ޔޫރަޕްގައި ބޭނުންކުރާ ހުރިހާ ފޯނަކާއި އަދި އިލެކްޓްރޯނިކް ކުދި ޑިވައިސްތައް ޗާރޖު ކުރުމުގައި އެއް ވައްތަރެއް ގެންގުޅުމަށް މަޖުބޫރުވާ ގަވާއިދެއް ޔޫރަޕިއަން ޔޫނިއަންގެ ކޮމިޝަންއަށް ހުށަހަޅައިފިއެވެ.

ޔޫރަޕިއަން ކޮމިޝަންއިން ބުނެފައިވާ ގޮތުގައި، ޔޫރަޕްގައި ބޭނުންކުރާ ހުރިހާ ފޯނަކަށާއި، އަދި ސައިޒުން ކުޑަ ހުރިހާ އިލެކްޓްރޯނިކް ޑިވައިސްއެއް ޗާރޖު ކުރުމަށް އެއް ހައްލެއް ހޯދުމަށް އެކޮމިޝަނުން ވިސްނާފައިވަނީ، އާ ޑިވައިސްތައް ގަންނައިރު، ކުރިންވެސް ޑިވައިސް ޗާޖުކުރުމަށް ބޭނުން ކުރަމުން އައި ޗާރޖަރު ބޭނުން ކުރުމަށް ހިތްވަރުދީ އަދި އެގޮތުން، އުފެދޭ ކުނި ބުނި މަދު ކުރުމެވެ.

އީޔޫގެ ކޮމިޝަނަށް މިހާރު ހުށަހެޅިފައިވާ ޕްރޮޕޯސަލްގައި ވާގޮތުން، މި ގަވާއިދު ތަންފީޒު ކުރެވެން ފެށުމުން، ޔޫރަޕްގައި ވިއްކާ ހުރިހާ ފޯނެއްވެސް ޗާރޖު ކުރުމަށް ބޭނުންކުރަން ޖެހޭނީ ޔޫއެސްބީ-ސީ (USB-C) ޗާރޖަރުތަކެވެ.

އެހެންނަމަވެސް، ދުނިޔޭގެ ފޯނު އުފައްދާ އެންމެ ބޮޑު އެއް ކުންފުނި ކަމުގައިވާ އެޕްލް ކުންފުނިން ބުނެފައިވަނީ، މިފަދަ ފިޔަވަޅެއްގެ ސަބަބުން އާ އީޖާދުތައް ކުރުމަށް ބޮޑެތި ހުރަސްތަކެއް އެޅިގެންދާނެ ކަމުގައެވެ.

ދުނިޔޭގެ އެންމެ ބޮޑު އެއް ޓެކް ކުންފުނި ކަމުގައި އެޕްލް ކުންފުންޏަކީ އެމީހުންގެ އަމިއްލަ ޗާޖުކުރާ ޕޯޓެއް ގެންގުޅޭ ކުންފުންޏެކެވެ. މިގޮތުން އެޕްލްގެ ފޯނުތައް ޗާޖު ކުރުމަށް ބޭނުން ކުރަމުން އަންނަނީ އެކުންފުނީގެ އުފެއްދުމެއް ކަމުގައިވާ ލައިޓްނިންގ (Lightning) ކަނެކްޓަރ އެވެ.

"އަހަރެމެންގެ އެންމެ ބޮޑު ކަންބުޑުވުމަކީ، އެންމެން ވައްތަރެއްގެ ކަނެކްޓަރުތައް ބޭނުންކުރުން މަޖުބޫރު ވެގެންދިއުމުން، އާ އީޖާތުތައް ކުރުމަށް ހިތްވަރު ލިބުމުގެ ބަދަލުގައި އެކަމަށް ބޮޑެތި ހުރަސްތަކެއް އެޅިގެންދާ ދިއުން. އަދި އޭގެ ނަތީޖާއެއްގެ ގޮތުން ޑިވައިސްތައް ބޭނުން ކުރާ ފަރާތަކަށް ޔޫރަޕްގެ އިތުރުން ދުނިޔޭ ހުރިިހާ ތަނެއްގައިވެސް ގެއްލުން ލިބިގެން ދާނެ،" އެޕްލް ކުންފުނިން ބުނެފައި ވެއެވެ.

އެޕްލް ކުންފުނިން ބުނެފައިވާ ގޮތުގައި އެ ކުންފުނީގެ އަމާޒަކީ، 2030ގެ ނިޔަލަށް އެކުންފުނިން އުފައްދާ ހުރިހާ ފޯނުތަކެއްވެސް އަދި ކުރާ ބޭނުންތައްވެސް ކާރބަން ނިއުޓްރަލް ކުރުމެވެ.

