަށްދާއިރު މިއީ އެމްޑީޕީގެ ތާރީހުގައިވެސް ޕާޓީގެ އެންމެ ދެބޭފުޅުން ނެތި އިންތިޚާބު ކުރިއަށްދާ ފުރަތަމަ ފަހަރެވެ.
އިންތިޚާބު ތަކުގައި ރައީސް ނަޝީދަކީ މަގުމަތީގައި ގިނަ ވަގުތު ހޭދަކުރައްވާ، ވޯޓުލުން ކުރިއަށްދާ ގޮތް ގާތުން ބައްލަވާ ބޭފުޅެކެވެ. އިންތިޚާބުގައި އެމްޑީޕީގެ އިސް ދެބޭފުޅުން ރާއްޖޭގައި ނެތްނަމަވެސް މި އިންތިޚާބުގެ ނަތީޖާ ބުރަވަނީ މިދެބޭފުޅުންނަށެވެ. އަދި އިންތިޚާބުގެ ނަތީޖާ ބިނާވަނީ ކުރިއަށް އޮތް ރިޔާސީ އިންތިޚާބުގެ އެމްޑީޕީ ޓިކެޓް ލިބޭނެ ބޭފުޅެއް ޔަގީންވުމާއި، ބަރުލަމާނީ ނިޒާމަށް އޮތް ތާއީދުވެސް ހާމަވެގެންދާނެ އިންތިޚާބަކަށެވެ.