މިހާރު ދުނިޔޭގައި އުފައްދާ އެންޑްރޮއިޑް ހުރިހާ ފޯނުތަކަކަށްވެސް ބޭނުންވަނީ ޔޫއެސްބީ-މައިކްރޯ ބީ (USB micro-B)ގެ ޗާޖަރުތަކެވެ. ނުވަތަ އެންޑްރޮއިޑްގެ ފޯނުތައް މިހާރުވަނީ ފަހުގެ ޔޫއެސްބީ-ސީ (USB-C) އަށް ހިޖުރަ ކޮށްފައެވެ.

ދުނިޔޭގެ މަތީ ފެންވަރުގައި، އެންޑްރޮއިޑް އޮޕަރޭޓިންގެ ސިސްޓަމް ބޭނުން ކޮށްގެން ފޯނު އުފައްދާ ސެމްސަގ އާއި ހުއާވޭ އިންވެސް ޔޫއެސްބީ-ސީ (USB-C) ޗާޖު ކުރާ ޕޯޓުތައް ގެންގުޅޭ ފަދައިން، އައިޕެޑް އަދި މެކްބުކްގެ އާ މޮޑެލްތަކަށްވެސް މިހާރު ބޭނުން ކުރަމުންދަނީ ޔޫއެސްބީ-ސީ (USB-C)ގެ ޗާޖުކުރާ ޕޯޓުތަކެވެ.

އިޔޫއިން މިގެންނަ ބަދަލުގެ ތެރޭގައި ހިމެނިގެންދާނީ، ޗާޖަރު ފޯނާއި ގުޅާ ކޮޅު އެއްގޮތް ކުރުން މަޖުބޫރު ވެގެން ދިއުމެވެ. އެހެންނަމަވެސް، ޗާޖުކުރާ ވާގަޑު ޕްލަގާއި ގުޅާ ކޮޅު ޔޫއެސް-ބީ (USB-C) ނުވަތަ ޔޫއެސް-އޭ (USB-A)ގެ ގޮތުގައި ބޭންދިދާނެއެވެ.

2019 ވަނަ އަހަރު ޔޫރަޕިއަން ޔޫނިއަން ކޮމިޝަންއިން ހަދާފައިވާ އިމްޕެކްޓް އެސެސްމަންޓް ދިރާސާއިން ދައްކާފައިވާ ގޮތުގަައި، ޔޫރަޕިއަން ޔޫނިއަންގައި ހިމެނޭ ގައުމުތަކުގައި 2018ވަނަ އަހަރު ބޭނުންކުރި ފޯނުތަކުގެ ތެރެއިން %50 ފޯނުގައި ބޭނުން ކޮށްފައިވަނީ ޔޫއެސްބީ މައިކްރޯ-ބީ (USB micro-B) ކަނެކްޓަރުތަކެވެ. އަދި ޔޫއެސްބީ-ސީ (USB-C)ގެ ކަނެކްޓަރުތައް %29 ބޭނުން ކޮށްފައިވާއިރު، ލައިންޓްނިންގ (Lightning) ކަނެކްޓަރުތައް ބޭނުން ކޮށްފައިވަނީ %21 ފޯނުގައެވެ.

އީޔޫއިން އަލަށް ނެރޭ ގަވާދުގެ ތެރެއަށް ފެތޭ ޑިވައިސްތައް ތިރީގައި މިވަނީއެވެ.

• ސްމާރޓް ފޯނު
• ޓެބްލެޓް
• ކެމެރާ
• ހެޑް ފޯން
• ޕޯޓެބްލް ސްޕީކަރު
• ހޭންޑްލް ވީޑިއޯގޭމް ކޮންސޯލްސް (ވީޑިއޯ ގޭމް ކުޅޭ ކުދިކުދި ޑިވައިސް)

އެހެނިހެން ކުދި ޑިވައިސްތަކުގެ ތެރޭގައި ހިމެނޭ، ކަންފަތުގައި ވަކިން ބޭނުން ކުރާ ހެޑް ފޯން (earbuds) ތަކާއި، ސްމާރޓް ގަޑިއާއި، ފިޓްނަސް ބެލުމަށް ގެންގުޅޭ ކުދިކުދި ޑިވަސްތައް، މިތަކެތީގެ ސައިޒާއި އަދި ބޭނުން ކުރަންޖެހޭ ހާލަތްތަކާ ގުޅިގެން މި ގަވާއިދުގެ ތެރޭގައި ހިމަނާފައި ނުވެއެވެ.